ەڭبەكشىقازاق اۋدانىنا قاراستى تولە بي اۋىلىندا جاڭادان سالىنىپ جاتقان مەكتەپ قۇرىلىسىنىڭ ماۋسىم ايىنان بەرى توقتاپ قالۋى ۇستازدار مەن وقۋشىلاردىڭ قۋانىشىن سۋ سەپكەندەي باسقان. 600 ورىنعا ارنالعان ءبىلىم وشاعىنىڭ قۇرىلىسى 2021 جىلى باستالعان.
«612 بالا قازىر 60 جىل بۇرىن سالىنعان مەكتەپتە وقىپ جاتىر. كابينەت جەتىسپەيدى. جاتتىعۋ زالىندا سپورتپەن شۇعىلدانۋعا مۇمكىندىك جوق. اتا-انالار مەن ۇستازداردىڭ ارمانى – جاڭا مەكتەپكە كوشۋ. جاڭا مەكتەپتىڭ تەزىرەك اشىلۋىنا جان-جاقتى قولداۋ كورسەتسە ەكەن», دەيدى تولە بي ورتا مەكتەبىنىڭ ديرەكتورى قازي ىسقاقوۆ.
اۋىلعا ات باسىن بۇرعان «Amanat» پارتياسىنىڭ وكىلدەرى بۇل نىسان پارتيانىڭ ءجىتى باقىلاۋىندا ەكەنىن ايتتى.
«مەكتەپ قۇرىلىسىنا 1 ملرد 489 ملن تەڭگەدەن اسا قارجى بولىنگەن. باس مەردىگەر سونىڭ ءوزى جەتپەي قالعانىن ايتادى. ويتكەنى جوبانىڭ جالپى قۇنى 3 ملرد تەڭگەدەن اسادى. سوندىقتان قۇرىلىستىڭ تۇرالاپ قالعانىن جاسىرمايدى. بۇل جۇمىستى پارتيا مۇشەلەرى باقىلاۋدا ۇستاماق», دەيدى وبلىستىق پارتيا فيليالىنىڭ توراعاسى قۋات بايعودجاەۆ.
اماناتتىقتار الداعى ۋاقىتتا ءبىلىم جانە قۇرىلىس باسقارمالارىن فراكتسيا وتىرىسىندا تىڭداپ, قاتاڭ شارا قولداناتىنىن جەتكىزدى.
سونىمەن قاتار بۇل نىسان تۋرالى ماسەلەنى ءماجىلىس دەپۋتاتى, پارتيانىڭ باقىلاۋ كوميتەتىنىڭ توراعاسى پاۆەل كازانتسەۆ رەسپۋبليكا كولەمىندە كوتەرەتىنىن العا تارتقان.
بۇل – وڭىردەگى ءبىرىنشى ماسەلە ەمەس. مەكتەپ تاپشىلىعىنان قاراساي اۋدانىنا قاراستى دولان اۋىلىندا 200 وقۋشى جالدامالى جەكە تۇرعىن ءۇي عيماراتىندا وقۋعا ءماجبۇر. سەبەبى ەلدى مەكەندە مەكتەپ جوق.
دولانداعى 70 ورىندىق جالعىز باستاۋىش مەكتەپ بىلتىر اپاتتى دەپ تانىلىپ, جابىلىپ قالعان. سودان بەرى 202 وقۋشى جەكە تۇرعىن ۇيلەردىڭ قۋىقتاي بولمەلەرىندە ءۇش اۋىسىممەن ءبىلىم الىپ جاتىر. ال جوعارى سىنىپ وقۋشىلارى كورشى اۋىلدارعا قاتىناپ وقيدى.
ءتۇيىندى ماسەلەنى شەشۋ ءۇشىن بيىل مۇندا «Amanat» پارتياسىنىڭ سايلاۋالدى باعدارلاماسى اياسىندا 1 200 ورىندىق جاڭا مەكتەپ قۇرىلىسى باستالدى.
«ەندى وسى مەكتەپ سالىنعاننان كەيىن اۋىلدىڭ پروبلەماسى تۇبەگەيلى شەشىلەدى. بۇگىنگى تاڭدا اۋداندا 8 مەكتەپ – ءۇش اۋىسىمدىق. مۇنى جويۋ بويىنشا اۋداندا ۇلكەن ىستەر اتقارىلىپ جاتىر. 2023-2024 جىلدارى 10 مەكتەپ سالىنادى دەپ جوسپارلاپ وتىرمىز», دەدى اۋداندىق پارتيا فيليالىنىڭ توراعاسى قانىبەك ايتجانوۆ.
مەردىگەرلەر مەكتەپتىڭ قۇرىلىس جۇمىستارى الداعى جىلدىڭ قازان ايىندا اياقتالاتىنىنا سەندىردى.
«بۇل جۇمىستاردى كوكتەمدە ازىرلەدىك. قۇرىلىس-مونتاجداۋ جۇمىستارى تامىز ايىندا باستالدى. ءبىز ساپاعا اسا قاتتى ءمان بەرەمىز. ماسەلەن, مۇنداعى توپىراق – بورپىلداق. قازىر ونى تىعىزداپ جاتىرمىز. سوندا سالىنىپ جاتقان عيمارات ۋاقىت وتە شوگىپ قالمايدى. نىساندى مەرزىمىنەن كەشىكتىرمەي تاپسىرامىز», دەيدى مەردىگەر كومپانيا وكىلى.
ايتا كەتەرلىگى, بۇل – «جايلى مەكتەپ» جوباسى اياسىندا سالىنىپ جاتقان زاماناۋي ءبىلىم ورداسى.
وڭىردە ءۇش اۋىسىمدى جانە وقۋشى ورنىنىڭ تاپشىلىعىن جويۋ ماقساتىندا بىلتىر 710 ورىندىق 4 مەكتەپ سالىنىپ, قولدانىسقا بەرىلسە, بيىل 16 مەكتەپتىڭ قۇرىلىسى جۇرگىزىلىپ جاتىر. ونىڭ 9-ى 1-قىركۇيەكتە پايدالانۋعا بەرىلدى.
الماتى وبلىسى
