تايپاق – ەجەلدەن الەمگە ايگىلى سپورتشىلار كوپ شىققان ءوڭىر. سامبودان ءتورت دۇركىن الەم چەمپيونى ەربولات بايباتىروۆ, گرەپپلينگتەن حالىقارالىق دارەجەدەگى سپورت شەبەرى, الەم چەمپيونى زايرەدەن مۇحامبەتجانوۆ, قول كۇرەسىنەن قازاقستان سپورت شەبەرى, جاستار اراسىندا الەم چەمپيونى كەنجەقىز قاۋپەنوۆا, بوكستان ازيا چەمپيوناتىنىڭ كۇمىس جۇلدەگەرى دانيال ءسابيت, قول كۇرەسىنەن ازيا كۋبوگىنىڭ جەڭىمپازى ءىزباسار نۇربول, الەم چەمپيوناتىنىڭ كۇمىس جۇلدەگەرى بولاتبەك رايىمقۇلوۆ, سامبودان الەم چەمپيوناتىنىڭ جۇلدەگەرى باعدات جارىلعاسوۆ, سامبودان جاستار اراسىندا الەم چەمپيوناتىنىڭ كۇمىس جۇلدەگەرى ارمات قابدولوۆ ت.ب. مايتالماندار شىققان وڭىردە اشىلعان سۋ جاڭا 160 ورىندىق دەنەشىنىقتىرۋ-ساۋىقتىرۋ كەشەنى «قاراشىعاناق پەتروليۋم وپەرەيتينگ ب.ۆ» كومپانياسى ەسەبىنەن بولىنگەن قاراجاتقا تۇرعىزىلعان.
– مەملەكەت باسشىسىنىڭ تاپسىرماسىن ورىنداۋ اياسىندا وبلىستا 11 دەنەشىنىقتىرۋ-ساۋىقتىرۋ كەشەنى قولدانىسقا بەرىلسە, بۇگىن سۋ جاڭا عيمارات تايپاق
اۋىلىندا اشىلىپ وتىر. ەندى جاس سپورتشىلار زاماناۋي سپورت كەشەنىندە جاتتىعىپ, كاسىبي شەبەرلىگىن شىڭداپ, الەمدىك سايىستاردا جوعارى جەتىستىككە قول جەتكىزىپ, ەل ءۇمىتىن اقتايدى دەپ سەنەمىز. جاڭا سپورتتىق نىسان ەل اتىن ءماشھۇر ەتكەن اعا بۋىن سپورتشىلار سالىپ كەتكەن سارا جولدى جالعار چەمپيوندار ۇستاحاناسىنا اينالسىن, – دەدى كەشەننىڭ اشىلۋىنا ارنايى قاتىسقان باتىس قازاقستان وبلىسىنىڭ اكىمى ناريمان تورەعاليەۆ.
ال اقجايىق اۋدانىنىڭ ورتالىعى چاپاەۆ اۋىلىندا اشىلعان سپورت كەشەنى 320 ادامعا ارنالعان. كەشەننىڭ ءبىرىنشى قاباتىندا اۋىر اتلەتيكا بولمەسى, بوكس رينگى, ارباداعى مۇگەدەكتەرگە ارنالعان ورىندار بولسا, ەكىنشى قاباتىندا كۇرەس زالى مەن دويبى, شاحمات, توعىزقۇمالاق وينايتىن بولمە بار. سپورتتىق نىساندا حالىقتىڭ سپورتپەن شۇعىلدانۋى ءۇشىن بارلىق جاعداي جاسالعان. ءوڭىر باسشىسى «سپورت كەشەنى ءار تۇرعىن ءۇشىن قولجەتىمدى بولادى» دەپ مالىمدەدى.
باتىس قازاقستان وبلىسى
