كومىرلى قالانىڭ جىلۋ جۇيەسىندەگى اپاتتىڭ ورىن العانىنا جىلعا جۋىق ۋاقىت وتسە دە, قاڭتاردىڭ ايازى ءوتىپ كەتكەن جۇرتتىڭ بويى ءالى جىلىنا قويمادى. كوپقاباتتى باسپانالاردى ورتالىق جىلۋعا قوسۋ شارالارى قازان ايىنىڭ باسىندا باستالعان. ايتسە دە جەرگىلىكتى اكىمدىك پەن جىلۋ-ەنەرگيا ورتالىعى, جىلۋ جەلىلەرىنە جاۋاپتى كاسىپورىن ماسەلەنى تۇبەگەيلى شەشە الماي تۇرعانى بايقالادى. پاتەرىندە جاۋراعان جۇرت قوس-قوستاپ جىلىتقىش قوسىپ, قالىڭ كيىم كيىپ جان ساقتاۋدا. بۇعان دەيىن №19 شاعىن اۋدانىنداعى جاڭا ۇيلەردە ماسەلە قالىپتاسىپ وتىرعانى تۋرالى جازعان ەدىك. اۋماقتاعى تۇيتكىل تولىققاندى شەشىمىن تاپپاعان سىڭايلى. قازىر قالانىڭ ءار اۋماعىندا جالپى سانى 20-عا جۋىق تۇرعىن ۇيدە پروبلەما قالىپتاسقان.
ال جەرگىلىكتى اكىمدىك وكىلدەرى پاتەرلەردىڭ سۋىق بولۋىنا تۇرعىنداردىڭ وزدەرى سەبەپكەر, جىلۋ جەلىسىندەگى اۋانى شىعارمايدى, رادياتورلاردى ۋاقتىلى جۋمايدى دەپ كىنا ارتىپ وتىر.
– قازىرگى ۋاقىتتا كوپقاباتتى 10 ۇيدە جىلۋ جەتىسپەۋشىلىگى ايقىندالىپ, ولاردى جويۋ بويىنشا ءىس-شارالار اتقارىلىپ جاتىر. جەرگىلىكتى جەرلەردە اقاۋ شىعا قالسا, «ەكىباستۇز جىلۋ-ەنەرگو» جشس مەن مەردىگەر كومپانيالاردىڭ جانە قالاقۇراۋشى كاسىپورىنداردىڭ قىزمەتكەرلەرىنەن قۇرالعان ارنايى جوندەۋ بريگادالارى ىسكە كىرىسەدى. جىلۋ ماۋسىمى باستالعالى جىلۋ ساپاسى مەن ونىڭ مۇلدە جوعالىپ كەتۋىنە بايلانىستى ازاماتتاردىڭ شاعىمىنا قۇلاق اسىپ, تۇرعىن ءۇي ينسپەكتسياسى مەن جىلۋ جەلىلەرىنىڭ وكىلدەرى 40-تاي ماسەلەنى شەشتى. نەگىزى قالا تولىقتاي ورتالىق جىلۋمەن قامتىلعان. بۇل جەردەگى ماسەلە ۇيلەردىڭ ىشكى جۇيەلەرىنە قاتىستى بولىپ وتىر. ۇيلەردىڭ دايىندىعى ناشار بولعان. ايتپەسە قالاداعى 690 تۇرعىن ءۇي مەن جەكە سەكتورداعى 5 737 باسپانا جىلۋ جۇيەسى مەن ىستىق سۋعا 100 پايىز قوسىلدى, – دەيدى قالا اكىمىنىڭ ورىنباسارى انۋاربەك امانوۆ.
ماماندار كوپتەگەن ءۇيدىڭ ىشكى قۇبىرلارىن رەتتەپ, اۋاسىن شىعارۋ كەرەك دەپ سانايدى. الايدا جۇرتشىلىق اكىمدىك پەن جىلۋ كاسىپورنىنىڭ وكىلدەرىنىڭ سىلتاۋى كوپ, نەگىزگى تۇيتكىل ورتالىق ماگيسترالداردا دەپ وتىر. ياعني جىلۋ پارامەترلەرى تالاپقا ساي ەمەس, قىسىمى تومەن, اينالىمى ءالسىز. ونىڭ ۇستىنە ءبىراز ۇيلەردە ىستىق سۋ وقتىن-وقتىن توقتاپ قالادى. سوندىقتان اكىمدىكتىڭ جوعارىدا ايتقان ءجۇز پايىز كورسەتكىشى ەشبىر ويعا سىيمايتىنداي. ال جىلۋ-ەنەرگيا ورتالىعىنداعى جىلۋ تاسىمالداعىشتىڭ پارامەترلەرى قالىپتى, ياعني كاسىپورىننان شىعاتىن سۋدىڭ تەمپەراتۋراسى – 70, اينالىپ كەلەتىن سۋدىڭ قىزۋى 50 گرادۋستى كورسەتىپ تۇر. ازىرشە قالانى 5 قازاندىق اگرەگاتى جىلۋمەن قامتاماسىز ەتىپ وتىر. جۋىق ۋاقىتتا جوندەلىپ جاتقان تاعى 3 قازاندىق ىسكە قوسىلادى.
سۋىق ۇيلەردەگى جىلۋ پارامەترلەرى قاشان تولىق رەتكە كەلتىرىلەتىنىن اكىمدىك وكىلدەرى دە, جىلۋ كاسىپورنى دا ايتا المايدى. سەبەبى جىلۋ پارامەترلەرىن تەڭەستىرۋگە ءالى دە ءبىراز ۋاقىت قاجەت كورىنەدى. الداعى قىس ەكىباستۇزدىقتار ءۇشىن جايلى بولسىن دەپ تىلەيمىز.
پاۆلودار وبلىسى,
ەكىباستۇز قالاسى
