ماي جانە باياناۋىل اۋداندارىنداعى مال باققان اعايىن قۇرعاقشىلىق سالدارىنان شابىندىق جەرلەرگە ۋاقىتىندا شىعا المادى. تەك بۇل كەمشىلىكتىڭ ورنىن تامىز ايىندا باستالعان جاڭبىرلى كۇندەر تولتىرعانداي بولعان. الايدا جازدىڭ بالاۋسا شوبىندەي ەمەس, كۇزگى شاۋىپ جاتقان ءشوپتىڭ ساپاسى كوڭىلدەن شىقپاي تۇر. ماي اۋدانىنىڭ اكىمى اعىباي ءامىريننىڭ اقپارىنشا, سالماعى 270-300 كگ تارتاتىن ءبىر وراما ءشوپتىڭ قۇنى 7 مىڭ تەڭگەدەن 11 مىڭ تەڭگەگە دەيىن. ال شىلدە ايىندا سىرتتان جەتكىزىلگەن تۇكتەلگەن (18-20 كگ-لىق) ءشوپتىڭ باعاسى 1200 تەڭگە بولسا, قازىرگى كۇنى ونى شابىندىقتان 650 تەڭگەگە, جەتكىزىپ بەرسە, 800 تەڭگەگە ساتىپ الۋعا بولادى. بيىل وڭىردەگى قىستاقتارعا شامامەن 122 مىڭ توننا مال ازىعى جەتكىزىلۋى كەرەك. ونىڭ 50-60 پايىزىن جەرگىلىكتى شابىندىقتار قامتاماسىز ەتەدى. ايتپاقشى, اۋداندا الداعى جىلدارى «كولىباي» كولتابانىن قالپىنا كەلتىرۋ جوسپارلانىپ وتىر. ول ىسكە قوسىلسا, جاڭادان 16,5 مىڭ گەكتار شابىندىق پايدا بولادى.
باياناۋىل اۋدانىنىڭ اكىمى ارداق كىسەنتاەۆ ءبىر وراما ءشوپتىڭ قۇنى 10-14 مىڭ تەڭگە تۇراتىنىن ايتادى. شابىندىقتان الىپ كەتسە, 10 مىڭ تەڭگەدەن بوساتادى. ايماۋىتوۆ, تورايعىر, مايقايىڭ, بىرلىك ەلدى مەكەندەرىنىڭ جۇرتشىلىعى ءشوپتى وزگە ايماقتاردان ساتىپ الىپ جاتىر. ال جاڭاتىلەك, ساتباەۆ, مۇرىنتال اۋىلدارىنا مال ازىعى قاراتومارداعى شابىندىقتاردان جەتكىزىلىپ جاتىر. بۇگىندە اتالعان اۋدان اۋماعىندا 96 مىڭ ءىرى قارا, 65 مىڭ جىلقى, 137 مىڭداي ۇساق مال بار.
