اعايىندىلاردىڭ اناسى 5 قازان كۇنى كەشكىلىك جۇمىستان ۇيىنە ورالعاندا بالالاردى تاپپاي قالعان. انا جۇرەگى ءبىر سۇمدىقتىڭ بولعانىن سەزدى مە ەكەن, بىردەن ۋچاسكەلىك ينسپەكتورعا حابارلاسىپ, دابىل قاعادى. گاليتسكوە اۋىلىنىڭ ۋچاسكەلىك ينسپەكتورى وزگە اۋىل تۇرعىندارىمەن بىرگە بالالاردى ىزدەۋگە كىرىسكەن.
«سول كۇنى ساعات 23:00-دە ەلدى مەكەننەن 500 مەتر جەردەگى اۋىل شارۋاشىلىق القاپتارىن سۋارۋعا ارنالعان جاساندى سۋ قويماسىنان بالالاردىڭ مۇردەلەرى تابىلدى. دەنەلەرىندە زورلىق-زومبىلىق بەلگىلەرى جوق. اتالعان وقيعا بويىنشا سوت-مەديتسينالىق ساراپتاما تاعايىندالدى, ونىڭ قورىتىندىسى بويىنشا پروتسەسسۋالدىق شەشىم قابىلدانادى», دەدى وڭىرلىك پوليتسيا دەپارتامەنتىنىڭ ءباسپاسوز قىزمەتى.
پوليتسەيلەر گيدروتەحنيكالىق قۇرىلىستىڭ اينالاسى قورشالماعانىن, ال اۋماقتىڭ وزىندە جارىق مۇلدە تارتىلماعانىن انىقتادى. سۋعا جاقىنداۋعا نەمەسە تۇسۋگە تىيىم سالاتىن بەلگىلەر دە تىم از. «مۇنىڭ بارلىعى جاقىن اۋىلدا تۇراتىن ازاماتتاردىڭ ومىرىنە زور قاۋىپ ءتوندىرىپ كەلگەن» دەگەن بايلام جاسادى ءتارتىپ ساقشىلارى. قايعىلى وقيعاعا بايلانىستى قىلمىستىق كودەكستىڭ 277-بابى 3-ءبولىمى جانە 254-بابى بويىنشا, ياعني «ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ جانە قىزمەتتىك مىندەتتەرىن ادال اتقارماۋ بويىنشا» تەرگەۋ امالدارى جۇرگىزىلىپ جاتىر.
انىقتاپ بىلگەنىمىزدەي, اعالى-ءىنىلى بالالار جەرگىلىكتى ورتا مەكتەپتە 3 جانە 4-سىنىپتاردا وقىعان. ال بالالاردىڭ ولىمىنە سەبەپ بولعان جاساندى سۋ قويماسى جەرگىلىكتى «گاليتسكوە» جشس-نا قارايدى دەدى باسشىسى الەكساندر كاسيتسىن. 170 مىڭ شارشى مەتر سۋ سىياتىن قۇرىلىس 2001 جىلى قولدانىسقا بەرىلگەن. ول ارقىلى 347 گەكتار جەردىڭ ەگىستىگى سۋارىلىپ كەلىپتى. تۇتاس اۋىلدىڭ حالقىن ەڭبەكپەن قامتىپ وتىرعان سەرىكتەستىك – ەلىمىزدەگى ءىرى شارۋاشىلىقتاردىڭ ءبىرى. مۇندا ەگىن, مال جانە ءسۇت شارۋاشىلىعىنا ءمان بەرىلەدى. بىرنەشە تاۋارلى ءسۇت فەرماسى, مال بورداقىلاۋعا ارنالعان زاماناۋي ۇلگىدەگى كەشەندەرى بار. شارۋا باسشىسى سۋ قويماسىنداعى قاۋىپسىزدىك ەرەجەلەرىن قالايشا قاپەردەن شىعارىپ العانى تاڭعالدىرادى.
پاۆلودار وبلىسى
