وسى كۇنى الماتى وبلىسىندا 40 كاسىپتىك-تەحنيكالىق ءبىلىم بەرۋ مەكەمەسى جۇمىس ىستەيدى. ولاردىڭ ۇزدىگىن انىقتاۋ ماقساتىندا ۇيىمداستىرىلاتىن ءداستۇرلى بايقاۋ بيىل دا جالعاسىن تاپتى. بايقاۋ شارتتارىنا سايكەس ءار وقۋ ورنى ماتەريالدىق-تەحنيكالىق بازاسىن تانىستىرىپ, جەتىستىكتەرىمەن ءبولىستى. مۇنداي ءىس-شارا كوللەدجدەردەگى باسقارۋ جۇيەسىنىڭ ساپاسى مەن باسەكەگە قابىلەتتىلىگىن ارتتىرۋمەن قاتار, تەحنيكالىق بازاسى مەن تسيفرلىق ينفراقۇرىلىمىن دامىتۋعا ىقپال ەتەرى ءسوزسىز.
– پرەزيدەنت تاپسىرماسى بويىنشا مەملەكەتتىك باعدارلامالاردان ۇلتتىق جوبالار فورماتىنا كوشۋ جۇزەگە اسىرىلىپ جاتقانى بارشاعا ايان. ء«بىلىمدى ۇلت» ساپالى ءبىلىم بەرۋ ۇلتتىق جوباسىنىڭ ءتورتىنشى مىندەتى – قولجەتىمدى جانە ساپالى تەگىن تەحنيكالىق جانە كاسىپتىك بىلىممەن قامتۋ, مەملەكەتتىك تاپسىرىس كولەمىن ۇلعايتۋ. بيىلعى وقۋ جىلىندا مەلەكەتتىك تاپسىرىس 100 پايىز ورىندالدى. الايدا NEET ساناتىنداعى جاستاردىڭ وقۋمەن قامتىلۋىن, جۇمىسسىزدىق ماسەلەسىن جويۋ, ەڭبەك نارىعى مەن ءبىلىم بەرۋ جۇيەسى اراسىنداعى بايلانىس تۇلەكتەردى بىتىرگەننەن كەيىن التى اي ىشىندە جۇمىسقا ورنالاستىرۋ ارقىلى باقىلاناتىنىن ەسكەرسەك, اتالعان ماسەلەلەر ءالى دە وزەكتى بولىپ وتىرعانىن كورەمىز. وتكەن وقۋ جىلىندا وڭىرلىك كاسىپورىنداردىڭ سۇرنىستارىنا سايكەس ماقساتتى وقىتۋ بويىنشا 100 ستۋدەنتتى قابىلداساق, بيىلعى وقۋ جىلىندا بۇل كورسەتكىشتى 200-گە ارتتىردىق. كاسىپورىندارمەن بىرلەسە اتقارعان جۇمىسىمىز ءۇش جاققا دا ءتيىمدى, – دەدى الماتى وبلىستىق ءبىلىم باسقارماسى باسشىسىنىڭ ورىنباسارى گۇلسارا يساعۇلوۆا.
2024-2025 وقۋ جىلىنىڭ ءبىلىم بەرۋ باعدارلامالارى جاڭا جالپىعا مىندەتتى ءبىلىم بەرۋ ستاندارتى نەگىزىندە ازىرلەنىپ, بىرىڭعاي اقپاراتتىق ورتانىڭ تىزىلىمىنە ءتورت كەزەڭ بويىنشا ەنگىزىلەتىن بولادى. وسى وزگەرىستەردى ەڭسەرۋدە وتاندىق وزەكتەندىرىلگەن كاسىبي ستاندارتتاردى, دۋالدى وقىتۋ جۇيەسىن, ءفورمالدى, ءفورمالدى ەمەس وقىتۋ تۇرلەرىن, ارتتىرۋدى, جاڭا كاسىپتەر اتلاسىنىڭ تالاپتارىنا سايكەس جاڭا ماماندىقتار اشۋ, تسيفرلىق بىلىكتىلىكتى جەتىلدىرۋ ماسەلەسىن ىسكە اسىرۋدى جان-جاقتى ويلاستىرا وتىرىپ, ورىنداۋ قاجەتتىگىن اتاپ ءوتتى.
– قازىرگى نارىقتىڭ سۇرانىسى تەحنيكالىق, قۇرىلىس ماماندىقتارىنا باسىمدىق بەرىپ وتىر. الايدا IT سالاسىنا ماماندار قاجەت دەگەن وقۋ ورىندارى ءالى كۇنگە «ەسەپتەۋ تەحنيكاسىنىڭ وپەراتورى» دەگەن ماماندىقتى جۇرگىزىپ وتىر. ەسكىدەن ارىلىپ, زاماننىڭ اعىسىنان قالماي وندىرىسكە ەنگەن جاڭالىقتاردى دەر كەزىندە باعىندىرۋىمىز قاجەت. الداعى وقۋ جىلىندا ءوڭىرىمىزدىڭ نارىعىنا, قوناەۆ قالاسىنىڭ دامۋىنا قاجەتتى «عيماراتتاردى جوبالاۋ مەن پايدالانۋدىڭ اۆتوماتتاندىرىلعان جۇيەلەرى», «عيماراتتاردى باسقارۋدىڭ زياتكەرلىك جۇيەسىنە قىزمەت كورسەتۋ تەحنيگى», «اقپاراتتىق قاۋىپسىزدىك», «اقپاراتتىق جەلىنى باعدارلامالىق قامتاماسىز ەتۋ» سىندى جاڭا ماماندىقتاردى اشىپ, بىلىكتىلىكتەردى كوبەيتۋ ارقىلى ءبىلىم الۋشىلاردى ماقساتتى وقىتۋ بويىنشا قابىلداۋىمىز كەرەك. سوندا عانا ءبىز وقۋ ورنىنىڭ ورنىقتى دامۋىن, ساپالى ءبىلىمنىڭ قولجەتىمدىلىگىن قامتاماسىز ەتەتىن بولامىز, – دەدى گ.يساعۇلوۆا.
بايقاۋ ەرەجەسىنە سايكەس اۋەلى «جاس مامان» جوباسىنا ەنگەن كوللەدج قىزمەتكەرلەرى ءوز تاجىريبەسىمەن ءبولىستى. بۇدان كەيىن مەكەمەلەردىڭ ارقايسىسى كاسىبي قىزمەت جەتىستىكتەرىن ايقىندايتىن سايىسقا ءتۇستى. ال ودان كەيىنگى كەزەكتە تابىستى ءبىلىم بەرۋ ۇيىمىنىڭ زاماناۋي مودەلى ۇسىنىلدى. بايقاۋعا قاتىسۋشىلار جارىستىڭ ءار تۋرىنا تياناقتى دايىندالعاندىعىن اڭعارتتى. سوندىقتان ارقايسىنىڭ جەڭىسكە دەگەن قۇلشىنىسى زور بولدى.
– وبلىستىق ۇزدىك كوللەدج بايقاۋىنا ۇلكەن دايىندىقپەن كەلدىك. كوللەدجدە 390 ستۋدەنت 6 ماماندىق بويىنشا ءبىلىم الادى. «جاس مامان» جوباسى بويىنشا 270 ملن 770 مىڭ تەڭگەگە زاماناۋي وقۋ قۇرالدارىن العان بولاتىنبىز, سول ارقىلى ستۋدەنتتەردىڭ ءبىلىم كوكجيەگى كەڭىپ, وندىرىستىك تاجىريبەلەرى ساپالى جۇرگىزىلىپ جاتىر, – دەيدى شەلەك پوليتەحنيكالىق كوللەدجىنىڭ ديرەكتورى قۋات دۇيسەباەۆ.
«ەڭ ۇزدىك كاسىپتىك ءبىلىم بەرۋ ۇيىمى – 2023» وبلىستىق بايقاۋىنىڭ قورىتىندىسى بويىنشا تالعار اگروبيزنەس جانە مەنەدجمەنت كوللەدجى 1-ورىن يەگەرى اتانسا, 2-ورىندى كاسىپتىك وقۋداعى كوپسالالى كوللەدج جەڭىپ الدى. ال 3-ورىنعا تالعار پوليتەحنيكالىق كوللەدجى تۇراقتادى. بايقاۋ جەڭىمپازدارىنا 100-300 مىڭ تەڭگە ارالىعىنداعى سەرتيفيكاتتار تابىس ەتىلدى. سونداي-اق تالعار جوعارى مەديتسينالىق كوللەدجى «يننوۆاتسيا شەبەرحاناسى», شەلەك پوليتەحنيكالىق كوللەدجى «جاڭاشىل كوللەدج» جانە قاسكەلەڭ كاسىپتىك-تەحنيكالىق كوللەدجى «جەتىستىك جولىندا» نوميناتسيالارى بويىنشا لاۋرەات اتاندى.
الماتى وبلىسى
