جەرگىلىكتى پوليتسيا قىزمەتى باسقارماسى ايەلدەردى زورلىق-زومبىلىقتان قورعاۋ توبىنىڭ ەرەكشە تاپسىرمالار جونىندەگى اعا ينسپەكتورى, پوليتسيا مايورى رايسا زينەلعابيدەنقىزىنىڭ ايتۋىنشا, ەلىمىزدە وتباسى ينستيتۋتىنىڭ بەدەلىن ارتتىرۋ, نىعايتۋ ماقساتىندا جۇيەلى جۇمىستار اتقارىلىپ كەلەدى. وتباسىنداعى جانجالدان باستالىپ, زورلىق-زومبىلىققا ۇلاساتىن ارەكەتتەردەن ءزابىر كورەتىندەردىڭ باسىم بولىگى – ايەلدەر مەن بالالار. سول سەبەپتەن, ولارعا دا, ءزابىر كورسەتۋشىلەرگە دە پسيحولوگيالىق كەڭەس قاجەت.
«اپتاسىنا ءۇش رەت اكىمشىلىك قاماۋدا وتىرعان ازاماتتار پسيحولوگ-مامانمەن جەكە كەزدەسىپ, سۇراق قويا الادى. توپتىق سەانسقا قاراعاندا, جەكە كەڭەستىڭ تيىمدىرەك ەكەنى بايقالىپ وتىر. سەبەبى پسيحولوگكە جۇگىنۋشىلەرگە ارنايى سۇراقتارعا وزگە ادامدار الدىندا اشىلۋ قيىنعا سوعادى. پسيحولوگ كابينەتىنە كوپ جاعدايدا ەر ادامدار كەلەدى. ۇستىنەن ارىز جازىلىپ, بىرنەشە كۇن كامەرادا وتىرعاندارمەن, ۋاقىتشا قاماۋداعىلارمەن اڭگىمەلەسۋ وتە قيىن. ولار اشىلىپ سويلەسپەيدى. ءتىپتى بارلىق ماسەلەگە ءبارىبىر دەگەن كوزقاراسى باسىم. ماسەلەن, قابىلداۋعا كەلگەن ءبىر ادام ايەلىمەن ارازداسىپ قالعانىن, ەندى ۇيىنە بارماۋ ءۇشىن ۋاقىتىن وسىنداي ورىندا وتكىزگەنىن قالاعان. وتباسىلىق قۇندىلىقتار تاقىرىبىندا وتكىزىلگەن توپتىق سەانستان كەيىن ول بىرنەشە جىل ىشىمدىككە سالىنعانىنا, وتباسىن باعالاماعانىنا وكىندى», دەيدى پسيحولوگ اقمارال ءشارىپوۆا.
ايەلدەردى زورلىق-زومبىلىقتان قورعاۋ توبىنىڭ ەرەكشە تاپسىرمالار جونىندەگى اعا ينسپەكتورى, پوليتسيا مايورى رايسا زينەلعابيدەنقىزىنىڭ دەرەگىنە سۇيەنسەك, تۇرمىستىق زورلىق-زومبىلىق ءۇشىن كىنالى ادامدار اكىمشىلىك قۇقىق بۇزۋشىلىق تۋرالى كودەكسىنىڭ 73-بابىمەن جاۋاپكەرشىلىككە تارتىلۋى مۇمكىن. ەگەر ولاردىڭ ارەكەتىندە قىلمىستىق قۇقىق بۇزۋشىلىق قۇرامى بولسا, قىلمىستىق كودەكسىنىڭ 106-بابىمەن (دەنساۋلىققا قاساقانا اۋىر زيان كەلتىرۋ), 107-بابىمەن (دەنساۋلىققا اۋىرلىعى ورتاشا زيان كەلتىرۋ), 110-بابىمەن (قيناۋ), 115-بابىمەن (قورقىتۋ) قىلمىستىق جاۋاپكەرشىلىككە تارتىلادى.
«قازىر اتىراۋ وبلىستىق پوليتسيا دەپارتامەنتىندە ايەلدەر مەن بالالاردى تۇرمىستىق زورلىق-زومبىلىقتان قورعاۋ ماقساتىندا 10 اعا ۋچاسكەلىك ينسپەكتور جۇمىس ىستەيدى. ولار «تۇرمىستىق زورلىق-زومبىلىقتىڭ قۇقىقتىق نەگىزدەرى جانە ونىڭ الدىن الۋ ماسەلەلەرى» تاقىرىبىندا سەمينار-ترەنينگ وتكىزەدى. ماقساتىمىز – زورلىق-زومبىلىقتىڭ, وتباسىلىق جانجالدىڭ الدىن الۋ», دەيدى رايسا زينەلعابيدەنقىزى.
اتىراۋ وبلىسى اكىمى اپپاراتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا حاتشىسى زامزاگۇل جالمۋرزينانىڭ ايتۋىنشا, مۇنايلى شاھاردا 2012 جىلى داعدارىس ورتالىعى اشىلعان. مۇنداي ورتالىقتار جىلىوي جانە قۇرمانعازى اۋدانىندا بار. ەندى يساتاي اۋدانىندا وتباسىن قولداۋ جانە داعدارىس ورتالىعىن اشۋ كوزدەلگەن.
«قيىندىققا ۇشىراعان ايەلدەر مەن ولاردىڭ بالالارىنا پسيحولوگيالىق, قۇقىقتىق, مەديتسينالىق كومەك كورسەتىلەدى. جىل باسىنان ورتالىققا 24 ايەل مەن 63 بالا ءتۇستى. قازىر ولاردىڭ سانى ازايىپ, 5 انا مەن 16 بالاعا كومەك كورسەتىلىپ وتىر», دەپ ءمالىم ەتتى تۇرمىستىق زورلىق-زومبىلىققا ۇشىراعان ايەلدەرگە كومەك كورسەتۋ بولىمشەسى ديرەكتورىنىڭ ورىنباسارى ايبارشىن يمانعاليەۆا.
جەرگىلىكتى پوليتسيا قىزمەتى ايەلدەردى زورلىق-زومبىلىقتان قورعاۋ توبىنىڭ ينسپەكتورى, پوليتسيا اعا لەيتەنانتى ايگەرىم وراقباەۆانىڭ مالىمەتىنشە, ءزابىر كورگەندەردەن كۇنىنە 20-25 حابار تۇسەدى. ماسەلەن, بيىل التى ايدا تۇرمىستىق زورلىق-زومبىلىققا قاتىستى 102 ارناسىنا 4 097 حابار تۇسكەن. وسىنداي دەرەككە بايلانىستى اكىمشىلىك قۇقىق بۇزۋ تۋرالى كودەكسىنىڭ 73-بابىمەن (وتباسى-تۇرمىستىق قاتىناستار اياسىنداعى قۇقىققا قارسى ارەكەتتەر) 1 198 ادام جاۋاپكەرشىلىككە تارتىلعان. ال 1 365 قۇقىق بۇزۋشىعا قورعاۋ نۇسقاماسى شىعارىلىپتى. ونىڭ ىشىندە 334 ادامعا ەرەكشە تالاپ قويىلعان. قورعاۋ نۇسقاماسىن بۇزعان 96 ادامعا اكىمشىلىك قۇقىق بۇزۋشىلىق تۋرالى كودەكسىنىڭ 461-بابىمەن اكىمشىلىك جازا بەرىلگەن.
اتىراۋ وبلىسى
