پوليتسيا ورگاندارى سەرۆيستىك مودەلگە كوشكەلى ءتارتىپ ساقشىلارىنىڭ جۇمىسى دا جاقسارا تۇسكەن. جىل باسىنان وڭىردەگى قۇقىق بۇزۋشىلىقتاردىڭ سانى شامامەن 13 پايىزعا تومەندەگەنى بايقالادى. پاۆلودار وبلىسى پوليتسيا دەپارتامەنتى باسشىسىنىڭ ءبىرىنشى ورىنباسارى جاسقايرات قايىروۆتىڭ مالىمەتىنشە, تىركەلگەن قىلمىستاردىڭ ۇلەسى 10 مىڭ ادامعا شاققاندا 67 جاعدايدى كورسەتىپ وتىر.
«بۇل – رەسپۋبليكاداعى ەڭ تومەنگى كورسەتكىشتەردىڭ ءبىرى, – دەيدى ول. – قىلمىستى ءىزىن سۋىتپاي اشۋداعى پوليتسەيلەردىڭ بەلسەندىلىگى وسكەن. جالپى, جاسالعان قىلمىستاردىڭ 59,2 پايىزى جەدەل ءىس-قيمىلدىڭ ارقاسىندا از ۋاقىت ىشىندە اشىلعان. ولار بويىنشا 121 قىلمىستىق ءىس اشىلىپ, 51 قىلمىستىق توپ قولعا ءتۇستى. زاڭسىز قارۋ-جاراق اينالىمىنان ەشبىر جەردە تىركەلمەگەن 40 قارۋ تاركىلەندى. تەرگەۋ-تەكسەرۋ ورگاندارىنىڭ وندىرىسىندە 8,6 مىڭ قىلمىستىق ءىس تىركەلسە, ونىڭ جارتىسىنان استامى سوتقا باعىتتالدى. بيىل العاشقى 9 ايدا ءوڭىر ازاماتتارى 120 مىڭ رەت زاڭ بۇزعان. ولاردىڭ ەكى مىڭنان استامى وتباسى-تۇرمىستىق قاتىناستار سالاسىنا تيەسىلى.
جول-كولىك وقيعالارىنىڭ سانى دا ەداۋىر تومەندەگەنى بايقالىپ وتىر. بىلتىرمەن سالىستىرعاندا, جولداعى اپات 9,1 پايىزعا كەمىمگەن. الايدا كولىك اپاتىنان قايتىس بولعاندار سانى كەرىسىنشە 10 پايىزعا كوبەيگەن. جول پاترۋلدەرى وزگە سالانىڭ ماماندارىمەن بىرگە اۆتوجولداردى زەردەلەپ شىعىپ, ەكى مىڭنان استام كەمشىلىكتى انىقتاپتى. جۇرگىزىلگەن زەرتتەۋلەر ناتيجەسىندە ولقىلىقتاردى ورنىنا كەلتىرۋ تۋرالى جاۋاپتى مەكەمەلەرگە ۇيعارىمدار جونەلتىلگەن. جولداردىڭ كۇتىمىنە سالعىرت قاراعان جانە ونداعى ءوندىرىس قاعيدالارىن بۇزعانى ءۇشىن 171 لاۋازىمدى جانە زاڭدى تۇلعا جاۋاپكەرشىلىككە تارتىلعان.
جوعارىدا اتاپ وتكەندەي, قازىرگى تاڭدا وڭىردە «پوليتسيانىڭ سەرۆيستىك مودەلى» جوباسى اياسىنداعى جۇيەنى دامىتۋ جالعاسىن تاۋىپ جاتىر. پوليتسيا جۇمىسىن تۇرعىندار ءۇشىن ءتيىمدى ەتە ءتۇسۋدى كوزدەيتىن جوباعا پوليتسيانىڭ ساپالى قىزمەتى, كليەنتكە باعدارلانۋ, ۇكىمەتتىك ەمەس ۇيىمدارمەن, مەملەكەتتىك مەكەمەلەرمەن تۇراقتى سەرىكتەستىك جاساۋ باعىتتارى ەنگەن.
«پوليتسيانىڭ سەرۆيستىك مودەلى – بيلىك ورگاندارىنا دەگەن سەنىمدى ارتتىرۋ, قاۋىپسىزدىكتى قامتاماسىز ەتۋ ماقساتىندا پوليتسيانىڭ قوعاممەن بىرلەسكەن قىزمەتى. ياعني قوعام مۇشەلەرىنىڭ قاۋىپسىزدىك ماسەلەلەرىن انىقتاۋ ۇدەرىسىنە بەلسەندى قاتىسۋى دەگەندى بىلدىرەدى. «ازاماتتاردى قاتىستىرۋ شەڭبەرىندە قۇقىق بۇزۋشىلىقتاردىڭ الدىن الۋ جانە قىلمىسقا قارسى كۇرەس كەڭىنەن, جان-جاقتى قاراستىرىلادى. بۇل پوليتسيا قىزمەتىنە تەرەڭ وزگەرىستەر ەنگىزىپ كەلەدى. ماسەلەن, بۇعان دەيىن «جۇرتقا جاقىن پوليتسيا» قاعيداتى جەرگىلىكتى پوليتسيا قىزمەتىنىڭ جۇمىسىنا جاڭا سەرپىن بەردى. قوعاممەن اشىق ءتىل تابىسۋ, ازاماتتاردىڭ سەنىمىنە يە بولۋ, اتقارىلعان جۇمىستاردى اشىق كورسەتۋ جانە كوپشىلىكپەن بىرلەسە قىلمىستىڭ الدىن الۋ جۇمىستارى ءاربىر ۋچاسكەلىك پوليتسيا ينسپەكتورىنىڭ باستى ماقساتىنا اينالدى», دەپ اتاپ ءوتتى ج.قايىروۆ.
بۇعان دەيىن وبلىس ورتالىعىندا ەلىمىز بويىنشا العاش رەت سەرۆيستىك قىزمەت كورسەتەتىن ۋچاسكەلىك پوليتسيا پۋنكتى اشىلدى. مۇندا ازاماتتار پوليتسيانىڭ قۇزىرىنداعى كەز كەلگەن قىزمەتتى الا الادى. قوعامدىق ورىنداردا پوليتسيانىڭ تۇراقتى بولۋىنا جانە حالىقتىڭ قاۋىپسىزدىگىن قامتاماسىز ەتۋگە باعىتتالعان سەرۆيستىك ورتالىق 57 مىڭنان استام ادام تۇراتىن «ۋسولكا» شاعىن اۋدانىندا ورنالاسقان. نىساندا ازاماتتاردى قابىلداۋعا جانە جۇرتشىلىقپەن جۇمىس ىستەۋگە ارنالعان بولمەلەر, انا مەن بالا بولمەسى, ءماجىلىس زالى, قىزمەتتىك, دەمالىس جانە تاماقتانۋعا ارنالعان بولمەلەر بار. ورتالىقتا جالپى سانى 16 ءتارتىپ ساقشىسى قىزمەت كورسەتەدى.
پاۆلودار وبلىسى
