فوتو: اشىق دەرەككوز
قارجى ءمينيسترى ەرۇلان جاماۋباەۆ ايتقانداي, «قارىزسىز قوعام» جوباسى اياسىندا ارنايى جول كارتاسى ازىرلەنىپ, بەكىتىلگەن. ول 6 نەگىزگى باعىت بويىنشا 25 ءىس-شارانى قامتيدى.
«جول كارتاسىنىڭ ءاربىر باعىتى بويىنشا جۇمىستى ۇيلەستىرۋ ءۇشىن جەرگىلىكتى اكىمدىكتەردە جاۋاپتى لاۋازىمدى تۇلعالار تاعايىندالدى. رەسپۋبليكالىق ماڭىزى بار 3 قالادا جانە 17 وبلىستا حالىقپەن تىكەلەي جۇمىس ىستەيتىن وڭىرلىك جوبالىق كەڭسەلەر قۇرىلىپ جاتىر», دەدى مينيستر ۇكىمەت وتىرىسىندا.
ونىڭ سوزىنە قاراعاندا, بۇگىندە حالىقتىڭ شامادان تىس نەسيە الۋى وزەكتى پروبلەماعا اينالىپ ۇلگەردى. جوبالىق وفيستەردىڭ نەگىزگى مىندەتى - مەرزىمى وتكەن نەسيەلەردى رەتتەۋ, قارجىلىق الاياقتىقتان قورعاۋ, سونداي-اق, ازاماتتاردىڭ بانكروتتىق ماسەلەلەرىن شەشۋ, جۇمىسقا ورنالاستىرۋعا جاردەمدەسۋ جانە بيزنەستى قولداۋ شارالارىن ۇيىمداستىرۋ.
«جەرگىلىكتى اكىمدىكتەر جوبالىق وفيستەردىڭ جۇمىسى ءۇشىن قاجەتتى عيماراتتار مەن ماتەريالدىق-تەحنيكالىق بازالاردى بولەدى. وعان بانكتەر قارجىلىق جاعىنان كومەكتەسەتىن بولادى. جوبانىڭ تاعى ءبىر ماڭىزدى باعىتى – ازاماتتاردىڭ, وقۋشىلار مەن ستۋدەنتتەردىڭ قارجىلىق ساۋاتتىلىعىن ارتتىرۋعا ىقپال ەتەدى», دەدى ەرۇلان جاماۋباەۆ.
