«قۇرمەتتى قاسىم-جومارت كەمەل ۇلى! كەشەگى كۇندەرى اتامىز «قارنىمنىڭ اشقانىنا ەمەس, قادىرىمنىڭ قاشقانىنا ناليمىن» دەپ ايتقان ەكەن. مىنەكەي, سونى ءسىز ەسكەرىپ, قالام ۇستاعان ءبىز سياقتى ءبىر توپ جازۋشىنىڭ قادىرىن كوتەرىپ وتىرسىز. سوندىقتان دا سىزگە دەگەن العىسىمىز - الابوتەن!
وسىدان بىرنەشە كۇن بۇرىن ءسىز قىتايدا قىتايشا سويلەپ, بۇكىل قىتايدى تاڭ قالدىرىپ ەدىڭىز. ال ەندىگى جەردە ءسىز باسقارىپ وتىرعان قازاقستان بۇكىل الەمدى تاڭ قالدىراتىن كۇنگە دە جەتكەيمىز!», دەدى سامعۇل ەلۋباي ماراپاتتاۋ ءراسىمى بارىسىندا.
Egemen.kz سايتىنىڭ تىلشىسىنە بەرگەن شاعىن سۇحباتىندا سماعۇل ەلۋباي كەڭەس وداعى وكىمەتى كەزەڭىندەگى جازۋشىلارعا بەرگەن قالاماقى مەن قازىرگى قالاماقىنى سالىستىرىپ, ءوزىنىڭ پىكىرىن ءبىلدىردى.
- «حالىق جازۋشىسى» دەگەن ماراپاتقا كەلەتىن بولساق, تالانتتى جازۋشىلار تولەن ابدىك, بەكسۇلتان نۇرجەكە, سوفى سماتاەۆ, احمەتجان اشيروۆ, ليۋبوۆ شاشكوۆا قارىنداسىمىزعا بەرىلدى. بۇل جەردە قۇرىلتاي, جازۋشىلار وداعى, جانە وزگە دە قازاقستانداعى بەدەلدى ۇيىمدار ۇسىنعان كانديداتتار بولدى. جازۋشىلارعا كەلەتىن بولساق, باعانا اتاپ وتكەندەي «قارنىمنىڭ اشقانىنا ەمەس, قادىرىمنىڭ قاشقانىنا ناليمىن» دەگەن ۇعىم تۋرا وسى جازۋشىلاردىڭ باسىندا بار جاعداي. ويتكەنى, ءبىز كەڭەس وداعى قۇلاعاننان كەيىن بوركىمىزدى اسپانعا لاقتىرىپ, ولگەنىمىز تىرىلگەندەي بولىپ, وشكەنىمىز جانعانداي بولىپ قۋاندىق. بىراق سول سوۆەت وكىمەتى قۇلاعاننان كەيىن قاتتى قۋانعان جانە ەلدىڭ ءسوزى بولعان جازۋشىلار تاياق جەدى. ولار قالاماقى دەگەندى ۇمىتتى, ءبىز دە ۇمىتتىق. قازىر قالاماقى بەرەمىز دەسە ءبىز تاڭ قالامىز. مىنەكەي, وسىنداي جاعدايدا جازۋشىنىڭ قادىرى قالاي بولسىن. ءتىپتى حالىقتىڭ الدىنا تۇرماق, ءوزىنىڭ ۇيىندە قادىرى بولمايدى. ۇيگە تابىس الىپ كەلمەيتىن وتاعاسىنىڭ قادىرى ەشقاشان, ەش جەردە بولعان ەمەس. جازۋشىلاردىڭ ادال تابىسىنا ادال قالاماقى تولەۋ سوۆەت زامانىندا وتە ۇلكەن دارەجەدە بولدى. مىسالى, ءبىزدىڭ جاسىمىزعا كەلگەن جازۋشىلار 4 تومدىق تاڭدامالى شىعارما شىعاراتىن بولسا, ءومىرىنىڭ سوڭعى اسۋلارىنا دەيىن ەسەپتەسەڭ ون پاتەر ساتىپ الاتىنداي قالاماقىعا يە بولعان ەكەن. ول نارسەنى كوزىمىز كوردى عوي. ال ەندى سول قىرۋار قالاماقى بۇگىنگى قالامگەرلەردىڭ كوزىنەن بۇلبۇل ۇشتى دەپ ايتۋعا بولادى», دەپ ءبولىستى سماعۇل ەلۋباي.
