ەكىباستۇزداعى «بوگاتىر كومىر» كەنىشىنىڭ كومىرىن نەگىزىنەن الەۋمەتتىك نىسانداردى جىلىتۋعا جانە وندىرىستىك جاعدايدا پايدالاناتىندىقتان, ەڭ ارزان باعا اتالعان ۇيىمعا تيەسىلى. نەگىزى كەنىشتەن بارلىعىنا بىردەي باعادا 3 556 تەڭگەدەن بوساتىلادى. ول پاۆلودار قالاسىنا جەتىپ, تەمىرجول تۇيىقتارىنا تۇسكەندە 10 مىڭ تەڭگەدەن ساتىلىپ جاتقانىن بايقايمىز. جەكە ۇيلەر تاراپىنان الۋشىسى از بولعانىنا قاراماستان, بيىل كەنىش ونىڭ باعاسىن باقانداي 600 تەڭگەگە ءوسىردى. وڭىرلىك ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسى جىلۋمەن قامتۋ ءبولىمىنىڭ باس مامانى داۋلەت قابدىشەۆتىڭ مالىمەتىنشە, «مويكوبە» كەنىشىندە كومىر الەۋمەتتىك نىساندارعا – 7 000, جەكە ازاماتتارعا 8 000 تەڭگەدەن ساتىلىپ جاتىر. بىلتىرعىمەن سالىستىرعاندا تونناسى 500 تەڭگەگە قىمباتتاعان. ال وبلىس ورتالىعىنىڭ تۇرعىندارى ونى جەتكىزۋ قۇنىمەن ەسەپتەگەندە 16 مىڭ تەڭگەگە ساتىپ الا الادى. قازىر پاۆلودار قالاسىنداعى بازالاردا كومىردىڭ 20 مىڭ تونناسى بار. الىس اۋدانداردا باياناۋىلدىق مينەرالدى وتىننىڭ ءبىر تونناسى 18-25 مىڭ تەڭگەگە دەيىن جەتىپ تۇر.
جالپى, قىسقى جىلىتۋ ماۋسىمى ءۇشىن وڭىرگە 551 مىڭ توننا قاتتى وتىن قاجەت بولسا, سونىڭ 128 مىڭىن جەكە ۇيلەر الۋى كەرەك. الەۋمەتتىك نىساندار وزدەرى سۇرانىس جاساعان كولەمنىڭ 40 پايىزىن تاسىپ ۇلگەرگەن, وزگەسىن كەستەگە سايكەس جەتكىزىپ جاتىر. ءبىلىم, دەنساۋلىق ساقتاۋ سالالارىندا جانە وزگە دە الەۋمەتتىك مەكەمەلەردە قازىردىڭ وزىندە 2 ايعا جەتەرلىك قور جينالعان.
