فوتو: اشىق دەرەككوز
«Ashyq Syllabus» جوباسىنىڭ ماقساتى - مەدياكوممۋنيكاتسيا باعىتىندا ءبىلىم بەرەتىن جوو ستۋدەنتتەرىنىڭ الەمدىك ستاندارتتارعا ساي ءبىلىم الۋ ۇردىسىنە ادىستەمەلىك جانە اقپاراتتىق قولداۋ كورسەتۋ, سونداي-اق سالانى ودان ءارى دامىتۋعا قاجەت ماڭىزدى قادامداردى ۇسىنۋ. جوبانى تالداۋعا ەلىمىزدەگى التى جوعارى وقۋ ورىندارىنداعى جۋرناليستيكا مەكتەبىنىڭ ساراپشىلارى: ەسەنگۇل كاپقىزى, گۇلميرا اشىربەكوۆا, اسەل قامزا, مولديار ەرگەبەكوۆ, اينۇر سلامعاجى, اسحات ەركىمباي, ەلنۇر اليموۆا جانە قارلىعا مىساەۆا قاتىستى.
شارانىڭ مودەراتورى – جوبا جەتەكشىسى ەسەنگۇل كاپقىزى ءبىلىم بەرۋ باعدارلامالارىن تالداۋ قۇرىلىمى 3 كەزەڭنەن تۇرعانىن اتاپ ءوتتى. «Ashyq Syllabus جوباسى اياسىنداعى زەرتتەۋلەردىڭ مەتودولوگياسىن ازىرلەۋ, وتاندىق جانە شەتەلدىك ءبىلىم بەرۋ باعدارلامالارىنا تالداۋ جاساپ, الەۋمەتتانۋلىق زەرتتەۋ جۇرگىزۋ جانە ەكسپەرتتىك تالقىلاۋ وتكىزۋ. وسى قادامداردىڭ نەگىزىندە شەتەلدىك جوو-لاردىڭ رەيتينگى انىقتالىپ, ءادىسناماسى زەرتتەلىپ, زەرتتەۋدىڭ قورىتىندى ەسەبى دايىندالدى», دەدى ە.كاپقىزى.
جيىن بارىسىندا جوعارى وقۋ ورىندارىنىڭ وقىتۋشى-پروفەسسورلارىنا, مەديا زەرتتەۋشىلەرگە وتاندىق جانە شەتەلدىك ءبىلىم بەرۋ باعدارلامالارىن تالداۋ ناتيجەلەرى تانىستىرىلدى. ساراپشىلار 24 وتاندىق جانە 22 شەتەلدىك جوو-نىڭ ءبىلىم بەرۋ باعدارلاماسىن سارالاپ, سالىستىرمالى اناليز جاساعاندارىن ايتتى. جوبا اياسىندا جۋرناليستيكا باعىتىندا ءبىلىم بەرەتىن وتاندىق جوعارى وقۋ ورىندارىنىڭ وقىتۋشىلارى مەن ستۋدەنتتەرى اراسىندا كەشەندى الەۋمەتتانۋلىق زەرتتەۋ جۇمىسى جۇرگىزىلگەن. اتاپ ايتساق, 495 ستۋدەنتتىڭ اراسىندا ساۋالناما جانە 83 وقىتۋشىنىڭ قاتىسۋىمەن 10 فوكۋس-توپتىق پىكىرتالاس وتكىزىلدى.
جوبا ناتيجەسىندە ساندىق جانە ساپالىق دەرەكتەر جيناقتالىپ, ەلىمىزدەگى جۋرناليست ماماندىعىن وقىتۋداعى نەگىزگى پروبلەمالار انىقتالىپ, ءبىلىم بەرۋ باعدارلامالارىنىڭ ۇلگىلەرى ازىرلەندى. شارا سوڭىندا قاتىسۋشىلار جوبا تۋرالى پىكىر ءبىلدىرىپ, وقۋ ورىندارىنداعى تەوريالىق جانە پراكتيكالىق پاندەردىڭ ۇلەسى, مىندەتتى وقىتىلاتىن كرەديت سانى, تاڭداۋ كومپونەنتتەرى جانە پاندەر اتاۋىنىڭ ءبىرىزدى بولۋى تۋرالى بىرقاتار ۇسىنىس ايتتى. تالقىلاۋدى مادەنيەت جانە اقپارات مينيسترلىگى مەن قازاقستان قوعامدىق دامۋ ينستيتۋتىنىڭ «MediaLab» ورتالىعى ۇيىمداستىردى.
