ول «وتكەن كۇندە بەلگى جوق» دەگەنمەن كەلىسپەيدى. اۋىزشا ايتىلىپ جاتاتىن سانسىز راحمەتتى ايتپاعاندا, رەسمي ماراپاتتار قانشاما؟ بۇلار وتكەن كۇننىڭ بەلگىسى ەمەس پە؟ ونىڭ العان العىسحات, قۇرمەت گراموتالارى جەتەرلىك. بيىل دا ساتباەۆ قالالىق ءبىلىم ءبولىمىنىڭ العىسحاتىن جانە ۇلىتاۋ وبلىستىق ءبىلىم, عىلىم جانە بيۋدجەتتىك ۇيىمدار كاسىپوداعىنىڭ قۇرمەت گراموتاسىن يەلەندى.
– بۇل ماراپاتتارعا دا ۇلكەن راحمەت, ارينە. بىراق مەن ءۇشىن ەڭ كەرەمەت تارتۋ – ەرمەك ءادىلباي ۇلى مەن گۇلشات سەرىكقىزى ەسىمدى اتا-انالاردىڭ قۇتتىقتاۋى بولدى, – دەيدى ول.
ۇستازدار مەرەكەسى كۇنى ەرمەك پەن گۇلشات وزدەرىنىڭ 7-سىنىپتا وقيتىن يمران, 5-سىنىپتاعى ماليكا, 2-سىنىپتىڭ وقۋشىسى يسمايل جانە «بالدىرعان» توبىنىڭ تاربيەلەنۋشىسى يسامۋدين ەسىمدى ۇل-قىزدارىن ەرتىپ, قارلىعانىڭ قۇشاعىن گۇلگە تولتىرىپتى.
– ءبىزدىڭ ءتورت بالامىز دا قارلىعانىڭ قولىنان ءوتتى. جازۋ, سۋرەت سالۋ, ءان ايتۋ, ءتىپتى ءجۇرىپ-تۇرۋعا دا سول ۇيرەتتى. بالالارىمىزدىڭ وقۋدا وزات, ونەرلى بولۋى بالاباقشاداعى العان ءتالىم-تاربيەنىڭ جەمىسى دەپ بىلەمىز. سوندىقتان قارلىعا حاميتقىزىن مەرەكەسىمەن قۇتتىقتاپ, كوڭىلىمىزدىڭ بەلگىسىندەي گۇل شوقتارىن سىيلاۋدى ءجون كوردىك, – دەگەن گۇلشاتقا قالاي ريزا بولماسقا.
ادامنىڭ رياسىز كوڭىلىنە نە جەتسىن؟ ەتكەن ەڭبەك, توككەن تەر جۇرگەن ورتاڭداعى قادىرىڭدى ارتتىرىپ قانا قويمايدى, ويلاماعان جەردە ءوزىڭ دە تاڭقالىپ قالاتىن وسىنداي تاماشا تارتۋعا دا كەزىكتىرەدى ەكەن.
ۇلىتاۋ وبلىسى,
ساتباەۆ قالاسى
