اۋدانى 66 مىڭ شارشى مەتردەن اساتىن «تۇركىستان» اكك» اق ونەركاسىپتىك پاركىن جىل سوڭىنا دەيىن اياقتاۋ جوسپارلانىپ وتىر. جۇمىس ساپارى بارىسىندا پرەمەر-مينيسترگە وڭىردەگى ءىرى ينۆەستيتسيالىق جوبالاردىڭ, ونىڭ ىشىندە حيميا كەشەنى, بۋ-گاز قوندىرعىسى, مۇناي وڭدەۋ زاۋىتى, گاز ەلەكتر ستانساسى, كۇكىرت قىشقىلىن ءوندىرۋ زاۋىتى, ونەركاسىپتىك جىلىجاي, مال بورداقىلاۋ الاڭى جانە باسقا دا نىسانداردىڭ ىسكە اسىرىلۋى تۋرالى باياندالدى.
مۇندا ۇكىمەتتىك دەلەگاتسيا تۇركىستان وبلىسىندا وندىرىلەتىن جيھاز ونىمدەرىنىڭ ۇلگىلەرىمەن تانىستى.
ءاليحان سمايىلوۆ سوڭعى جىلدارى ەلىمىزدە جيھاز ونەركاسىبى بەلسەندى دامىپ كەلە جاتقانىن اتاپ ءوتتى. قازىر وندا 1500-گە جۋىق كاسىپورىن جۇمىس ىستەيدى. وسى جىلدىڭ 8 ايىندا سالا ءوندىرىسىنىڭ كولەمى 25,2%-عا وسسە, وسى سالاعا سالىنعان ينۆەستيتسيالار كولەمى 65%-عا ۇلعايدى. 2026 جىلعا دەيىن سالادا جالپى قۇنى 5,3 ملرد تەڭگەنى قۇرايتىن بىرقاتار جاڭا جيھاز ءوندىرىسىن ىسكە قوسۋ جوسپارلانىپ وتىر.
ۇكىمەت باسشىسى اتاپ وتكەندەي, بۇگىندە مەملەكەت تاراپىنان كەڭ اۋقىمدى قولداۋ كورسەتىلىپ كەلەدى. ماسەلەن, «ونەركاسىپتىك ساياسات تۋرالى» زاڭ شەڭبەرىندە كاسىپورىنداردى شيكىزاتپەن قامتاماسىز ەتۋ شارالارى, سۇرانىستى ىنتالاندىرۋ, ونەركاسىپتىك گرانتتار قاراستىرىلعان. سونداي-اق ارنايى ەكونوميكالىق جانە يندۋستريالىق ايماقتاردا وندىرۋشىلەر قاجەتتى ينفراقۇرىلىممەن قامتاماسىز ەتىلەدى, كەدەندىك باجداردان جانە تاعى باسقا سالىقتاردان بوساتۋ قاراستىرىلعان.
«وتاندىق جيھاز وندىرۋشىلەر وتكەن جىلدان بەرى مەملەكەتتىك ساتىپ الۋعا قاتىسۋ كەزىندە باسىم قۇقىققا يە, سوندىقتان وسىنداي كاسىپورىنداردى دامىتۋدىڭ ماڭىزى زور. تۇركىستان وبلىسىنىڭ اكىمدىگى ينۆەستورلاردى تارتۋ ماسەلەلەرى بويىنشا بەلسەندى جۇمىس ىستەپ, وندىرۋشىلەرگە بارلىق قولايلى جاعداي جاساۋى قاجەت», دەدى ءاليحان سمايىلوۆ.
بۇدان ءارى پرەمەر-مينيستر 570 توسەكتىك ورىندىق زاماناۋي كوپبەيىندى وبلىستىق اۋرۋحانا قۇرىلىسىنىڭ بارىسىمەن تانىستى. قازىرگى ۋاقىتتا جۇمىستىڭ شامامەن 50%-ى اياقتالدى. نىساندى پايدالانۋعا بەرۋ ۋاقىتى 2024 جىلعى جەلتوقسانعا جوسپارلانعان.
ءاليحان سمايىلوۆ تۇركىستان وبلىسىندا 2 ملن-نان استام ادام تۇراتىنىن, سوندىقتان جاڭا الەۋمەتتىك نىسانداردى ىسكە قوسۋ ماڭىزدى ەكەنىن اتاپ ءوتتى.
«بۇل – وتە ماڭىزدى جوبا. وڭىردە سىرقاتتار سانى كوبەيىپ وتىر, مۇنداعى اۋرۋحانالار تاپشىلىعىن كورىپ وتىرمىز. سوندىقتان جوبانى مەملەكەتتىك-جەكەمەنشىك ارىپتەستىك شەڭبەرىندە كەشىكتىرمەي ىسكە قوسۋ ماڭىزدى. تەحنيكالىق ماسەلەلەرگە كەلسەك, مۇنى دەنساۋلىق ساقتاۋ مينيسترلىگىمەن بىرلەسىپ پىسىقتاپ, جىل سوڭىنا دەيىن كەلىسىمدى بەكىتۋ كەرەك», دەدى پرەمەر-مينيستر.
بۇل رەتتە ول «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وبلىستا 49 جاڭا العاشقى مەديتسينالىق-سانيتارلىق كومەك كورسەتۋ نىسانىن سالۋ جانە 4 اۋداندىق اۋرۋحانانى جاڭعىرتۋ جوسپارلانىپ وتىرعانىن ەسكە سالدى.
«جالپى, دەنساۋلىق ساقتاۋ سالاسىنداعى بارلىق نىسان مينيسترلىكتىڭ باقىلاۋىندا بولۋى جانە ۋاقتىلى ىسكە اسىرىلۋعا ءتيىس», دەپ تۇيىندەدى ءسوزىن ءاليحان
سمايىلوۆ.
