سونىمەن وسىناۋ اۋقىمدى ءىس-شارا «International Educational Fair – 2023» دەپ اتالادى. ول – جىل سايىن وتكىزىلەتىن حالىقارالىق ءبىلىم كورمەسى. رەسپۋبليكانىڭ ءۇشىنشى مەگاپوليسىمەن بىرگە استانا مەن الماتى قالالارىندا دا ءوتىپ جاتىر. شىمكەنت قالاسى اكىمىنىڭ ءبىرىنشى ورىنباسارى قۋانىش اسىلوۆ كورمەنىڭ رەسمي اشىلۋىنا قاتىسىپ, جۇرەكجاردى لەبىزىن جەتكىزدى. شاھار باسشىسى ءبىرىنشى ورىنباسارىنىڭ ايتۋىنشا, بۇگىنگى تاڭدا ءبىلىم بەرۋ جۇيەسىن تۇبەگەيلى جاڭعىرتۋ قاجەت. بۇرىنعى ادىستەردىڭ ورنىنا جاڭادان زاماناۋي ۇلگىدەگى الەمدىك ستاندارتقا ساي پەداگوگيكالىق تاسىلدەرگە كوشكەن ابزال. ول دۋالدى وقىتۋ جۇيەسى, ينكليۋزيۆتى ءبىلىم, جاڭا قوعامعا قاجەتتى ماماندىقتاردى يگەرۋ سىندى باعىتتار. بۇل جونىندە پرەزيدەنتتىڭ بيىلعى 1 قىركۇيەكتەگى «ادىلەتتى قازاقستاننىڭ ەكونوميكالىق باعىتى» اتتى قازاقستان حالقىنا ارناعان جولداۋىندا ايتىلىپ وتكەنىن تىلگە تيەك ەتتى. جولداۋدا مەملەكەت باسشىسى بالالارعا, جاستارعا ساپالى ءبىلىم بەرۋمەن ونى تاجىريبەمەن ۇشتاستىرۋ ارقىلى كادر تاپشىلىعى ماسەلەسىن شەشۋگە بولاتىنىن جانە ەڭبەك كۇشىنىڭ كومەگىمەن ەكونوميكانى بارىنشا كوتەرۋگە مۇمكىندىك تۋاتىنىن بايانداعان. بيلىك وكىلىنىڭ مالىمدەۋىنشە, حالىقارالىق كورمە جاستاردىڭ وزگە وقۋ ورىندارىنىڭ الەۋەتىمەن تانىسۋعا, وتاندىق ءبىلىم بەرۋ سالاسىنىڭ ارتىقشىلىقتارىن تاجىريبە جۇزىندە سالىستىرىپ كورۋگە مۇمكىندىك الماق. دۇنيە ءجۇزىنىڭ 60 ەلىنەن كەلگەن جوعارى وقۋ ورىندارىنىڭ ءبىر الاڭدا ءوز مۇمكىندىكتەرىن جاريا ەتۋى – البەتتە جەرگىلىكتى جاستار ءۇشىن ۇلكەن باقىت. ءارى كەلەشەكتە قايدا وقيتىنىن باعدارلاپ جۇرگەن مەكتەپ وقۋشىلارىنا دا ناعىز جول سىلتەگىش بولدى. ءوز سوزىندە سالا باسشىسى وسى كۇندە شەكارالار اشىلعان زاماندا وركەنيەتتى ەلدەردە جاڭا ماماندىق يگەرىپ قايتۋ اسا قيىندىق تۋدىرمايتىنىن اتاپ ءوتتى. ونىڭ ۇستىنە «بولاشاق» سەكىلدى باعدارلامامەن بىلىمگە قۇمار بىراق شەتەلگە بارۋعا مۇمكىندىگى جەتە بەرمەيتىن جاستار ءۇشىن مەملەكەت ەسەبىنەن تەگىن وقۋعا بار جاعداي جاسالعان. سوندىقتان اكىمنىڭ يدەولوگيا سالاسىنا جاۋاپتى ءبىرىنشى ورىنباسارى جاستاردى مەملەكەت ۇسىنعان وسىنداي مۇمكىندىكتەردى قالت جىبەرمەي, بۇگىنگىدەي ءىس-شارا اياسىندا ءوزىنىڭ بولاشاقتا وقيتىن ءبىلىم ورنىن تاڭداۋعا شاقىردى. ەل بولاشاعى ءاردايىم جاستاردىڭ قولىندا دەگەن ول ۇرپاعى ءبىلىمدى ەل ءاردايىم وركەنيەتتىڭ الدىڭعى قاتارىندا جۇرەتىنىن جانە مۇنداي مەملەكەتتە ەشقاشان بىلىكتى ماماندارعا دەگەن سۇرانىس ازايمايتىنىن, كەرىسىنشە كادرلىق الەۋەتى جوعارى بولاتىنىن جەتكىزدى.
شىمكەنتتەگى حالىقارالىق كورمە قازان ايىنىڭ 7-سىندە مارەسىنە جەتتى. ال ءىس-شارانىڭ سالتاناتتى جابىلۋ ءراسىمى وزبەكستان استاناسى – تاشكەنت قالاسىندا ۇيىمداستىرىلادى. ءوز كەزەگىندە كورمەنىڭ وتۋىنە ءبىلىم, مادەنيەت, مەديا سالاسىندا قىزمەت كورسەتەتىن ء«اىى Group», ء«ۆىlىm» سەكىلدى كومپانيالار مۇرىندىق بولدى.
قالالىق ءبىلىم باسقارماسىنىڭ باسشىسى جانات تاجيەۆا دا ءىس-شاراعا ارنايى قاتىسىپ, مەكتەپتىڭ جوعارى سىنىبىندا وقيتىن وقۋشىلارعا, ستۋدەنتتەرگە, كەشە عانا قولىنا ديپلوم العان جاس ماماندارعا الداعى ومىرلەرىنە ساتتىلىك تىلەپ, مەملەكەت ءاردايىم وسكەلەڭ ۇرپاقتىڭ ءبىلىم نارىمەن سۋسىنداۋىنا جاعداي جاساي بەرەتىنىن مالىمدەدى.
شاھاردىڭ باس ۇستازىنىڭ ايتۋىنشا, پرەزيدەنت جولداۋدا بايان ەتكەندەي بۇگىنگى ءبىلىم سالاسىنداعى باستى مىندەت ول – باسەكەگە قابىلەتتى جاستار تاربيەلەۋ, سولاردىڭ ساپالى ءبىلىم الۋىنا بار مۇمكىندىكتى قاراستىرۋ. سونىمەن بىرگە شەتەلدىك ءبىلىمنىڭ قولجەتىمدىلىگى دە ماڭىزدى. مەكتەپ تۇلەكتەرىنە, ۋنيۆەرسيتەت بىتىرۋشىلەرگە شەتەلدىك جوعارى وقۋ ورىندارىنا تۇسۋگە تاڭداۋ اۋقىمى كەڭەيسە, سونىڭ ءوزى – ءبىر باقىت. ويتكەنى بۇگىنگى جاس تەك ءوز وتانىندا شەكتەلىپ قالماي جەر كەزىپ, ەل تانىپ ءبىلىمنىڭ قاينار بۇلاعىنان قانىعا سۋسىنداۋى قاجەت. ال وسىنداي يگى ءىس-شارا جاستاردىڭ جان-جاقتى دامۋىنا, ءبىلىم كوكجيەگىن كەڭەيتۋىنە, ءارى الىستى جاقىنداتا تۇسكەن بۇگىنگى جاھاندانۋ داۋىرىندە جەر شارىنىڭ تۇكپىر-تۇكپىرىندەگى دارىندى ۇرپاقتىڭ ءبىر-بىرىمەن تاجىريبە الماسۋىنا داڭعىل جول اشادى.
ۇيىمداستىرۋشىلار مالىمدەگەندەي, جالپى بيىل «International Educational Fair – 2023» حالىقارالىق ءبىلىم كورمەسى وسىمەن جەتىنشى مارتە ءوتىپ وتىر. قالا اكىمدىگى مەن قاراپايىم حالىق كەلەسى حالىقارالىق ءبىلىم كورمەسىندە دە وسىنداي ماڭىزدى ءارى قىزىقتى ۇسىنىستار مەن تالاپتاردىڭ بولاتىنا سەنىم ءبىلدىردى.
شىمكەنت
