پاۆلودار وبلىسىنىڭ قورعانىس ىستەرى جونىندەگى دەپارتامەنتى باستىعىنىڭ ورىنباسارى, پودپولكوۆنيك الماسبەك بۇحارباەۆ پەن «قارۋلى كۇشتەر ارداگەرلەرى» رقب وبلىستىق فيليالىنىڭ توراعاسى جان قاراتاەۆ سوعىس ارداگەرى ماريا كۋرباتوۆانى مارتەبەلى ءجۇز جاسقا تولۋىمەن قۇتتىقتاۋ ءۇشىن ارداگەردىڭ شاڭىراعىنا ارنايى باس سۇقتى. مايدانگەرگە قورعانىس ءمينيسترىنىڭ اتىنان العىسحات تاپسىرعان پودپولكوۆنيك الماسبەك بۇحارباەۆ: «ازات ەتۋشى باتىرلارىمىز ماڭگى جادىمىزدا ساقتالادى. ال ارداگەرلەرگە قامقورلىق جاساۋ – ءار اسكەري قىزمەتشىنىڭ مىندەتى», دەدى.
ماريا دانيلوۆنا 1923 جىلى 29 قازاندا پاۆلودار وبلىسىنىڭ ۆورونتسوۆكا اۋىلىندا دۇنيەگە كەلگەن. ەكىنشى دۇنيەجۇزىلىك سوعىس كەزىندە ول كوشپەلى گوسپيتالدا جارالىلارعا كومەك كورسەتتى. 1943 جىلى مايدانعا بارار الدىندا ماسكەۋ وبلىسىنداعى مەرگەندەردى دايارلاۋ جونىندەگى نۇسقاۋشىلاردىڭ ورتالىق مەكتەبىن ۇزدىك ءبىتىردى.
اعا سەرجانت ماريا كۋرباتوۆا 138-ءشى قىزىل تۋ اتقىشتار ديۆيزياسى 650-ءشى سۋۆوروۆ وردەنى اتقىشتار پولكىنىڭ قۇرامىندا وتان قورعادى. ۋكراينا, پولشا, چەحوسلوۆاكيانى ازات ەتۋگە اتسالىستى.
سوعىس اياقتالعاندا پاۆلودارعا ورالىپ, ورتا مەكتەپتە العاشقى اسكەري دايىندىق پانىنەن ساباق بەردى. ماريا دانيلوۆنا «وتان سوعىسى», «جۋكوۆ» وردەندەرىمەن, «ەرلىگى ءۇشىن», «جاۋىنگەرلىك ەڭبەگى ءۇشىن», «گەرمانيانى جەڭگەنى ءۇشىن» مەدالدارىمەن ماراپاتتالعان. ارداگەردىڭ تۋىستارى اسكەري قىزمەتشىلەردىڭ كورسەتكەن قامقورلىعىنا ريزا بولىپ, شىن جۇرەكتەن العىسىن ءبىلدىردى.
