پرەزيدەنت وسى ماسەلەگە وراي ىشكى ىستەر مينيسترلىگىنە ستۋدەنتتىڭ ولىمىنە قاتىستى بارلىق جايدى مۇقيات تەكسەرىپ, ءمان-جايدى جان-جاقتى تەكسەرۋدى تاپسىردى. «كىنالىلەر زاڭ تالاپتارىنا ساي جاۋاپقا تارتىلۋى كەرەك. پرەزيدەنت بۇل ماسەلەنى ەرەكشە باقىلاۋعا الدى», دەپ حابارلادى اقوردانىڭ Telegram كانالىنداعى رەسمي پاراقشاسى. ىشكى ىستەر مينيسترلىگىنىڭ ورتالىق اپپاراتى مەن وبلىستىق پوليتسيا دەپارتامەنتى قىزمەتكەرلەرىنىڭ قاتىسۋىمەن ارنايى جەدەل-تەرگەۋ توبى قۇرىلىپ, وقيعانىڭ ءمان-جايىن انىقتاپ جاتىر. قازىر تەرگەۋ ارەكەتتەرىن جۇرگىزۋ دە قولعا الىندى. بارلىعى بەلگىلى بولعاننان كەيىن قۇقىقتىق باعا بەرىلەتىن بولادى. قازا بولعان 19 جاستاعى جىگىتتىڭ جوعارى تەحنيكالىق كوللەدجىنىڭ 4-كۋرسىنىڭ ءبىلىم الۋشىسى ەكەندىگى بىردەن بەلگىلى بولعان. جەلىلىك پوليتسيا بولىمشەسى قىلمىستىق كودەكستىڭ 344-بابىنىڭ 2-تارماعى بويىنشا قىلمىستىق ءىس قوزعادى. قازا تاپقان جىگىتتىڭ اناسى بۇل قازانىڭ ابايسىزدا بولعان وقيعا ەكەندىگىنە سەنبەيدى. قازىر ءتۇرلى جورامالدار دا ايتىلىپ جاتىر. باۋىر ەتى بالاسىنىڭ قازاسىنا جانى كۇيگەن اناسى بولسا ششۋچە قالاسىندا ۇيىمداسقان قىلمىستىق توپ بار دەپ ەسەپتەيدى. ايتۋىنا قاراعاندا, وزگە بالالارمەن دە بىرنەشە مارتە كيكىلجىڭ بولسا كەرەك. اقشا بوپسالاۋ مەن پسيحولوگيالىق قىسىم بولعان. ۇيىمداسقان قىلمىستىق توپ بۇرىن دا ستۋدەنتتەن بىرنەشە مارتە اقشا تالاپ ەتكەن ەكەن.
قازان ايىنىڭ بەسىنەن التىسىنا قاراعان ءتۇنى بالاسى ۇيدەن شىعىپ كەتسە كەرەك. ارادا نەبارى جارتى ساعات وتكەننەن كەيىن ءولى دەنەسى تەمىرجول بويىنان تابىلعان. قايعىدان قارا جامىلعان اناسى بولسا بالام ومىرگە قۇشتار, الدىنا قويعان ۇلكەن ماقساتى, ارمانى بار ەدى دەپ كۇيزەلىپ وتىر.
قازىر بۇل وقيعاعا قاتىستى قىلمىستىق كودەكستىڭ 105-بابى بويىنشا قوسىمشا قىلمىستىق ءىس قوزعالدى. تۋىستارىنىڭ ارىز-شاعىمىنا وراي جوعارىدا ايتىلعان ماسەلە ەگجەي-تەگجەي زەرتتەلىپ جاتىر.
اقمولا وبلىسى
