فوتو: اقوردا
مەملەكەت باسشىسى كونفەرەنتسيا قاتىسۋشىلارىنا ءىلتيپات بىلدىرە وتىرىپ, دەنساۋلىق ساقتاۋ جانە مەديتسينالىق-سانيتاريالىق العاشقى كومەك كورسەتۋدىڭ حالىقارالىق جۇيەسىن جەتىلدىرۋ ىسىندە الماتى جانە استانا دەكلاراتسيالارىنىڭ ماڭىزى زور ەكەنىن اتاپ ءوتتى.
«وسىدان 45 جىل بۇرىن مەديتسينالىق-سانيتاريالىق العاشقى كومەكتىڭ الەۋمەتتىك تۇرعىدا ادىلەتتى مودەلىنە نەگىز بولعان الماتى دەكلاراتسياسى قابىلداندى. بۇل دەكلاراتسيا الەمدىك دەنساۋلىق ساقتاۋدىڭ ۇلى حارتياسىنا اينالىپ, كوپتەگەن ەلدىڭ حالىق دەنساۋلىعىن جاقسارتۋ ءۇشىن شارا قابىلداۋىنا, ونى ادامنىڭ ىرگەلى قۇقىعى رەتىندە مويىنداۋىنا تۇرتكى بولدى. الماتى دەكلاراتسياسى ءبىراز ەلدە انا مەن بالا ءولىمىنىڭ دەڭگەيىن جۇيەلى تۇردە تومەندەتۋ, بولجامدى ءومىر ءسۇرۋ جاسىن ۇزارتۋ ءۇشىن شەشۋشى ءرول اتقاردى. بۇگىندە كوپتەگەن ەلدە ۇلتتىق دەنساۋلىق ساقتاۋ جۇيەسى جولعا قويىلعان. وندا مەديتسينالىق-سانيتاريالىق العاشقى كومەككە ايرىقشا ءمان بەرىلەدى. بۇل بەس جىل بۇرىن قول قويىلعان استانا دەكلاراتسياسىندا ناقتىلانادى», دەدى پرەزيدەنت.
قاسىم-جومارت توقاەۆتىڭ ايتۋىنشا, مساك جۇيەسى ەپيدەميانىڭ العاشقى بەلگىلەرىن انىقتاۋ جانە توسىن سىن-قاتەرلەرگە قارسى ارەكەت ەتۋ ىسىندە ماڭىزدى ءرول اتقارادى
مەملەكەت باسشىسى قوعامدىق دەنساۋلىق ساقتاۋ ۇيىمدارى وزدەرىنىڭ ورنىقتىلىعىن جانە تۋىنداعان جاعدايعا تەز بەيىمدەلە الاتىنىن كورسەتكەنىنە نازار اۋداردى.
سونداي-اق پرەزيدەنت ادامزاتتىڭ COVID پاندەمياسىن ەڭسەرۋىنە ۇلەس قوسقانى ءۇشىن بارلىق مەديتسينا قىزمەتكەرىنە العىس ايتتى.
قاسىم-جومارت توقاەۆتىڭ پىكىرىنشە, بارلىق ىقتيمال قاۋىپ-قاتەردى ەسكەرە وتىرىپ, دەنساۋلىق ساقتاۋ جۇيەسى كەز كەلگەن كۇردەلى جاعدايعا ءاردايىم دايىن بولۋى ءۇشىن وعان قولداۋ كورسەتۋ كەرەك. اۋرۋ-سىرقاۋدىڭ بەلگىلەرىن باستاپقى كەزەڭىندە انىقتاۋ جانە توسىن سىن-قاتەرلەرگە دەر كەزىندە نازار اۋدارۋ ءۇشىن الەۋەتتى ارتتىرا بەرۋ قاجەت.
