مينيستر مەملەكەت باسشىسىنىڭ حالىققا مەديتسينالىق كومەك كورسەتۋدىڭ تيىمدىلىگىن ارتتىرۋ جونىندەگى تاپسىرمالارى بويىنشا كەشەندى ءارى جان-جاقتى جۇمىس جۇرگىزىلەتىنىن جانە حالىقتىڭ ءومىر ءسۇرۋ ورتاشا ۇزاقتىعى 74,4 جاسقا دەيىن وسۋىنە وڭ اسەر تيگىزىپ جاتقانىن جەتكىزدى. الايدا ا.عينيات ءبىراز تۇيتكىلدىڭ بارىن دا جاسىرمادى. اسىرەسە قازىر ەلىمىزدە 4 مىڭعا جۋىق دارىگەر تاپشى ەكەن.
«دارىگەرلەر, ونىڭ ىشىندە اسا تاپشى ماماندىقتار بويىنشا قاجەتتىلىكتى قامتاماسىز ەتۋ ءۇشىن 2023 جىلى رەسپۋبليكالىق بيۋدجەت ەسەبىنەن شامامەن 6 مىڭ ءبىلىم بەرۋ گرانتى ءبولىندى. بيىل مەديتسينالىق جوعارى وقۋ ورىندارىنان شامامەن 7 مىڭ دارىگەر ءبىتىردى. وڭىرلەردىڭ اقپاراتى بويىنشا 3 مىڭنان اسا دەنساۋلىق ساقتاۋ مامانى جۇمىسقا ورنالاستىرىلدى. بۇل رەتتە 601 مامانعا ۇستەمەاقى ءبولىندى, تۇرعىن ۇيمەن 384 ادام قامتاماسىز ەتىلگەن, وزگە دە قولداۋ شارالارى 74 مامانعا كورسەتىلگەن», دەدى ۆەدومستۆو باسشىسى.
ونىڭ ايتۋىنشا, بيىل ۇزدىكسىز ينتەگراتسيالانعان مەديتسينالىق ءبىلىم بەرۋدىڭ جاڭا مودەلى ەنگىزىلگەن.
«كوپبەيىندى مامانداردىڭ قاجەتتىلىگىن جابۋ ءۇشىن مەديتسينالىق ماماندىقتار بويىنشا سەرتيفيكاتتاۋ كۋرستارىنىڭ ءتىزىمى كەڭەيتىلدى. الىس جانە جاقىن شەتەل مەديتسينالىق جوعارى ورىندارىنىڭ تۇلەكتەرى وسى جىلدان باستاپ ەلىمىزدە دەنساۋلىق ساقتاۋ سالاسىندا ماماندى سەرتيفيكاتتاۋ راسىمىنە قول جەتكىزە الادى. سونداي-اق ءتيىستى زاڭ قابىلدانعاننان كەيىن مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ جۇيەسى ەنگىزىلە باستايدى. بۇل شارالار پاتسيەنتتەردىڭ قۇقىعىن قورعاۋدى, مەديتسينا قىزمەتكەرلەرىن قۇقىقتىق قورعاۋدى قامتاماسىز ەتۋگە, دارىگەر ماماندىعىنا قۇرمەت پەن مارتەبەنى كوتەرۋگە, سونداي-اق جاس بۋىندى دەنساۋلىق ساقتاۋ سالاسىنا تارتۋعا ارنالعان», دەدى ا.عينيات.
سونداي-اق باق وكىلدەرى ەلىمىزدە ءدارىحانالار انتيبيوتيكتەردى دارىگەردىڭ نۇسقاۋلىعىنسىز ساتاتىن جاعدايلار كەزدەسەتىنىن ايتىپ, مينيسترلىك تاراپىنان انتيبيوتيكتەردى باقىلاۋعا الۋعا, ءدارىحانا يەلەرىنە قانداي شارا قولدانۋعا بولاتىنىن سۇرادى. بۇل رەتتە ا.عينيات ەلىمىزدە پرەپاراتتاردى رەتسەپتىسىز ساتاتىن ءدارىحانالار كوپ ەكەنىن راستادى. ءمينيستردىڭ مالىمەتىنشە, جىل باسىنان بەرى ءدارىحانالاردا پرەپاراتتاردى رەتسەپتىسىز ساتقان كاسىپ يەلەرىنە 6 ملن 300 مىڭ تەڭگە ايىپپۇل سالىنعان.
«رەتسەپتىسىز ساتقان دارىلەر بويىنشا كەلىپ تۇسكەن شاعىمدار بار. ءتيىستى كوميتەت تەكسەرىپ, ول دارىحانالارعا زاڭ اياسىندا ايىپپۇل سالىندى. ەگەر قايتادان زاڭ بۇزۋشىلىق انىقتالاتىن بولسا, ءبىزدىڭ ليتسەنزيانى قايتارىپ الۋعا قۇقىعىمىز بار. سوندىقتان بۇلاردىڭ بارلىعى جەكە كاسىپكەر بولعاندىقتان, ولارعا ماراتوري جاريالانعان ەدى. سول سەبەپتى ءبىزدىڭ مەملەكەتتىك ورگاندار ول جەرگە كىرە الماعاندىقتان ءبىز تەك حالىقتان تۇسكەن شاعىم بويىشا جۇمىس ىستەيمىز. كوميتەتكە دەر كەزىندە تۇسكەن شاعىم بولسا, ءدارىحانالاردىڭ بارلىعى تەكسەرىلىپ, اكىمشىلىك جازاعا تارتىلادى», دەدى مينيستر.
بۇعان قاتىستى ناقتى سانى مەن ايىپپۇل كولەمى تۋرالى اقپاراتتى فارماتسەۆتيكالىق مەديتسينالىق كوميتەتىنىڭ وكىلى ءلاززات قاشقىنباەۆا تولىقتىرىپ ءوتتى.
«قازىرگى 9 ايدىڭ ىشىندە 65 اكىمشىلىك شارا قولدانىلىپ وتىر. بۇل – دارىلىك زاتتاردى رەتسەپتىسىز ساتقاندار. ولارعا ايىپپۇل سالىندى. مۇنداي جۇمىستار ءالى دە جالعاسادى. ويتكەنى ازاماتتاردىڭ شاعىمى بويىنشا جانە كاسىپكەرلىك كودەكس بويىنشا ءبىز تەكسەرۋدى ۇيىمداستىرا الامىز. ازىرگە بيىل ليتسەنزياسىن قايتارىپ الۋ جاعدايى بولمادى. تەك ليتسەنزيانى ەكى ايعا دەيىن توقتاتۋ دەرەگى بولدى, بىراق ليتسەنزياسىن تارتىپ الۋ جاعدايىنا دەيىن جەتپەدى», دەدى ل.قاشقىنباەۆا.
ونىڭ ايتۋىنشا, قازىر ەلىمىزدە 7 400-گە جۋىق دارىلىك پرەپارات قورى بار. ونىڭ 1 738-ءى رەتسەپتىسىز ساتىلعان.
ءسوز سوڭىندا مينيستر ەلىمىزگە كوروناۆيرۋستىڭ جاڭا شتامى كەلگەنىنەن دە قۇلاعدار ەتتى.
«سوڭعى زەرتتەۋ دەرەكتەرى بويىنشا ەلىمىزگە «ەريس» دەپ اتالاتىن «وميكرون» شتامى كەلدى. قازىر بارلىق ەل مەن ايماقتا «وميكروننىڭ» جاڭا شتامدارى تىركەلىپ جاتىر. سىرتقى ورتادا كوروناۆيرۋس اينالىمى كەزىندە مۋتاتسيالار پايدا بولادى, اي سايىن ددۇ الەمدە كوپتەگەن ءتۇرلى شتامدى تىركەيدى. شتامم قانداي بولسا دا, كلينيكالىق كورىنىس بىرتىندەپ وزگەرەدى, اۋرۋ كەزەڭى قىسقارادى, ورتاشا نەمەسە جەڭىلگە اۋىسادى. قازىر تەك 35 ادام ستاتسيونارلىق ەمدەۋدە جاتىر. بۇل – قوسىمشا اۋرۋلارى بار قارت ادامدار», دەدى مينيستر.
