فوتو: akorda.kz
پرەزيدەنت سالتاناتتى شاراداعى سويلەگەن سوزىندە حالىقارالىق «شەلل» ەنەرگەتيكالىق كونتسەرنى ەلىمىزدىڭ مۇناي-گاز ونەركاسىبى سالاسىنداعى العاشقى شەتەلدىك ينۆەستورلاردىڭ ءبىرى ەكەنىن ايتتى. مەملەكەت باسشىسى «شەلل» كونتسەرنىنىڭ قازاقستانداعى قىزمەتىنىڭ 30 جىلدىعى سالا تاريحىنداعى ماڭىزدى كەزەڭ سانالاتىنىن دا جەتكىزدى.
– قيىن-قىستاۋ جىلدارى «شەلل» ەكونوميكامىزعا قوماقتى ينۆەستيتسيا قۇيىپ, جاڭا تەحنولوگيا, عىلىمي جەتىستىكتەر مەن باسقارۋدىڭ باعا جەتپەس تاجىريبەسىن اكەلدى. ءبىز كومپانيانىڭ بۇل ەڭبەگىن جوعارى باعالايمىز. سوڭعى 30 جىلدا «شەلل» ەل ەكونوميكاسىنا 18 ميلليارد دوللاردان استام ينۆەستيتسيا سالىپ, قازاقستانداعى ەڭ ءىرى شەتەلدىك ينۆەستورلاردىڭ ءبىرى رەتىندەگى پوزيتسياسىن نىعايتتى, – دەدى مەملەكەت باسشىسى.
«پرەزيدەنت «شەلل» كونتسەرنى باسقا دا سەرىكتەستەرمەن بىرگە ەلىمىزدە اۋقىمدى مۇناي-گاز جوبالارىن بەلسەندى جۇزەگە اسىرىپ جاتقانىن اتاپ ءوتتى. كومپانيا الەمدەگى ەڭ ءىرى مۇناي-گاز كوندەنساتى كەن ورىندارىنىڭ ءبىرى – قاراشىعاناقتىڭ وپەراتورى سانالادى. قاراشىعاناقتى كەڭەيتۋ جوباسىنىڭ كەزەڭدەرىن ۋاقتىلى ىسكە اسىرۋ سۇيىق كومىرسۋتەگىن ءوندىرۋدى 10-11 ميلليون توننا دەڭگەيىندە ساقتاۋعا ىقپال ەتەدى. – «شەلل» كونتسەرنىنىڭ جانە باسقا دا اكتسيونەرلەردىڭ ۇيلەسىمدى جۇمىسى قاشاعاننىڭ «عاسىر جوباسىن» ىسكە قوسۋعا مۇمكىندىك بەردى. بۇگىندە سولتۇستىك كاسپي جوباسى جاھاندىق ەنەرگيا نارىعىندا ماڭىزدى ءرول اتقارادى جانە ەلىمىزدەگى مۇناي ءوندىرىسىنىڭ 20 پايىزىن قامتيدى. كومىرسۋتەگىن وندىرۋدەن باسقا, ولاردى الەمدىك نارىقتارعا تاسىمالداۋ ءۇشىن ينفراقۇرىلىم قۇرۋدىڭ ماڭىزى زور. بۇل باعىتتاعى العاشقى تابىستى جوبا – كاسپي قۇبىر كونسورتسيۋمى. ونى جۇزەگە اسىرۋعا «شەۆرون», «ەني», «شەلل», «لۋكويل» جانە تاعى باسقا جەتەكشى مۇناي كومپانيالارى قاتىستى, – دەدى پرەزيدەنت. مەملەكەت باسشىسى قازاقستاندا ترانسۇلتتىق مۇناي-گاز كورپوراتسيالارىنىڭ ەڭبەك ەتۋى ەلىمىزدىڭ جوعارى ينۆەستيتسيالىق تارتىمدىلىعىن كورسەتەتىنىن, سونىڭ ىشىندە ينۆەستورلاردىڭ قۇقىقتارى مەن مۇددەلەرىن قورعاۋ باعىتىنداعى زاڭنامانىڭ تۇراقتى ساقتالاتىنىن ايتتى», دەلىنگەن حابارلامادا.
