العاشقى تەكسەرىس جۇمىستارى «3-ەنەرگوورتالىق» اق-دان باستالدى. سودان سوڭ № 3 اۋداندىق قازاندىق پەن مەگاپوليستىڭ اكىمشىلىك-ىسكەرلىك ورتالىعىنداعى 160 گكال قۇرايتىن قازاندىعىندا جالعاستى.
كوميسسيا «3-ەنەرگوورتالىق» اق-نىڭ قىسقى ماۋسىمعا دايىن ەكەنىنە كوز جەتكىزدى. قۋاتتىلىعى 60 گكال قۇرايتىن №3 اۋداندىق قازاندىق تا جىلىتۋ ماۋسىمىنا ءازىر. قازاندىق 219 كوپقاباتتى تۇرعىن ءۇيدى جىلۋمەن قامتاماسىز ەتەدى. اكىمشىلىك ىسكەرلىك ورتالىعىنداعى 160 گكال قازاندىعىنان 123 كوپقاباتتى تۇرعىن ءۇي جىلۋ الادى. ول دا قىستا جىلۋ بەرۋگە دايىن.
مەگاپوليستە 2 076 كوپقاباتتى تۇرعىن ءۇي بار. 464 بيۋدجەتتىك مەكەمە جۇمىس ىستەيدى. وسىلاردىڭ بارلىعى جىلىتۋ ماۋسىمىنا دايىندىقتارىن اياقتادى. دەي تۇرعانمەن قالا باسشىسى جاۋاپتى سالا وكىلدەرىنە قىستىگۇنى جىلۋدان ماسەلە تۋىنداماۋ كەرەكتىگىن ەسكەرتتى.
وتكەن قىستا قاتتى اياز بولىپ, شىمكەنتتە ءبىراز ءۇيدىڭ جەرتولەدەگى قۇبىرلارى قاتىپ قالعان. «سۋ ارناسى-ماركەتينگ» جشس جۇمىسشىلارى كۇندىز-ءتۇنى ۇيلەردى ارالاپ, قاتىپ قالعان قۇبىرلاردى ەرىتىپ اۋرەگە ءتۇستى. نەگىزىنەن بۇل جۇمىس ولاردىڭ مىندەتىنە كىرمەسە دە, تۇرعىنداردى ويلاپ ارەكەت ەتتى. بيىل دا وسىنداي جاعداي قايتالانباس ءۇشىن مەكەمە باسشىسى اناربەك ورمان جيىن وتكىزىپ, اكىمدىكتىڭ كومەگىمەن ۇيلەردىڭ جەرتولەلەرىن قىمتاۋ كەرەكتىگىن ايتقان. ويتكەنى بىلتىر قىستا جەرتولە, دالىزدەردىڭ تەرەزەلەرى جوق ۇيلەردە قۇبىرلار قاتتى ايازدا مۇز بوپ قاتتى. قىسقا دايىندىق جۇمىستارىندا وسى ماسەلە ەسكەرىلمەسە, بىلتىرعىداي جاعداي تاعى قايتالانۋى مۇمكىن. ونىڭ ۇستىنە سينوپتيكتەر وتكەن جىلعى ايازدار الداعى قىستا تاعى بولۋى مۇمكىن دەگەن بولجامدار ايتىپ جاتىر. جاسىراتىنى جوق, بىلتىرعى جىلىتۋ ماۋسىمىندا جىلۋعا بايلانىستى شاعىمدار بولدى. كەيبىر ۇيلەرگە ول دۇرىس بارمادى. بىراق بۇعان جىلۋ بەرۋشى مەكەمەدەن گورى, سول تۇرعىن ۇيلەردىڭ تۇرعىندارى ءبىرىنشى كەزەكتە جاۋاپتى. سەبەبى سالقىن تۇسپەي تۇرىپ ولار كوپقاباتتى ۇيدە سىعىمداۋ جۇمىستارىن جۇرگىزۋگە ءتيىس. قۇبىرلار ەسكىرسە, جاڭارتۋلارى كەرەك. ارينە, وعان اجەپتاۋىر قاراجات كەتەدى. بىراق جاڭعىرتۋ باعدارلاماسى جانە ءبىر ەسەپشوتقا قۇرىلعان تۇرعىن ۇيلەردىڭ جاڭا بىرلەستىگى ارقىلى بۇل ماسەلەنى شەشۋگە بولادى. سونىمەن كوپقاباتتى ۇيلەردىڭ جەرتولەسىندەگى تەرەزەلەر اينەكپەن قاپتالىپ, قىمتالدى ما, سىعىمداۋ جۇمىستارى بارىندە بىردەي جۇرگىزىلدى مە, ونى الداعى قىس كورسەتەدى. قالانى جىلۋمەن قامتاماسىز ەتۋشى مەكەمە «قۋاتجىلۋورتالىق» جشس ماگيسترالدى قۇبىرمەن ۇيلەردىڭ ىشكى قۇبىرلارىمەن تۇيىسكەن تۇسىنا دەيىن جىلۋ اكەلەدى. ءارى قاراي جىلۋدىڭ پاتەرلەرگە بارۋى ىشكى قۇبىرلاردىڭ جاعدايىنا بايلانىستى. سوندىقتان سىعىمداۋ جۇمىستارى قىسقى جىلىتۋ ماۋسىمىندا ماڭىزدى ءرول وينايدى. بۇگىنگى تاڭدا «قۋاتجىلۋورتالىق» «تاريفتەردى ينۆەستيتسياعا ايىرباستا» تاريفتىك ساياساتى بويىنشا ماگيسترالدى قۇبىرلاردى اۋىستىرىپ جاتىر. وسى كۇنگە دەيىن تۇركىستان, ا.بايتۇرسىنوۆ, ا.اسقاروۆ كوشەلەرىندە ۇلكەن ديامەترلى جىلۋ قۇبىرلارى جاڭالاندى. ولاردىڭ ارقايسىسىنىڭ ۇزىندىعى 500 مەتردەن اسادى. ەندىگى جەردە ورىنباەۆ كوشەسى مەن ءنۇرسات تۇرعىن الابىنداعى جىلۋ قۇبىرلارىنىڭ قۇرىلىس جۇمىستارى ءجۇرىپ جاتىر. ول 15 قازانعا دەيىن اياقتالاتىن بولادى.
ەنەرگەتيكا ۆيتسە-ءمينيسترى مەن قالا اكىمى تەكسەرىس جۇمىستارىمەن «بوزارىق» قوسالقى ستانساسىندا بولدى. شاھاردىڭ سولتۇستىك بولىگىن ساپالى ەلەكتر قۋاتىمەن قامتاماسىز ەتۋ ءۇشىن ستانسا 2021 جىلى ىسكە قوسىلعان. قۋاتتىلىعى 160 مۆت قۇرايدى. بۇگىندە قوسالقى ستانسا جۇكتەمەسى 47 مۆت-قا جەتكەن. اتالعان نىسان «وڭتۇستىك جارىق ترانزيت» جشس-نىڭ سەنىمگەرلىك باسقارۋىندا. وسىدان بىرەر اي بۇرىن جۇمىس ىستەپ تۇرعان 2 اۆتوترانسفورماتوردىڭ بىرەۋىندە اقاۋ پايدا بولىپ, ىستەن شىققان بولاتىن. اۆتوترانسفورماتور سەرىكتەستىك كومەگىمەن قايتا قالپىنا كەلتىرىلىپ, جۋىردا ىسكە قوسىلدى. سونداي-اق ۆيتسە-مينيستر ءىسساپار بارىسىندا مەگاپوليستىڭ 2035 جىلعا دەيىنگى ەلەكتر جۇيەسىن دامىتۋدىڭ كەشەندى جوسپارىمەن تانىستى.
گاز ماسەلەسىنە كەلسەك, 2022 جىلى قالاداعى 81 ەلدى مەكەننىڭ 50-ءى «كوگىلدىر وتىنمەن» قامتىلدى. 27 ەلدى مەكەنگە گاز جارتىلاي كىرگەن. 4 ەلدى مەكەنگە «كوگىلدىر وتىن» ەندى بارادى. ولار – قايناربۇلاق, تاۋەلسىزدىككە – 20 جىل, ساۋلە 276 ورام, ايكول ەلدى مەكەندەرى. وسى تۇرعىن الاپتارىنان 15 379 ابونەنت بار.
ال بيىلعى 8 ايدىڭ قورىتىندىسى بويىنشا تۇران (3-كەزەك), بوزارىق پەن اسار-2 شاعىن اۋداندارىندا تابيعي گاز جەلىسىنىڭ قۇرىلىس جۇمىستارى اياقتالىپ, تابيعي گازعا قوسىلدى. سونداي-اق جىل سوڭىنا دەيىن تاسساي, ساۋلە, سولتۇستىك ساياجاي شاعىن اۋداندارىنا گاز قۇبىرىن تارتۋ اياقتالادى. الدىن الا بەكىتىلگەن جوسپار سولاي.
سونىڭ ناتيجەسىندە مەگاپوليستە تابيعي گازبەن قامتىلۋ كورسەتكىشى 94%-دان 96%-عا وسپەك. سونىمەن قاتار ىنتىماق-2 شاعىن اۋدانىن تابيعي گازبەن قامتۋ ماقساتىندا مەردىگەر مەكەمەلەر انىقتالىپ, قۇرىلىس جۇمىستارىنا كىرىسىپ جاتىر. ەلدى مەكەنگە گاز كەلەسى جىلى باراتىن بولادى. سونداي-اق قاراجات ماسەلەسى تولىق قارالعان جاعدايدا قايناربۇلاق ەلدى مەكەنىن گازبەن قامتاماسىز ەتۋدىڭ ءى, ءىى كەزەڭىنىڭ قۇرىلىسى 2024 جىلى بىتەدى دەگەن جوسپار بار.
جالپى, قالانى قىسقى جىلىتۋ ماۋسىمىنا دايىنداۋ ماسەلەسىندە شاھاردى تابيعي گازبەن قامتۋ جۇمىستارىنىڭ ماڭىزى ەرەكشە. ويتكەنى كەزىندە مەگاپوليسكە كورشىلەس اۋدانداردان ءبىرتالاي ەلدى مەكەن قوسىلعان. ولاردىڭ ينجەنەرلىك ينفراقۇرىلىمىن شەشۋ قالا اكىمدىگىنىڭ كۇن تارتىبىندەگى ماسەلەسىنە اينالدى. قالادا جەكە سەكتورداعى ۇيلەر كوپ. ورتالىقتاندىرىلعان جىلۋ جۇيەسىمەن ولاردىڭ بارلىعىن قامتۋ ازىرگە مۇمكىن بولماي تۇر. حالىق قىستىگۇنى گاز پەشتەرى ارقىلى ۇيلەرىن جىلىتادى. سوندىقتان دا تۇرعىندارعا جايلى جاعداي قالىپتاستىرۋ ءۇشىن قالانى تۇگەل گازداندىرۋ ماسەلەسى وتە وزەكتى بولىپ تۇر. ەلدى مەكەندەرگە گازدىڭ بارۋى ءبىر ءىستىڭ بىتكەنى بولسا, ابونەنتتەۋ جۇمىستارى دا وزىنشە ءبىر ارەكەتتى تالاپ ەتەدى. وسى رەتتە تۇرعىندار كوشەدەن ۇيلەرگە قوسىلاتىن گازداندىرۋ جۇمىستارىنىڭ بارلىق قۇجاتتىق ءراسىمى جەڭىل تۇردە بولعانىن قالايدى.
شىمكەنت
