فوتو: primeminister.kz
«Amanat» پارتياسىنىڭ, اۋىل شارۋاشىلىعى, تسيفرلىق دامۋ جانە اەروعارىش ونەركاسىبى مينيسترلىكتەرىنىڭ, وبلىس اكىمىنىڭ وكىلدەرى قاتىستى. كەڭەستە «اۋىل اماناتى» جوباسىنىڭ ورىندالۋ بارىسى ايتىلدى.
«اۋىل شارۋاشىلىعى ءمينيسترىنىڭ ورىنباسارى باعلان بەكباۋوۆ باعدارلاما اياسىندا بولىنگەن 100 ملرد تەڭگەنىڭ 51%-دان استامى يگەرىلگەنىن جەتكىزدى. الايدا كەي وڭىرلەردە بۇل كورسەتكىش 10%-عا دا جەتپەيدى. ەسەسىنە كەي ايماقتار بەكىتىلگەن سومانى تولىق يگەرىپ, نەسيە الۋعا وتىنىشتەر قابىلداۋدى توقتاتتى. ماسەلەن, قوستاناي وبلىسى اكىمىنىڭ ورىنباسارى رينات مۇحامەتقاليەۆ بۇگىنگە دەيىن 141 جوباعا ءوتىنىش كەلىپ تۇسكەنىن ايتتى. ال بولىنگەن 1,6 ملرد تەڭگە جەتكىلىكسىز, تاعى 800 ملن تەڭگە قاجەت», دەلىنگەن ۇكىمەت حابارلاماسىندا.
ۇكىمەت باسشىسىنىڭ ورىنباسارى ت.دۇيسەنوۆا وڭىرلەردىڭ يگەرمەگەن قاراجاتىن قاجەتسىنگەن وزگە وبلىستارعا ءبولۋدى زاڭ شەڭبەرىندە قاراپ جۇزەگە اسىرۋدى جۇكتەدى.
«اۋىل اماناتى» جوباسى اياسىندا اۋىل تۇرعىندارى 5-7 جىلعا 2,5 پروتسەنتتىك ۇستەمەمەن ميكرونەسيەلەر راسىمدەي الادى. بىراق تۇركىستان وبلىسىندا بيۋدجەتتىك مەكەمە قىزمەتكەرلەرى ياعني مۇعالىمدەر مەن دارىگەرلەر نەسيە راسىمدەۋگە اسا ىقىلاس تانىتىپ, ءوتىنىش بىلدىرگەن. الايدا نەسيە بەرۋدىڭ ەرەجەسىندە بيۋدجەتتىك, مەملەكەتتىك قىزمەتكەرلەرگە «اۋىل اماناتى» جوباسى بويىنشا نەسيە راسىمدەلمەيدى. تالقىلاۋ كەزىندە بۇل ماسەلە دە نازاردان سىرت قالعان جوق. اۋىل ازاماتتارىنىڭ ءال-اۋقاتىن ارتتىرۋ ماقساتىندا جۇزەگە اسىرىلاتىن «اۋىل اماناتى» بويىنشا نەسيە راسىمدەگىسى كەلەتىن جاندارعا ءتۇرلى توسقاۋىلداردىڭ دا كەزىگەتىنى كەڭەستە ايتىلدى.
ت.دۇيسەنوۆا كەدەرگىلەردى جويىپ, سانعا ەمەس, ساپاعا جۇمىس ىستەۋ قاجەت ەكەنىن ەسكەرتتى.
