سۋرەتتى تۇسىرگەن – ازامات قۇسايىنوۆ
وقىرماندى مەملەكەتتىك ءتىلدىڭ مارتەبەسىن كوتەرۋ جانە ناسيحاتتاۋدى جاڭا تەحنولوگيا مەن ترەندتەر ارقىلى جۇزەگە اسىرۋعا شاقىراتىن بايقاۋعا 50 شاقتى جۇمىس ءتۇستى. پروفەسسور كاكەن كامزين باستاعان قازىلار القاسىنىڭ شەشىمىمەن ءى ورىن – جامبىل وبلىسىنان باق سىناعان قاسىمحان تولەنديەۆكە, ءىى ورىن – قىزىلوردالىق ساعيرا ۋاليگە, ال ءۇشىنشى ورىن ماڭعىستاۋلىق وقىرمان رىسگۇل رامازانوۆاعا بۇيىردى.
«كەيبىر وقىرماندار بايقاۋ فورماتىن دۇرىس تۇسىنبەگەندىكتەن, جاراماي قالعان جۇمىستار دا بولدى. جاقسى روليكتەر دە بارشىلىق. قازىلار القاسى ولاردى ىرىكتەپ, ىشىنەن 3 جەڭىمپازدى انىقتادى. ولار گازەتىمىزگە شىققان ماقالالار تۋرالى ساراپتامالىق ۆيدەوكونتەنت جاساپ, سول ارقىلى جەڭىسكە جەتتى», دەيدى «انا ءتىلى» گازەتىنىڭ باس رەداكتورى ەرلان ءجۇنىس.
– قازاق تىلىنە, ۇلتقا, ۇلت بولاشاعىنا قىزمەت ەتۋ – بارشامىزدىڭ ورتاق پارىزىمىز. قازىرگى «مىلتىقسىز مايدان» زامانىندا ءتىل ماسەلەسى ماڭىزدى بولىپ تۇر. انا ءتىلى بارىمىزگە ورتاق, ءتىل وشسە, ۇلت وشەدى. سونى ۇمىتپاۋىمىز كەرەك. وسى ماقساتتا 1989 جىلدان بەرى «قازاق ءتىلى» قوعامىنىڭ ىستىق-سۋىعىنا ءتوزىپ جۇرگەن ازاماتتار جەتەرلىك. «انا ءتىلى» گازەتىنىڭ وقىرماندارى كوبەيسە, قازاق تىلىنە, ۇلتتىق سانا-سەزىمگە, يدەولوگياعا دەگەن كوزقاراس وياناتىن شىعار دەگەن ويمەن بايقاۋدى وتكىزدىك. گازەت, كىتاپ وقۋعا دەگەن قىزىعۋشىلىق باسەڭدەگەن زاماندا وقىرمان تارتۋ, وقۋعا دەگەن قىزىعۋشىلىقتى وياتۋ ءۇشىن جاسالىپ وتىرعان ءىس-شارا ءوز جەمىسىن بەرەدى, – دەيدى بايقاۋعا دەمەۋشىلىك تانىتقان حالىقارالىق «قازاق ءتىلى» قوعامى الماتى قالاسى فيليالىنىڭ توراعاسى قۇسمان شالاباەۆ.
الماتى
