ەندى ەلىمىزدەگى جاس كاسىپكەرلەرگە 5 ملن تەڭگەگە دەيىن جەڭىلدەتىلگەن نەسيە بەرىلەدى. جاستارعا ارنالعان جاڭا جوبا «اگرارلىق نەسيە» كورپوراتسياسى ارقىلى بەرىلەتىن نەسيەنى 21 جاستان 35 جاسقا دەيىنگى ازاماتتار الۋعا قۇقىلى. بۇل جوبا تۋرالى مەملەكەت باسشىسى بيىلعى جولداۋىندا دا ايرىقشا ايتقان بولاتىن.
ەڭبەك جانە حالىقتى الەۋمەتتىك قورعاۋ ءمينيسترىنىڭ مالىمەتىنشە, 6 مىڭ جاس ازاماتقا 5 جىلعا 2,5% جەڭىلدىكپەن 5 ملن تەڭگەگە دەيىنگى جەڭىلدەتىلگەن نەسيە بەرىلسە, ال ەرەكشە قاجەتتىلىكتەرى بار جاستارعا جانە حالىقتىڭ الەۋمەتتىك وسال توپتارىنان شىققان ازاماتتارعا 1,2 ملن تەڭگە مولشەرىندە 9 مىڭ گرانت ءبولىندى. اتالعان جەڭىلدەتىلگەن نەسيەنى الۋشىلاردىڭ باسىم بولىگى – اۋىل شارۋاشىلىعى, قىزمەت كورسەتۋ, ساۋدا, جەڭىل ونەركاسىپ سالالارىنىڭ كاسىپكەرلەرى.
بيىل ناۋرىز ايىنىڭ سوڭىنان باستاپ ەلىمىزدەگى جاس كاسىپكەرلەر جەڭىلدەتىلگەن نەسيەنى رەسىمدەپ كاسىبىن دوڭگەلەتە باستاعان. سونىڭ ءبىرى – استانالىق جاس كاسىپكەر الىبەك قانىبەك. ول مەملەكەت تاراپىنان بەرىلەتىن شاعىن نەسيە ارقىلى كاسىپ اشىپ, قازىر 12 ادامدى جۇمىسپەن قامتىپ وتىر. جۇمىس بەرۋشى رەتىندە ءار جۇمىسشىعا 250-300 مىڭ تەڭگە كولەمىندە جالاقى تولەيدى. الىبەك مەملەكەتتىڭ جاس كاسىپكەرلەرگە كاسىبىن كەڭەيتۋ ءۇشىن جەڭىلدەتىلگەن نەسيە بەرىلەتىنىن الەۋمەتتىك جەلىلەر ارقىلى بىلگەنىن ايتادى.
– جىل باسىنان باستاپ جيھاز تسەحىن اشۋدى جوسپارلاپ جۇرگەندە جەڭىلدەتىلگەن 2,5 پايىزدىق نەسيە بەرىلەتىنىن ەستىپ, «اگرارلىق نەسيە» كورپوراتسياسىنىڭ كەڭەسىنە جۇگىندىك. ءسويتىپ, استانا قالالىق اكىمدىگى جۇمىسپەن قامتۋ جانە الەۋمەتتىك قورعاۋ باسقارماسىنا قاجەتتى قۇجاتتاردى وتكىزىپ, كوپ ۇزاماي ءساۋىر ايىندا 5 ملن تەڭگە كولەمىندە جەڭىلدەتىلگەن نەسيەگە قول جەتكىزدىك. سونىڭ ناتيجەسىندە جيھاز شىعارۋعا قاجەتتى ستانوكتار ساتىپ الىپ, كاسىبىمىزدى باستاپ كەتتىك. ءبىز ءۇشىن بۇل ۇلكەن قولداۋ بولدى, – دەيدى جاس كاسىپكەر.
جاس كاسىپكەرلەرگە نەسيە بەرۋ باعدارلاماسىن ەڭبەك جانە حالىقتى الەۋمەتتىك قورعاۋ مينيسترلىگى كاسىپكەرلىكتى دامىتۋ جونىندەگى 2021-2025 جىلدارعا ارنالعان ۇلتتىق جوبا شەڭبەرىندە جۇرگىزەدى. ۇلتتىق جوبا تەك كاسىپكەرلىكتى قولداپ قانا قويماي, جۇمىس ورىندارىنىڭ دا اشىلۋىنا سەپتىگىن تيگىزىپ وتىرعان كورىنەدى.
«سۋبسيديالاناتىن جۇمىس ورىندارىنا 163,8 مىڭ ادام ورنالاستىرىلدى. ونىڭ ىشىندە الەۋمەتتىك جۇمىس ورىندارىمەن – 16,1 مىڭ ادام, جاستار پراكتيكاسىمەن – 19,3 مىڭ ادام, قوعامدىق جۇمىستارمەن – 108,5 مىڭ ادام, «العاشقى جۇمىس ورنى» جوباسى بويىنشا – 6,7 مىڭ ادام, «ۇرپاقتار كەلىسىمشارتى» جوباسى بويىنشا – 326 ادام, «كۇمىس جاس» جوباسى اياسىندا 12,9 مىڭ ادام جۇمىسپەن قامتىلدى. سونداي-اق «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋمەن 110,8 مىڭ ادام جۇمىسپەن قامتىلدى, ونىڭ ىشىندە 82,7 مىڭ ادام وقۋدى اياقتاپ, سەرتيفيكاتتار الدى. قىزمەت سالاسىن تاڭداۋ ماقساتىندا 87,9 مىڭ ادام الەۋمەتتىك كاسىپتىك باعدارلاۋدان ءوتتى. بۇعان قوسا 2023 جىلى ۇلتتىق جوبا شەڭبەرىندە 400 اەك (1 380 000 تەڭگە) مولشەرىندە جاڭا بيزنەس-باستامالاردى ىسكە اسىرۋ ءۇشىن 9 مىڭ گرانت بەرۋ كوزدەلگەن. ازىرگە جىل باسىنان بەرى 5 317 گرانت بەرىلدى», دەيدى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى.
بيىل قىركۇيەك ايىنداعى جاعداي بويىنشا 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوباسىنا 503,4 مىڭ ادام قاتىسقان. 345,7 مىڭ ادام جۇمىسقا ورنالاسىپ, ونىڭ 181,9 مىڭى تۇراقتى جۇمىس ورنىن تاۋىپتى.
استانا قالاسى اكىمدىگى جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەرلان ءجۇسىپوۆتىڭ ايتۋىنشا, الداعى ۋاقىتتا قالا اكىمدىگى مەن مەملەكەت تاراپىنان جاس كاسىپكەرلەر ءۇشىن قولداۋ جالعاسا بەرمەك.
– پرەزيدەنتتىڭ تىكەلەي تاپسىرماسىمەن 2,5 پايىزدىق جەڭىلدىكپەن بەرىلىپ جاتقان بۇل نەسيەلەر بەس جىل مەرزىمگە بەرىلەدى. شاعىن تسەحتىڭ يەسى جاس كاسىپكەر الىبەك قانىبەك تە – سول باعدارلامانىڭ يگىلىگىن كورىپ وتىرعان كاسىپكەردىڭ ءبىرى. وسى كۇنگە دەيىن 200-دەن اسا استانالىق جاس كاسىپكەر وسىنداي كومەكتى الىپ ۇلگەردى. جىل اياعىنا دەيىن بارلىعى 500 جاس كاسىپكەردى قامتۋ جوسپارلانعان, – دەيدى ە.ءجۇسىپوۆ.
ونىڭ سوزىنشە, مۇنداي جەڭىلدەتىلگەن نەسيەنى شەكتى جاس مولشەرى سايكەس كەلەتىن كەز كەلگەن جاس كاسىپكەر پايدالانا الادى. تەك نەگىزگى ەكى شارتى بار. ونىڭ ءبىرىنشىسى – كاسىپ اشقانىنا بەس جىلدان اسپاعان بولۋعا ءتيىس, ەكىنشىسى – نەسيەنى رەسىمدەۋ ءۇشىن جىلجىمايتىن م ۇلىكتى كەپىلگە قويۋى قاجەت. سونىمەن قاتار كاسىپكەر ءۇشىن اتالعان نەسيەنى تومەن پايىزبەن 5 جىلعا بەرىپ قانا قويماي, العاشقى 20 ايعا دەيىن تولەم مەرزىمىنە ءۇزىلىس جاساۋعا دا بولادى. بۇل كاسىپكەر ءۇشىن جۇمىسىن جانداندىرىپ العانشا قاراستىرىلعان ۇلكەن كومەك بولىپ وتىر.
– ءبىز ازىرگە جۇقا تاقتاي كەسەتىن ەكى ستانوك قانا الدىق. سوعان ساي قازىر تەك اعاشتان جاسالاتىن ءتۇرلى شكاف, ءاسۇي گارنيتۋرى سياقتى جيھازدار جاساپ جاتىرمىز. الداعى ۋاقىتتا تسەحتى كەڭەيتىپ, جۇمساق جيھازدار دا شىعارۋدى جوسپارلاپ وتىرمىز, – دەيدى ءا.قانىبەك.
«ەگەر دە مال كەرەك بولسا, قولونەر ۇيرەنبەك كەرەك... الداۋ قوسپاي ادال ەڭبەگىن ساتقان قولونەرلى – قازاقتىڭ اۋليەسى سول» دەگەن حاكىم ابايدىڭ وسيەتىن بەرىك ۇستانعان جاس كاسىپكەر الىبەك جيھاز ءوندىرۋ سالاسىن دامىتا بەرەتىنىن ايتادى.
