استانادا وتكەن كەزدەسۋدە تاراپتار ساۋدا-ەكونوميكالىق ءوزارا ءىس-قيمىلدى ارتتىرۋ پەرسپەكتيۆالارىن, ينۆەستيتسيالىق ىنتىماقتاستىق, مەملەكەتتىك باسقارۋ سالاسىنداعى تاجىريبە الماسۋ قادامدارىن جانە باسقا دا ماسەلەلەردى قاراستىردى.
پرەمەر-مينيستر بىرىككەن اراب امىرلىكتەرى ەلىمىزدىڭ پارسى شىعاناعى ايماعىنداعى نەگىزگى ساۋدا-ەكونوميكالىق سەرىكتەستەرىنىڭ ءبىرى ەكەنىن ەرەكشە اتاپ ءوتتى. ماسەلەن, وتكەن جىلدىڭ قورىتىندىسىنا سايكەس ەكى ەل اراسىنداعى تاۋار اينالىمى 633 ملن دوللاردى قۇرادى. سونىمەن قاتار جاقىن ارادا ءوزارا ساۋدا اۋقىمىن كەڭەيتۋ ارقىلى بۇل كورسەتكىشتى 1 ملرد دوللارعا دەيىن ارتتىرۋعا مۇمكىندىك بار.
ءاليحان سمايىلوۆ اتاپ وتكەندەي, ينۆەستيتسيالىق ءوزارا ءىس-قيمىل جاڭا جوبالارمەن دە قولداۋ تاۋىپ وتىر. ماسەلەن, ەلىمىزگە تارتىلعان امىرلىكتەر ينۆەستيتسياسى وتكەن جىلى – 27%-عا ءوسىپ, شامامەن 420 ملن دوللارعا دەيىن جەتكەن.
ء«بىرىنشى جارتىجىلدىقتا بۇل كورسەتكىش 3 ەسەدەن استام ءوستى جانە قازىردىڭ وزىندە 400 ملن دوللاردان استى. ءبىز بارلىق باسىم باعىت بويىنشا ودان ءارى ىنتىماقتاستىققا اشىقپىز جانە امىرلىكتەر ينۆەستورلارىنا ولاردىڭ باستامالارىن ىسكە اسىرۋدا جان-جاقتى قولداۋ كورسەتۋگە دايىنبىز», دەدى پرەمەر-مينيستر.
سونداي-اق ول بۇگىندە قازاقستان مەن ءباا اراسىندا مەملەكەتتىك باسقارۋ سالاسىنداعى ءوزارا ءىس-قيمىل بەلسەندى دامىپ كەلە جاتقانىن ايتتى. اقپان ايىندا دۋبايدا وتكەن دۇنيەجۇزىلىك ۇكىمەت ءسامميتى اياسىندا ءتيىستى مەموراندۋمعا قول قويىلدى.
ء«بىز تاجىريبە الماسۋدىڭ بۇل مۇمكىندىگىن جوعارى باعالايمىز جانە مەملەكەتتىك جۇيەنىڭ تيىمدىلىگىن ارتتىرۋ ءۇشىن امىرلىكتەردىڭ وزىق تاجىريبەسىن زەردەلەۋگە مۇددەلىمىز», دەدى ءاليحان سمايىلوۆ.
ءوز كەزەگىندە مۇحاممەد ءال-گارگاۋي بىرىككەن اراب امىرلىكتەرى ەلىمىزبەن قارىم-قاتىناستى دامىتۋعا ۇلكەن ءمان بەرەتىنىن باسا ايتتى.
ء«بىز ەكونوميكالىق سالادا وڭ ناتيجەلەردى كورىپ وتىرمىز. ارينە, بىزدە ورتاق ۇلكەن الەۋەت بار. ەكونوميكالىق دامۋمەن قاتار, ءبىزدىڭ حالقىمىزدىڭ اراسىنداعى دوستىقتىڭ, تۋريستەر سانىنىڭ ارتا تۇسكەنىن دە كورىپ وتىرمىز. ءبىز بۇل كورسەتكىشتەردىڭ بارلىعى ودان ءارى وسەدى دەپ ۇمىتتەنەمىز», دەدى ول.
