فوتو: اقوردا
– ەلىمىزدە بارلىق بالانى پروفيلاكتيكالىق مەديتسينالىق تەكسەرۋدەن وتكىزۋ ءىسى جولعا قويىلعان. ءاربىر ءىرى ەلدى مەكەندە جاستاردىڭ دەنساۋلىق ورتالىقتارى جۇمىس ىستەيدى دەۋگە بولادى. جىل سايىن ءۇش ميلليونعا جۋىق ەرەسەك ادام سكرينينگ جانە كاسىبي تەكسەرۋ باعدارلاماسىنان وتەدى. اۋىل تۇرعىندارىنىڭ مەديتسينالىق قىزمەت الۋىنا بىردەي مۇمكىندىك جاساۋ ءۇشىن ءبىز بىرقاتار رەفورما جۇرگىزدىك. ناتيجەسىندە, 2018 جىلدان باستاپ اۋىلدارداعى العاشقى كومەك كورسەتۋ پۋنكتتەرىنىڭ سانى 3 ەسەدەن استام كوبەيدى. سونىمەن قاتار تەلەمەديتسينا جانە قاشىقتان مونيتورينگ جاساۋ سياقتى تسيفرلىق تەحنولوگيالار بەلسەندى تۇردە ەنگىزىلىپ جاتىر. بۇل العاشقى مەديتسينالىق كومەكتىڭ قولجەتىمدىلىگىن ايتارلىقتاي ارتتىرادى, – دەدى مەملەكەت باسشىسى.
ءسوز سوڭىندا پرەزيدەنت دۇنيەجۇزىلىك دەنساۋلىق ساقتاۋ ۇيىمىنىڭ قولداۋىمەن مەملەكەتتەردىڭ مەديتسينالىق-سانيتاريالىق العاشقى كومەك جونىندەگى كواليتسياسىن قۇرۋدى ۇسىندى. بۇل بىرلەستىك دەنساۋلىق ساقتاۋ جانە اۋرۋدىڭ الدىن الۋ قاعيداتتارىن ودان ءارى ىلگەرىلەتۋگە, مەديتسينالىق-سانيتارلىق العاشقى كومەكتى دامىتۋ جونىندەگى بىرلەسكەن ۇسىنىمدار ازىرلەۋگە مۇمكىندىك بەرەدى.
قاسىم-جومارت توقاەۆ مەديتسينالىق-سانيتاريالىق العاشقى كومەك كورسەتۋ سالاسىن, جالپى دەنساۋلىق ساقتاۋ جۇيەسىن ودان ءارى دامىتۋدا جاستارعا زور سەنىم ارتاتىنىن اتاپ ءوتتى.
مەملەكەت باسشىسى جاستارمەن كەزدەسكەن سايىن سپورتپەن شۇعىلدانۋدىڭ ماڭىزدىلىعى تۋرالى ايتاتىنىن ەسكە سالىپ, ولاردى ەڭبەكقور جانە ماقساتتارىنا ادال بولۋعا شاقىردى.
