«جاس دارىن» مامانداندىرىلعان مەكتەپ-ليتسەيىندە قازاق ءتىلى مەن ادەبيەتى ءپانىنىڭ مۇعالىمى بولىپ ەڭبەك ەتەتىن ساندىگۇل ەرمۇراتقىزى تاربيەلەگەن وقۋشىلاردىڭ جەتكەن جەتىستىكتەرىنە كوز تويادى. ۇستاز ەڭبەگى وقۋشىنىڭ وقۋداعى ۇلگەرىمىمەن, ءبىلىم سالاسىنداعى تابىستارىمەن ولشەنەتىنى ءمالىم. تەك وبلىستىق بايقاۋلاردى بىلاي قويعاندا, كەيىنگى ەكى جىلدا ونىڭ شاكىرتتەرى اراسىنان ق.بىتىباەۆا اتىنداعى رەسپۋبليكالىق وليمپيادانىڭ وبلىستىق كەزەڭىنىڭ جەڭىمپازى, ەكىنشى ورىن يەگەرى, رەسپۋبليكالىق ءابىش وقۋلارىنىڭ, رەسپۋبليكالىق ءپان وليمپيادالارىنىڭ جۇلدەگەرلەرى شىقتى. پەداگوگ ونىمەن شەكتەلمەي, وڭىردەگى قازاق ءتىلى مەن ادەبيەتى ءپانى مۇعالىمدەرىنىڭ شىعارماشىلىق توبىمەن بىرلەسىپ, «وليمپياداعا دايىندىق» جيناعىن قۇراستىرىپ, وقۋشىلاردىڭ وقۋ ساۋاتتىلىعىن ارتتىرۋدىڭ ءادىس-تاسىلدەرى تۋرالى ءىس-تاجىريبەسىمەن ءبولىستى. رەسپۋبليكالىق مەرزىمدى باسىلىمداردا ءتۇرلى تاقىرىپتا ماقالالارى جاريالاندى.
ۇستازدىڭ ايتۋىنشا, بۇگىندە وقۋشىلاردىڭ جان-جاقتى جەتىلۋىنە, ساپالى ءبىلىم الۋىنا بارلىق جاعداي جاسالعان.
«بالالاردىڭ كوكىرەگىندەگى ءبىلىم ساۋلەسىن جاعۋ, وقۋعا دەگەن قىزىعۋشىلىعىن ارتتىرىپ, بويىندا سەنىمدىلىك ۇيالاتۋ ءار مۇعالىمنىڭ ميسسياسى بولسا كەرەك. وقۋشىنىڭ دارىنىن اشىپ, تالپىندىرۋ ءۇشىن وعان جەڭىستىڭ ءدامىن سەزدىرۋ ماڭىزدى. وزىنە سەنىمدى بولا تۇسكەن ءجاسوسپىرىم جاقسى باعىت الىپ, ءسوزى دە نىقتالا تۇسەتىنىن بايقايمىز. وسى ۋاقىتقا دەيىن ءتۇرلى رەسپۋبليكالىق بايقاۋلار مەن وليمپيادالارعا 10-نان اسا وقۋشىم قاتىسىپ, جۇلدەسىز قايتقان ەمەس. ءبىلىم دودالارىنىڭ قاي-قايسىسى بولسىن جاس ۇرپاقتى زەردەلى بولۋعا, ۇلتتىق سالت-ءداستۇرىمىزدى تەرەڭىرەك مەڭگەرىپ, ءبىلىمدى بولۋعا جەتەلەيدى. مىسال ءۇشىن كىتاپ وقۋ بايقاۋى, اباي شىعارمالارى, سالت-ءداستۇر, ۇلتتىق قۇندىلىقتار بويىنشا جىل سايىن ءتۇرلى سايىستار وتەدى. وقۋشىلاردىڭ كىتاپ وقۋعا دەگەن ىنتاسىن ارتتىرۋ ءۇشىن بۇگىندە مەكتەبىمىزدە ءار ساباق الدىندا 5 مينۋت كىتاپ وقىتامىز. ولاردىڭ زەيىنىن كىتاپتاعى بىلىمگە اۋدارۋ ىجداعاتتىلىقتى قاجەت ەتەدى. سەبەبى بۇگىنگى بالالار ءتۇرلى گادجەتتەرگە, ينتەرنەتتەگى ويىندارعا قۇمارتىپ تۇراتىنى بەلگىلى. ءبىلىم الەمىنە قىزىقتىرۋ ءۇشىن ءتۇرلى ءادىس-تاسىلدەردى قولدانامىز. شىنداپ كەلگەندە, وقۋشىلاردىڭ بويىنداعى ەنجارلىق پەن جالقاۋلىقتى, ەرىنشەكتىكتى جەڭۋدە بۇگىندە پەداگوگتەر قاۋىمى ۇلكەن شارۋالار اتقارىپ وتىر», دەيدى س.احانباەۆا.
شاكىرتتەرىنىڭ الدى بۇگىندە جوعارى وقۋ ورىندارىن ءتامامداپ, ءتۇرلى سالادا ەڭبەك ەتىپ ءجۇر. سونىڭ ءبىرى – وبلىس ورتالىعىنداعى مەكتەپتەردىڭ بىرىندە قازاق ءتىلى مەن ادەبيەتىنەن ساباق بەرەتىن ينگا گروسس. ۇلتى نەمىس بولا تۇرا, مەملەكەتتىك ءتىلدى جەتىك مەڭگەرگەن پەداگوگ اباي, ماعجان وقۋلارىندا جۇلدەنىڭ الدىن بەرمەيدى.
پاۆلودار
