بۇل ءتۋرنيردىڭ ەرەكشەلىگى قاتىسۋشىلار جاس ەرەكشەلىگىنە قاراي بولىنبەيدى ەكەن. ىرىكتەۋدەن وتكەن كەز كەلگەن ويىنشى تۋرنيردە باعىن سىنايدى.
– شاحمات – قاراپايىم عانا سپورت ءتۇرى ەمەس, بۇل ۇلتتىڭ زياتكەرلىك دەڭگەيىن كوتەرەتىن ۇلكەن قۇرال. كەيىنگى جىلدارى شاحماتشىلارىمىز حالىقارالىق دەڭگەيدە ۇلكەن جەتىستىكتەرگە جەتىپ ءجۇر. دەگەنمەن ءبىز ەلىمىزدىڭ الىس اۋداندارى مەن وڭىرلەرىنە دە كوڭىل بولگىمىز كەلەدى. وسى قوزعالىس جولىندا قوعام مەن بيلىك وكىلدەرىنىڭ اتسالىسقانىن قالايمىز, – دەيدى رەسپۋبليكالىق شاحمات فەدەراتسياسىنىڭ ۆيتسە-پرەزيدەنتى الەكساندر بابەنكو.
جەزقازعاندا وتكەن تۋرنيردە 8-سىنىپ وقۋشىسى ءسالىمجان ساقباەۆ – 3-ورىن, قۇتقارۋ سالاسىنىڭ قىزمەتكەرى الماس سارمۇرزاەۆ 2-ورىندى يەلەندى. ال 10 جاسار ماقسات بايسالبەكوۆ بارىنەن دە وزىق شىقتى. بۇلاردىڭ ۇشەۋى دە تۇركىستاندا وتەتىن گراند-فينالعا جولداما الدى.
– كەيىنگى شاحمات بايقاۋلارىنا ۇلىتاۋ وڭىرىنەن 100-دەن اسا ويىنشى قاتىسىپ ءجۇر. ىشىندە 5-6 جاتتىقتىرۋشى بار. وبلىس رەتىندە ەندى-ەندى دامىپ كەلە جاتقاندىقتان, ءالى دە ارامىزدان جاڭا شاحماتشىلار مەن رەسپۋبليكالىق, حالىقارالىق دەڭگەيدە جارقىرايتىن جۇلدىزدار شىعادى. «شاحمات كەرۋەنى» جوباسىنىڭ ولكەمىزگە كەلۋى جاڭا سەرپىن بەرەدى دەپ سەنەمىن, – دەيدى فەدەراتسيانىڭ ۇلىتاۋ وبلىسى بويىنشا اتقارۋشى ديرەكتورى باعدات بايسالبەكوۆ.
سالتاناتتى ءىس-شارا بارىسىندا رەسپۋبليكالىق شاحمات فەدەراتسياسىنىڭ وبلىستىق فيليالى قۇرىلىپ, ونىڭ توراعاسى بولىپ ۇلىتاۋ وبلىسى اكىمىنىڭ ورىنباسارى داستان رىسپەكوۆ سايلاندى.
ۇلىتاۋ وبلىسى
