ءىس-شاراعا ەلوردا مەن وڭىرلەردەگى ۇكىمەتتىك ەمەس ۇيىمدار, قوعام قايراتكەرلەرى, ەرىكتىلەر قاۋىمداستىعىنىڭ مۇشەلەرى جانە ەلوردا اكىمدىگىنىڭ وكىلدەرى قاتىستى.
«قازىر ەلوردادا 15-تەن اسا كوپفۋنكتسيونالدى ورتالىق جۇمىس ىستەيدى. ورتالىقتاردىڭ ماقساتى – ازاماتتىق باستامالاردى قولداۋ جانە داعدارىس جاعدايلارىن شەشۋ. قالاداعى ۇكىمەتتىك ەمەس ۇيىمداردىڭ ءۇزىلىسسىز جۇمىسى ارقىلى ىسكە اسىرىلعان جوبالاردىڭ سانى مەن ساپاسى جىل سايىن ارتىپ كەلەدى. ازاماتتىق قوعام وكىلدەرىمەن ءوزارا ءىس-قيمىلدى دامىتۋداعى ماڭىزدى قادامداردىڭ ءبىرى «استاناداعى ازاماتتىق باستامالار ورتالىعىن» قۇرۋ بولدى», دەدى استانا اكىمىنىڭ ورىنباسارى ەرلان بەكمۇرزاەۆ.
ونىڭ ايتۋىنشا, بيىل ەلوردادا ۇكىمەتتىك ەمەس ۇيىمدارمەن بىرلەسىپ 55 الەۋمەتتىك جوبا قولعا الىنىپ وتىر. جالپى, قالادا ءبىلىم بەرۋ, دەنساۋلىق ساقتاۋ, قورشاعان ورتانى قورعاۋ جانە الەۋمەتتىك قولداۋدى قوسا العاندا, ءارتۇرلى قىزمەت سالالارىن قامتيتىن 3 مىڭنان اسا ۇكىمەتتىك ەمەس ۇيىم جۇمىس ىستەيدى.
«بيىل وبلىستار مەن رەسپۋبليكالىق ماڭىزى بار قالالاردا العاش رەت وڭىرلىك فورۋمدار ءوتتى. بۇل – قولدانبالى يدەيالار مەن باستامالار پايدا بولاتىن ەڭ ءتيىمدى الاڭداردىڭ ءبىرى. وندا جەرگىلىكتى اتقارۋشى ورگانداردىڭ وكىلدەرى ازاماتتىق قوعام بەلسەندىلەرىمەن قاتار جەرگىلىكتى قوعامداستىقتىڭ وزەكتى ماسەلەلەرىن تالقىلايدى, ولاردى شەشۋ جولدارىن ازىرلەيدى, سونداي-اق ءۇشىنشى سەكتور مەن بيلىك وكىلدەرى اراسىنداعى ارىپتەستىكتىڭ نەگىزىن قالايدى», دەيدى استانا قالاسى ازاماتتىق باستامالاردى قولداۋ ورتالىعىنىڭ باسشىسى ارمان اشكين.
فورۋمعا قاتىسۋشىلاردىڭ سۇراقتارى مەن ۇسىنىستارىن پىسىقتاۋ ءۇشىن 3 تاقىرىپتىق الاڭ ۇيىمداستىرىلدى. وندا قوعامدىق بىرلەستىكتەر مەن قورلاردىڭ وكىلدەرى ءوز قىزمەتىنىڭ تيىمدىلىگىن ودان ءارى ارتتىرۋ ماسەلەلەرىن تالقىلادى.
