پاۆلودار قالاسىنداعى ترامۆاي جولدارىنىڭ جالپى ۇزىندىعى بۇگىندە 90 شاقىرىمدى قۇرايدى. كولىك كاسىپورنىنىڭ يەلىگىندەگى 111 ۆاگون جولاۋشىلارعا ۇزبەي قىزمەت كورسەتىپ, ۇيىم ەندىگى ارادا جاڭا باعىتتاردى اشۋعا تالپىنىپ وتىر.
شاھاردىڭ وڭتۇستىك-باتىس بولىگىندە جاڭادان سالىنىپ جاتقان «دوستىق» شاعىن اۋدانىنا كەلەر جىلى ترامۆاي كولىكتەرى قاتىناي باستاۋى مۇمكىن. بۇل ءۇشىن اۋماققا ەلەكترلى بايلانىس جەلىلەرىن ۇستاپ تۇراتىن بەتون باعاندار سالۋدىڭ قاجەتتىلىگى جوق كورىنەدى. ترامۆاي پاركىنىڭ حابارلاۋىنشا, اتالعان باعىتتا اۆتونومدى تۇردە جۇمىس ىستەيتىن ۆاگوندار جولعا شىعادى.
رەلستى كولىكتىڭ جاڭا تارماعى نازارباەۆ داڭعىلىنان جەو جولى ارقىلى قوزعالىپ, لادوجسكايا كوشەسىن باسىپ وتەدى. ۆاگونداردىڭ جالپى اراقاشىقتىعى 7 مينۋتتى قۇراماق. ترامۆاي جولىن ۇزارتۋ جوباسى شامامەن 2 ملرد تەڭگەگە باعالانىپ وتىر. «ترامۆاي باسقارماسى» اق باسقارما توراعاسى مۋسليم ماحمۋدوۆتىڭ ايتۋىنشا, جاڭا تارماقتىڭ قۇرىلىسى كەلەر جىلى باستالۋى مۇمكىن. ول نەبارى 9 ايعا سوزىلادى دەپ جوسپارلانعان. بارلىعى ءساتتى جۇزەگە اسسا, جاڭا باعىتتاعى رەلستى جول قالا بيلىگىنىڭ يەلىگىنە بەرىلەدى.
«دوستىق» شاعىن اۋدانىنا جولاۋشىلاردى جەتكىزۋ ءۇشىن جاڭادان اۆتونومدى تۇردە جۇمىس ىستەيتىن 20 ترامۆاي ساتىپ الۋ كوزدەلگەن. ترامۆايلار قۋاتتالعان اككۋمۋلياتوردىڭ كومەگىمەن جىلجيتىن بولادى. ەلەكتر باعاندارى مەن سىمداردىڭ قاجەتى جوق. مۇنداي اۆتونومدى ترامۆايلاردى ىسكە قوسۋ شاھارداعى كەلەشەگى زور جاڭا جەلىلەردى ومىرشەڭ ەتۋگە مۇمكىندىك بەرەدى. مىسال ءۇشىن, ەكىنشى پاۆلودار مەن ۋسولكا شاعىن اۋداندارىندا جاڭا تارماقتار پايدا بولۋى عاجاپ ەمەس. ەگەر كوزدەلىپ وتىرعان جوبادان قارجى ۇنەمدەلسە, جاڭا تارماقتار سالىنادى» دەپ جازىلعان باسقارمانىڭ حابارلاماسىندا.
ەكىنشى پاۆلودار شاعىن اۋدانىندا ترامۆاي جۇرگىزۋ – كوپتەن بەرى قوزعالىپ كەلە جاتقان ماسەلە. سەبەبى بۇل اۋماقتاعى تۇرعىندار اۆتوبۋس مارشرۋتتارىنىڭ ازدىعىنا جانە ولاردىڭ مەجەلى ۋاقىتىنان كوپ كەشىگەتىنىنە ءجيى شاعىمدانادى. اسىرەسە قىس مەزگىلىندە پروبلەما كوپ تۋىندايدى. ەگەر ترامۆاي تارماعى سالىنسا, جولاۋشىلاردىڭ ءجۇرىپ-تۇرۋى جەڭىلدەي تۇسەر ەدى. قازىرگى كۇنى نازارباەۆ داڭعىلى, ەستاي, مالايسارى كوشەلەرى ارقىلى شاعىن اۋدانعا جاڭا رەلستى جول سالۋ كوزدەلىپ تە وتىر. جاڭا تارماق روسسيسكايا كوشەسى ارقىلى اينالىپ, نۇرماعامبەتوۆ كوشەسىنە تۇسەدى دە, تەمىرجول ۆوكزالىنا كەلەدى. وسىلايشا, قالانىڭ شىعىس اۋماعىندا رەلستى جولدىڭ تولىق تسيكلى پايدا بولۋى مۇمكىن. جوبالاۋشىلار بۇعان بالاما رەتىندە گەرينگ جانە سۇراعانوۆ كوشەلەرىن دە ۇسىنادى. قالا بيلىگى بۇل ەكى جوبانىڭ قايسىسى قارجى جاعىنان ءتيىمدى بولادى دەپ ويلانىپ وتىرعانداي.
ەلىمىز بويىنشا ترامۆاي ساناۋلى عانا شاھاردا ساقتالىپ قالعان. مەملەكەت باسشىسى قاسىم-جومارت توقاەۆ بىلتىر وڭىرىمىزگە جۇمىس ساپارىمەن كەلگەندە پاۆلودار قالاسىنداعى ترامۆاي جۇيەسىن دامىتۋدى جالعاستىرىپ, قۇرامداردى جاڭارتۋدى جەدەلدەتۋ قاجەتتىگىن تاپسىرعان ەدى. «مەنىڭشە, پاۆلوداردا ترامۆايدى ساقتاپ قالۋ قاجەت. ەگەر قاجەت بولسا, جولداردى جاڭعىرتىپ, جاڭا, دىبىسسىز, ترامۆايلار ساتىپ الۋ كەرەك شىعار. بىراق ترامۆاي – وزىنشە تارتىمدى كولىك ءتۇرى. ەۋروپانىڭ كوپتەگەن دامىعان قالاسىندا ترامۆايلار كەدەرگىسىز جۇرەدى. بۇل – جەرگىلىكتى تۇرعىندار ۇناتاتىن ەكولوگيالىق جانە ىڭعايلى كولىك. ترامۆاي جۇيەسىن دامىتۋدى جالعاستىرىپ, قۇرامداردى جاڭارتۋدى جەدەلدەتۋ كەرەك», دەگەن ەدى پرەزيدەنت.
ترامۆاي پاركى الداعى ۋاقىتتا جاڭا جول تارماقتارىمەن قوسا, جاڭادان 70 ترامۆاي ساتىپ الۋدى جوسپارعا ەنگىزدى.
پاۆلودار
