فوتو: اشىق دەرەككوز
اناسىنىڭ ۆيدەوۇندەۋى Kozachkov offside پاراقشاسىنا جاريالانعان.
«قىلمىسكەر ءالى تابىلمادى. سەبەبى نە؟ تەرگەۋ جۇمىسىنىڭ ناشارلىعى ما, الدە حالىقارالىق مەكتەپ ەلىمىزدىڭ زاڭىنا باعىنباي ما؟», دەپ مۇڭىن جەتكىزدى بالانىڭ اناسى.
ول بۇل ۆيدەونى ءتۇسىرىپ, ىشكى ىستەر ءمينيسترى ەرجان سادەنوۆ پەن باس پروكۋرور بەرىك اسىلوۆقا حابارلاسىپ جاتقانىن, سەبەبى مەملەكەتتىك ورگاندارعا جولداعان رەسمي ساۋالدارىنا ءالى جاۋاپ الماعانىن دا ايتتى.
«بالالار زارداپ شەكپەۋى ءۇشىن قىلمىسكەردى مەن تابۋىم كەرەك پە؟ مەن قاراپايىم قازاق ايەلىمىن, مەنىڭ ەشقانداي «تانىستارىم» جوق. شىنىمەن دە ءادىل تەرگەۋدەن باس تارتا ما؟ نەلىكتەن قىلمىسكەردىڭ بوستاندىقتا جۇرگەنىنە ەشكىم الاڭدامايدى؟», دەدى ايەل.
الماتى پوليتسيا دەپارتامەنتىنىڭ ءباسپاسوز قىزمەتى اتالعان فاكتى بويىنشا قىلمىستىق ءىستى تەرگەۋ باسقارماسى قىلمىستىق كودەكستىڭ 121-بابى, 3-1-بولىگى «سەكسۋالدى سيپاتتاعى زورلىق-زومبىلىق ارەكەتتەرى» بويىنشا تەرگەپ جاتقانىن مالىمدەدى.
«كوميسسيا سوت-مەديتسينالىق ساراپتاما جۇرگىزدى. ونىڭ قورىتىندىسى الىندى. سونىمەن بىرگە ءىستىڭ وبەكتيۆتى ءمان-جايىن انىقتاۋ ماقساتىندا تەرگەۋ ساراپشىلارعا قوسىمشا ساراپتاما تاعايىندادى. ول ازىرگە ازاماتشا پ.-نىڭ ۇلىن ساراپتامادان وتكىزۋگە ق ۇلىقسىزدىعىنان مۇمكىن بولمادى», دەلىنگەن قالالىق پد ءباسپاسوز قىزمەتى تاراتقان حابارلامادا.
سوتقا دەيىنگى تەرگەپ-تەكسەرۋ قر ىشكى ىستەر مينيسترلىگى مەن پوليتسيا دەپارتامەنتى باسشىلىعىنىڭ باقىلاۋىندا ەكەنى ايتىلدى.
