فوتو: قايرات قونىسپاەۆ
ماسەلەن, 2022 جىلى امەريكانىڭ كولورادو شتاتىندا وتكەن ونەر بايقاۋىندا «تسيفرلىق ونەر» ساناتىندا جاساندى ينتەللەكت مۇمكىندىگىن پايدالانعان قاتىسۋشى جەڭىسكە جەتتى, ال بەلگىلى Cosmopolitan جۋرنالى ارلعاش رەت ءوز مۇقاباسىن DALL-E 2 باعدارلاماسى ارقىلى جاساپ شىعارعان.
وسى تۇستا دارىنى ارقىلى نان تاباتىن ونەر ادامدارىنىڭ الاڭداۋشىلىعى دا وتە ورىندى. جاساندى ينتەللەكت باعدارلامالارىن جەتىلدىرۋ اياسىندا ادامنىڭ مۇمكىندىكتەرىنەن اسىپ تۇسەتىن داعدى پايدا بولمايتىنىنا كىم كەپىل؟ الايدا, نەيروجەلىلىك باعدارلامالاردىڭ كەمشىلىگى دە بار - ونىڭ سۋرەتشى سياقتى جەكە تاجىريبەسى مەن تەرەڭ ينتەرپرەتاتسياسى بولۋى مۇمكىن ەمەس. جاساندى ينتەللەكت سىني تۇرعىدان ويلاۋعا قابىلەتسىز: ول تەك اشىق كوزدەردە ورنالاستىرىلعان ۆيزۋالدى اقپارات اعىنىن تالداۋسىز تۇتىنادى.
جاساندى ينتەللەكت جاساعان سۋرەتتەر - ونەردەن تۋعان تىڭ تۋىندى ەمەس, تەك كومپيۋتەردە جاسالعان سۋرەتتەر, سايكەسىنشە AI قىزمەتتەرىن پايدالاناتىن قولدانۋشىلاردى سۋرەتشى دەپ اتاۋ قاتە بولار. سەبەبى كەسكىندى ادام ەمەس, ماشينا جاسايدى – دەمەك, پروتسەسس ءىس جۇزىندە شىعارماشىلىققا جاتپايدى. ونەر ادامدارى پروگرەسس ۇسىناتىن مۇمكىندىكتەردىڭ ۇتىمدى تۇستارىن كەرەگىنە جاراتسا قۇبا قۇپ.
بۇگىندە Open AI «كومەگىن» ماركەتولوگ ماماندار دا قارقىندى پايدالانىپ جاتىر. ماسەلەن, وتاندىق اۆتوموبيل ءوندىرۋشى Allur كومپانياسى جارناما اگەنتتىگىمەن بىرلەسىپ, ورتالىق ازياداعى نەيروندىق جەلىلەر ارقىلى جاسالعان العاشقى بەينەروليكتى ۇسىندى. ايتا كەتسەك, قازاقستانداعى بيزنەستە مۇنداي بىرەگەي ىنتىماقتاستىق العاش رەت جاسالىپ وتىر.
«بۇل يدەيا كورەرمەنگە كولىكتەردىڭ تەك تاسىمالداۋ قۇرالى ەمەس ەكەنىن تۇسىندىرەدى. ءبىز كوپشىلىككە جاڭا تەحنيكانىڭ ەرەكشە سەزىم سىيلايتىنىن, العا ۇمتىلدىراتىنىن, جاڭا باستامالارعا جەتەلەيتىنىن كورسەتكىمىز كەلدى», دەيدى كومپانيانىڭ شىعارماشىلىق ديرەكتورى.
ايتا كەتسەك, جاقىندا الماتىدا زاماناۋي يننوۆاتسيالىق وزىق كورمە اشىلدى. قازاقستان رەسپۋبليكاسىنىڭ مەملەكەتتىك ورتالىق مۋزەيىنىڭ وكىلدەرى Plan B جانە FARBA (مينسك, بەلارۋس) گالەرەيالارىنداعى ارىپتەستەرىمەن بىرلەسىپ «جاساندى ينتەللەكت: سۋرەتشى نەمەسە ماشينا؟» اتتى كورمە ۇسىندى.
نازارعا ۇسىنىلعان جۇمىستاردىڭ بارلىعىن جاساندى ينتەللەكت جاساپ شىعارعان. كورمەگە تابيعات, ميفولوگيا, تاريح, ارحيتەكتۋرا جانە باسقا دا سالالاردى قامتيتىن 10 ءتۇرلى ساناتقا بولىنگەن 120-دان استام سۋرەت قويىلعان.
وتكەن اپتادا ەلوردادا وتكەن «Digital Bridge» ءىس-شاراسىندا پرەزيدەنت قاسىم-جومارت توقاەۆ تا جاساندى ينتەللەكت ماسەلەسىنە توقتالدى. بۇرىن فانتاستيكالىق شىعارمالاردا, كينودا عانا كەزدەسەتىن دۇنيەلەر ءومىر اقيقاتىنا اينالدى. پرەزيدەنتتىڭ پىكىرىنشە, ونى ەلەمەگەندەر كوش سوڭىندا قالىپ قويۋى مۇمكىن.
كەز كەلگەن تەحنولوگيالىق پروگرەستىڭ وڭ جانە تەرىس جاعى بار. سوندىقتان دا پايداسى مەن زيانى جونىندە, ارتىقشىلىعى مەن قاۋىپى تۋراسىندا پىكىر كوپ. قاتەلىك جاساندى ينتەللەكتتە دە, ادامدا دا بولادى. اسىرەسە قيىن تاپسىرمالاردى ورىنداۋ ماقساتىندا جاساندى ينتەللەكتتى پايدالانۋ – ادام قاتەلىكتەرىنە جول بەرمەيدى. بىراق اسا قىمبات تەحنيكا شىعارماشىلىق ونەردى الماستىرا المايدى, بۇل ادامي ەموتسيانى تۇبەگەيلى جويىپ, تۋىندىعا جان بىتىرمەيدى.
