ۋكراينا پارلامەنتى – جوعارعى رادا ەلدىڭ بلوكتارعا قوسىلمايتىن مارتەبەسىن بەكىتتى. بۇل ۇسىنىستى پرەزيدەنت ۆيكتور يانۋكوۆيچ ەنگىزىپتى. دەمەك, ەلدىڭ بۇرىنعى باسشىلىعى ناتو-عا كىرۋدى باعدار تۇتسا, ەندى وعان جول كەسىلدى.
بۇل شەشىممەن پرەزيدەنت يانۋكوۆيچ رەسەيدىڭ كوڭىلىن تاپقانداي. بىراق ول باتىستى دا ۇمىتپاي وتىر: يانۋكوۆيچ وزدەرىنىڭ ابحازيانىڭ, وڭتۇستىك وسەتيانىڭ تاۋەلسىزدىگىن تانىمايتىنىن مالىمدەدى. بۇل رەسەي ساياساتىنا ۇلكەن سوققى. جالپى ۋكراينا پرەزيدەنتى ەكى جاقتىڭ دا كوڭىلىن تاپقىسى كەلەدى.
مانساپقا باس ۇرماعان
گەرمانيانىڭ فەدەرالدىق پرەزيدەنتى حورست كەلەر قىزمەتىنەن كەتەتىنىن مالىمدەدى. كەتۋگە سەبەپ – جۇرتشىلىق ونىڭ قاجەت كەزىندە ەل مۇددەسى ءۇشىن كۇش قولدانۋ دا كەرەك دەگەن پىكىرىنە قاتتى سىن ايتقانىن قالاماپتى. كەتەم دەگەنگە بۇل ەل اسا قاتتى جالىنبايدى. كانتسلەر انگەلا مەركەل تەلەفون ارقىلى ۇگىتتەپ كورىپ ەدى, كونبەدى. سوندىقتان ول پرەزيدەنتتىككە ۇمىتكەردىڭ اتىن دا اتاپ جىبەردى – بيلەۋشى كواليتسيالىق ۇكىمەتتىڭ اتىنان ەڭبەك ءمينيسترى ۋرسۋلا فون دەر لايەن ۇسىنىلماق. ال سايلاۋ 30 ماۋسىمدا وتەدى.
قارۋعا داعدارىس جوق
ەكونوميكالىق داعدارىس كەزىندە كوپ سالا كۇيزەلەدى. اسىرەسە, الەۋمەتتىك سالاعا قارجى ازايىپ, حالىقتىڭ تۇرمىسى تومەندەيدى. بىراق قارۋعا جۇمسالاتىن قارجى كوبەيمەسە, ازايمايدى ەكەن. وتكەن جىلى قارۋعا بولىنگەن قارجى الەمدە 5,9 پايىزعا ءوسىپ, 1,5 تريلليون دوللارعا جەتىپتى. اسىرەسە, اقش, قىتاي, ءۇندىستان سياقتى ەلدەردە كوبىرەك وسكەن.
السىزدىگىن مويىندادى
جاپونيانىڭ پرەمەر-ءمينيسترى يۋكيو حاتوياما قىزمەتىنەن كەتتى. ول جىل تولماي قىزمەتىنەن كەتكەن ءتورتىنشى ۇكىمەت باسشىسى. سويتسە دە ونىڭ: “ەلدەگى جاعدايدى وڭالتا المادىم, جاپون حالقىن باتىر ەتكىم كەلىپ ەدى, بىراق قولىمنان كەلمەدى, ەڭ الدىمەن ءوزىمنىڭ السىزدىگىمنەن”, دەگەن ءسوزى جۇرتتىڭ ەسىندە قالاتىنى انىق. جاڭا پرەمەر-مينيستر بولىپ ۆيتسە-پرەمەر, دەموكراتيالىق پارتيانىڭ جاڭا ليدەرى ناوتو كان سايلاندى.
اقش – قارىزى كوپ ەل
قازىرگى زاماندا قارىزسىز ەل جوق. قارىز الۋ قاجەتتىلىككە اينالعان زامان. قارىز الىپ, ودان پايدا تاۋىپ جاتساڭ, ونىڭ ايىبى جوق. جانە قارىزدى دا جاعدايى بار ەل الادى. جاعدايى جوققا ەشكىم قارىز بەرمەيدى. راس, ءبىر ەلدىڭ قارىزى كوپ, ءبىر ەلدىڭ قارىزى از. الەمدەگى ەڭ الىپ ەل امەريكا دەسەك, ەڭ قارىزى كوپ تە سول اقش ەكەن. قازىرگى كۇنگە دەيىن ونىڭ قارىزى – 13 تريلليون دوللار. كەشەگى پرەزيدەنت دجوردج بۋش كەزىندە 4,9 تريلليونعا ءوسىپتى. پرەزيدەنت وباما ونى قىسقارتپاق بولىپ الەك. بىراق بيىل قارىز 14,3 تريلليون دوللارعا جەتپەك. جالعا جەر العان قىتايدىڭ حەيمۋنتسزيان پروۆينتسياسىنىڭ ۇكىمەتى رەسەيدىڭ شەكارالاس ايماعىنان 426,6 مىڭ گەكتار جەردى جالعا الىپ, وندا اۋىل شارۋاشىلىعى داقىلدارىن وسىرمەك بولىپ وتىر. مۇنداي تاجىريبە بۇعان دەيىن دە جۇزەگە اسىرىلىپ, ودان ەكى جاق تا پايدا كورگەن. ايتالىق, مۋدانتسزيان قالاسى بيىل 146,6 مىڭ گەكتاردى جالعا الىپتى. بۇل وتكەن جىلعىدان 42 پايىزعا كوپ.
چاۆەستىڭ تسەنزۋراسى
ۆەنەسۋەلانىڭ پرەزيدەنتى ۋگو چاۆەس ناعىز توتاليتارلىق ءسوتسياليزمنىڭ تارتىبىنە كوشكەنىن اڭعارتتى – ەلدە اقپاراتتاردىڭ تارالۋىن باقىلايتىن اگەنتتىك قۇرىلدى. ونىڭ ماقساتى تۋرالى ايتقاندا, ول مەملەكەتتىك مۇددەگە قايشى كەلەتىن حابارلارعا تىيىم سالماق. “تسەسنا” دەپ اتالاتىن بۇل اگەنتتىك, ارينە, ەڭ الدىمەن چاۆەسكە قارسى ايتىلعان سىندى مەملەكەتتىك مۇددەگە قارسى ارەكەت سانايتىنى بەلگىلى.
“اگاتانىڭ” اپاتى
وتكەن اپتادا ورتالىق امەريكا ەلدەرى “اگاتا” دەپ اتالاتىن داۋىلدان كوپ زارداپ شەكتى. قيراعان عيماراتتار, ب ۇلىنگەن جول, كوپىر, ەگىستىك, باۋ-باقشانى بىلاي قويعاندا, كۇنى بۇرىن حاباردار بولعانىنا قاراماي, 140 ادام قازا تاۋىپ, ونداعان ادام حابار-وشارسىز كەتتى. اسىرەسە, گۆاتەمالا كوپ زارداپ شەكتى. وندا 120 ادام قازا بولعان.
جىلىجايدا ەۋرو “وسەدى”
جىلىجايدا كوكونىس وندىرىلەدى جانە ونىڭ ونىمدەرى ايتارلىقتاي قىمبات بولادى, يەسىنە ۇلكەن پايدا كەلتىرەدى. بىراق گرۋزيانىڭ باتىسىنداعى گەگۋتي سەلوسىنداعى بوچوروشۆيلي دەگەننىڭ جىلىجايىندا تابىلعان ء“ونىمنىڭ” باعاسى تىم قىمبات بولىپ شىقتى – 2 ميلليون ەۋرو. سوندا كومىلگەن ەكەن. كىم كومگەنى ازىرگە ايتىلمايدى. جىلىجايدىڭ يەسى يسپانيادا جۇرگەن كورىنەدى. سونداي ء“ونىمدى” پوليتسياعا كىمنىڭ حابارلاعانى دا ازىرگە ايتىلماي وتىر. ءسىرا, مۇنىڭ ءبارى ۋاقىتشا شىعار, مۇنداي ء“ونىمنىڭ” يەسى بولماۋى مۇمكىن ەمەس.
ازىرلەگەن ماماديار جاقىپ.
