كوستەنكو شاحتاسىنداعى اپات: جەر استىنان سوڭعى كەنشىنىڭ ءمايىتى تابىلدى

ونىڭ ايتۋىنشا, بۇگىنگە دەيىن ىزدەستىرۋ-قۇتقارۋ جۇمىستارى بارىسىندا 45 كەنشىنىڭ ءمايىتى, بولجامالى تۇردە 46 مارقۇمنىڭ ءمايىتى تابىلدى. قازا بولعان 40 ادامنىڭ جەكە باسى انىقتالدى, قالعان التاۋىن انىقتاۋ ءۇشىن قاجەتتى ساراپتامالار جۇرگىزىلەدى.

شاحتا جۇمىسىن قالپىنا كەلتىرۋ ءۇشىن كەن قازبالارىن تەكسەرۋ جانە جەكەلەگەن ۋچاسكەلەردە سۋدى سورۋ جۇمىستارى جۇرگىزىلىپ جاتىر.

«اپاتتىڭ سەبەپتەرىن انىقتاۋ ءۇشىن مەن جانە ۇكىمەت كوميسسياسىنىڭ مۇشەلەرى شاحتاعا تۇستىك. ءبىز وتە كوپ بۇزۋشىلىقتى انىقتادىق. 15-تەن استام وقشاۋلاعىش كوپىر قيراعان. جەلدەتۋ قۇرىلىمدارى جارامسىز», دەدى مينيستر.

قازىرگى تاڭدا جەتى شاعىن كوميسسيا قۇرىلىپ, جۇمىس ىستەپ جاتىر. ءىستى تەرگەۋگە قازاقستاننىڭ جانە الىس-جاقىن شەتەلدەردىڭ ساراپشى ۇيىمدارى دا تارتىلدى.

ەستەرىڭىزگە سالا كەتەيىك, 28 قازان كۇنى ساعات 02:33-تە قاراعاندى ​​وبلىسىنداعى «ارسەلورميتتال تەمىرتاۋ» كومپانياسىنا تيەسىلى كوستەنكو شاحتاسىندا جارىلىس بولدى. اپات كەزىندە شاحتادا 252 ادام بولعان, 205 كەنشى جەر بەتىنە شىعارىلعان.

باس پروكۋراتۋرا كوستەنكو اتىنداعى شاحتاداعى وقيعاعا قاتىستى قىلمىستىق ءىس قوزعادى. بولجام بويىنشا, لاۆادا گاز مەتانىنىڭ جارىلىسى بولعان. 

مەملەكەت باسشىسى «ارسەلورميتتال تەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىردى.

قازىر «ارسەلورميتتال تەمىرتاۋ» اق قاراستى 8 شاحتانىڭ جۇمىسى توقتاتىلدى.