كوللاجدى جاساعان – زاۋرەش سماعۇل, «EQ»
تسەنترالنايا كوشەسى, №6 ءۇيدىڭ اپاتتىق جاعدايى تۋرالى پاتەر يەلەرى جىل ورتاسىنان بەرى دابىل قاعىپ, توتەنشە جاعداي قىزمەتى مەن جەرگىلىكتى بيلىك ارنايى كوميسسيا قۇرۋىن سۇراعان. باقساق, بۇل ماسەلە تەك اتالعان باسپاناعا عانا قاتىستى ەمەس ەكەن. ءدال سونداي جوبالىق تەحنولوگيامەن سالىنعان №2 جانە №8 كوپقاباتتى ۇيلەر دە (سول كوشەدە ورنالاسقان) الدىنعىسىنىڭ كەبىن كيگەلى تۇر. جەرگىلىكتى اكىمدىك دەرەۋ كوميسسيا قۇرىپ, ارنايى قۇرىلىس ۇيىمى ساراپتاما جۇرگىزدى. ماماندار №6 ءۇيدىڭ بەتون پليتالارى تىگىسىنەن اجىراپ, ءۇيدىڭ قۇرىلىسىنا ۇلكەن نۇقسان كەلگەن دەگەن شەشىم شىعاردى. ەڭ اۋەلى بۇل باسپانانىڭ جان-جاعىنا مەتالل تىرەكتەر قويىپ, قۇرساۋلاپ تاستايمىز دەپ ارەكەتتەنگەن. الايدا نىسان جوندەۋ جۇرگىزىپ جاتقان ۋاقىتتا قۇلاپ كەتۋى مۇمكىن ەكەن. سوندىقتان ءۇيدى ءبىرجولا بۇزۋ تۋرالى شەشىمگە كەلدى. پاۆلودار قالالىق توتەنشە جاعدايلار باسقارماسى باستىعىنىڭ مىندەتىن اتقارۋشى تىلەكجان گالياموۆتىڭ ايتۋىنشا, ءۇي ايتارلىقتاي ەسكى ەمەس, 1989 جىلى سالىنىپتى. قۇرىلىس نورمالارى دۇرىس ساقتالماعاندىقتان وسىنداي جاعدايعا جەتكەن.
«تسەنترالنايا كوشەسى, 6-ءۇيدىڭ, شىن مانىندە, توبەسى مەن ىرگەسى قۇلاعالى تۇرعانىن كورىپ وتىرمىز. ال جانىنداعى وزگە ەكى ۇيدە سونشالىقتى كۇردەلى احۋال بايقالمايدى. مۇنداعى 24 پاتەردە 80 ادام تۇرىپ جاتسا, ونىڭ تورتەۋى – بالالار. تۇرعىنداردىڭ ءبىراز بولىگى پاتەرلەردى يپوتەكاعا العان. ازىرشە ءبىز ازاماتتارعا جالدامالى پاتەرلەردى ۇسىنىپ وتىرمىز. اپاتتىق جاعدايدا تۇرعان باسپانانىڭ ورنى اۋەلى مەملەكەت قاجەتتىلىگىنە الىنۋعا ءتيىس. بۇل پروتسەدۋرا اياقتالعانشا تۇرعىندار ۋاقىتشا جالدانعان ۇيلەردە تۇرادى. بۇل جەردەگى شاعىن اۋداندى قايتا سالۋ بويىنشا بىرنەشە نۇسقا قاراستىرىلىپ جاتىر. اپات الدىندا تۇرعان قوس ءۇيدىڭ دە ماسەلەسى جاقىن ۋاقىتتا شەشىلۋى كەرەك», دەيدى پاۆلودار قالاسى اكىمىنىڭ ورىنباسارى سۆەتلانا گلادىشەۆا.
اكىمدىكتەگىلەردىڭ سوزىنە سۇيەنسەك, مەملەكەت مەنشىگىنە الىناتىن جەر تەلىمىنە (اپاتتىق ءۇي ورنالاسقان جەر) بولاشاقتا مەكتەپ, بالاباقشا نەمەسە مەديتسينالىق مەكەمە سالىنۋى مۇمكىن. بۇل ءۇشىن ەڭ اۋەلى ناقتى جوسپارلاۋ ازىرلەنۋى كەرەك. وعان شامامەن 6-9 اي ۋاقىت جۇمسالادى. جەر مەملەكەت مەنشىگىنە الىنعان ساتتەن باستاپ قازىرگى كۇنى جالدامالى پاتەرلەرگە كوشىرىلىپ جاتقان ءۇي يەلەرىنە تۇراقتى پاتەرلەر ساتىپ اپەرىلەدى دەپ ۋادە ەتىلىپ وتىر. بولماسا پاتەردىڭ نارىقتىق قۇنى بويىنشا اقشالاي وتەماقى تولەنەدى. بۇل ادامدار ورنىنان ءسۇرىلىپ تاستالعان اليۋميني قالاشىعىنداعى نەمەسە اپاتتىق ۇيلەردە تۇرعان كوپشىلىكپەن بىرگە كەزەكتە تۇرمايتىنى دا بەلگىلى بولدى. توتەنشە جاعدايعا جاتاتىندىقتان جانە جەر مەملەكەت مەنشىگىنە الىناتىندىقتان بارلىق كومەك كەزەكتەن تىس كورسەتىلەدى.
تۇرعىن ءۇي قاتىناستارى ءبولىمىنىڭ باسشىسى كەنجەگۇل جولجاقسىنوۆا ۋاقىتشا جالعا الىناتىن پاتەرلەردىڭ ارەندالىق اقىسىن قالا بيۋدجەتى كوتەرەتىنىن ايتادى. جىل سوڭىنا دەيىن بۇل ماقساتقا 15 ملن تەڭگە بولىنگەن. جالعا تولەنەتىن اقشا تۇرعىندارعا بەرىلمەيدى, پاتەرلەردى كونكۋرس ارقىلى ۇسىنىپ وتىرعان فيرمالاردىڭ ەسەپشوتىنا تىكەلەي اۋدارىلماق. ازىرشە اپاتتىق ۇيدەن بەس وتباسى عانا جالدامالى پاتەرلەرگە كوشكەن. ماماندار قونىس اۋدارۋ ماسەلەسىن جەدەلدەتۋ كەرەك ەكەنىن ەسكەرتىپ وتىر.
پاۆلودار
