بىلتىر جازدا مەدەت اقىلبەك ۇلى بوتاقارا كەنتىنە جاقىن جەردەگى وزەننەن ەكى ادامدى قۇتقارىپ قالعان. روستوۆكا اۋىلىنىڭ ۋچاسكەلىك پوليتسيا ينسپەكتورى باتىرحان سەيدىعاليەۆ مەدەتكە حابارلاسىپ, كومەك سۇراعان. مەدەت وزەنگە جەدەل جەتىپ, سۋعا سۇڭگىگەن. الگىندەگى ارىپتەسى دە ەكى كەلىنشەكتى قۇتقارماقشى بولعان ەكەن, بىراق ابدىراپ قالسا كەرەك, ول دا سۋ ورتاسىندا قالعان. ءتارتىپ ساقشىسى اۋەلى ارىپتەسىنە قول سوزادى. ودان كەيىن ارىپتەسى ەكەۋى سۋعا باتىپ بارا جاتقان ەكى كەلىنشەكتى جاعاعا الىپ شىعادى.
– قۇربىم تەرەڭ جاققا قاراي ءجۇزىپ كەتىپ, سۋعا باتا باستادى. مەن كوپ ويلانباي قۇتقارۋ ءۇشىن سوڭىنان جۇزە بەردىم. ءبىر مەزەتتە مەن دە باتا باستادىم. ءبىزدى قۇتقارماقشى بولعان باتىرحان ەسىمدى پوليتسيا قىزمەتكەرى دە سۋ ءيىرىمى قاتتى بولعاندىقتان, سۋعا تۇنشىعا باستادى. سول ساتتە مەدەت اقىلبەك ۇلى جەدەل جەتىپ كەلدى دە, ۇشەۋىمىزدى قۇتقاردى. ەرلىگىنە باس يەمىز. سويتسەك, ءبىز باتقان جەرگە شومىلۋعا بولمايدى ەكەن. ءداپ سول جەردە سۋدىڭ كوزى بار دەيدى. ايتەۋىر, مەدەت ەسىمدى پوليتسەيدى قۇداي جىبەرىپ, امان قالدىق. كەيىننەن مەدەتتىڭ ۇنەمى وسىنداي ەرلىككە بارىپ جۇرەتىن ينسپەكتور ەكەنىن بىلدىك, – دەيدى ينگا كوشەربەكوۆا.
تىلەگەن ەسىمدى اۋىل تۇرعىنى قاس قارايعان شاقتا جۇمىسىنان ۇيىنە بارا جاتىپ, جاقىندا عانا العان جاڭا كولىگىمەن اۋدارىلادى. كولىك جۇرگىزۋشىسى شوشىنىپ قالعان بولۋ كەرەك, ەسىك اشۋعا قاۋقارى بولمايدى. ابىروي بولعاندا, مۇنى جول ۇستىندە كەلە جاتقان مەدەت اسقاروۆ بايقاپ قالادى.
– اۋا رايى قولايسىزدىعىنا بايلانىستى ازداعان بوران, كوكتايعاق ەدى. رولگە يە بولا الماي, كولىكتى اۋدارىپ الدىق. كولىگىمىز ءارى-بەرى لاقتىرا باستادى. ەكى رەت اۋدارىلىپ تۇستىك. ەسىمنەن تانىپ قالىپپىن. كوك ءتۇتىننىڭ ءيىسى شىعا باستادى. ەندى بىردە كولىگىمنىڭ ىشىندە قاۋىپسىزدىك بەلدىگىن بوساتا الماي جاتقان كەزدە مەدەت كەلىپ, اۋەلى قاسىمداعى جولاۋشىنى قۇتقارىپ, سىرتقا شىعاردى. قۇداي ساقتاسىن, مەدەت بولماعاندا كولىگىمىز ورتەنىپ, سونىڭ ىشىندە قالىپ قويار ما ەدىك. ءتارتىپ ساقشىسىنا العىسىم شەكسىز, – دەيدى بوتاقارا كەنتىنىڭ تۇرعىنى تىلەگەن ساكەنوۆ.
2018 جىلى بوتاقارا كەنتىندەگى كوپقاباتتى ءۇيدىڭ بىرىنەن ءورت شىعادى. سول جولى قاھارمان پوليتسەي بەس بالانى قىزىل جالىنعا ورانعان ۇيدەن سىرتقا امان الىپ شىعادى. ء«بىر ايەل ومىراۋداعى بالاسىمەن دالاعا شىعىپ قۇلاپ, كومەك سۇرادى. ول «بالالارىمدى قۇتقار, ۇيدە ءورت بولىپ جاتىر, قارا ءتۇتىن الىپ كەتتى», دەدى. ۇيىنە جۇگىرىپ كىرىپ, ەڭبەكتەپ الىپ ىزدەدىم. قولىما اياعى ىلىككەن بالالاردى سىرتقا شىعارىپ وتىردىم. ايەلىم دە قاسىمدا ەدى. ول جەدەل جاردەم شاقىردى», دەيدى ءتارتىپ ساقشىسى.
مەدەت اقىلبەك ۇلىنىڭ ەلگە ادال قىزمەت ەتۋگە انت قابىلداعانىنا 16 جىلدان اسىپتى. وسى ۋاقىت ارالىعىندا ىشكى ىستەر سالاسىنداعى ءتۇرلى قىزمەتتى اتقارادى. قاي قىزمەتتە جۇرسە دە ابىرويلى بولعان ازاماتتىڭ بار ويلاعانى – ەلدىڭ قۇقىعىن قورعاۋ. ەكىنشى ءبىر مىندەتى – ەلدىڭ اماندىعى ءۇشىن وتقا دا, سۋعا دا ءتۇسۋ.
جوعارىداعى ەرلىكتەرى ەسكەرىلىپ پوليتسيا قىزمەتكەرى مينيسترلىكتىڭ «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن ناگرادتالدى. مەملەكەت باسشىسىنىڭ جارلىعىمەن قىزمەتتىك بورىشىن اتقارۋ كەزىندە كورسەتكەن باتىلدىعى مەن جانقيارلىعى ءۇشىن II دارەجەلى «ايبىن» وردەنىن كەۋدەسىنە تاقتى. ءبىر ايتا كەتەرلىگى مەدەتتىڭ بارلىق باۋىرى قۇقىق قورعاۋ سالاسىندا ەڭبەك ەتەدى. شاڭىراعىنداعى ەكى ۇلى دا اكەسى سەكىلدى ەلدىڭ العىسىن الاتىن پوليتسەي بولۋدى ارماندايدى.
قاراعاندى وبلىسى,
بۇقار جىراۋ اۋدانى
