وڭىردە جىل باسىنان تاركىلەنگەن ەسىرتكى زاتتارىنىڭ كولەمى بىلتىرعا قاراعاندا 3 ەسە كوبەيگەن. ينتەرنەتتى پايدالانىپ, ەسىرتكىنى زاڭسىز تاراتۋ جەلىلەرىن قۇراتىن ازاماتتاردى قۇرىقتاۋ بۇگىندە قيىننىڭ قيىنى. پوليتسەيلەردىڭ ايتۋىنشا, ۇيىمداستىرۋشىلارى شەتەلدە وتىرعان سوڭ, ەسىرتكىنى جاسىرىن تۇردە بەلگىلى ءبىر جەرلەرگە سالىپ كەتەتىندەردىڭ جەتەكشىلەرىن تابۋ مۇمكىن ەمەس. بۇل – «ايران ىشكەن قۇتىلىپ, شەلەك جالاعان تۇتىلاتىن» ناقىلدىڭ ومىردەگى شىندىعى.
پاۆلودار قالالىق پوليتسيا باسقارماسى ەسىرتكى قىلمىسىنا قارسى ءىس-قيمىل ءبولىمى باستىعىنىڭ مىندەتىن اتقارۋشى نۇرجان ءبايبورىنوۆتىڭ سوزىنشە, وتكەن جىلى پوليتسەيلەر 66 كگ ەسىرتكى زاتتارىن تاركىلەسە, بيىل العاشقى 9 ايدا 190 كگ ەسىرتكى زاڭسىز اينالىمنان الىنعان. «بۇلار – گەروين, سينتەتيكالىق ەسىرتكى جانە كاننابيستىك توپتاعى زاتتار. جىل باسىنان بەرى ەسىرتكىنى ينتەرنەت ارقىلى ساۋدالاعان 27 قىلمىسكەردى ۇستادىق. ناشاقورلىق قازىرگى كۇنى قوعامنىڭ قاسىرەتى بولىپ تۇر. بۇل زاڭسىز بيزنەس جەلىلىك ماركەتينگ تۇرىنە اينالا باستاعان. بىزگە جەتكەن مالىمەتتەرگە سۇيەنسەك, ولاردىڭ ۇيىمداستىرۋشىلارى تمد نەمەسە ەۋروپا مەملەكەتتەرىندە وتىر. قولعا ءتۇسىپ جاتقاندار قاشىقتان بەرىلگەن پارمەندى ورىنداۋشىلار عانا. جاسىرىن سالىپ كەتەتىندەر نەگىزىنەن 20 مەن 30 جاس ارالىعىنداعى ازاماتتار, اراسىندا ءتىپتى كامەلەتكە تولماعاندار دا كەزدەسىپ جاتادى. بۇرىن وندايلاردىڭ كوبى الەۋمەتتىك جاعدايى تومەن, قىلمىسقا بەيىم ازاماتتار بولاتىن. الايدا بۇگىندە قىلمىسكەرلەردىڭ جالپى پورترەتى وزگەرىپ, ارالارىنان ارا-تۇرا اۋقاتتى وتباسىلاردان شىققان جەتكىنشەكتەر دە قولعا ءتۇسىپ جاتادى. ەسىرتكى ساۋداسىنا قاتىسى بار قىلمىسكەرلەر ەڭ ازى ءۇش جىل باس بوستاندىعىنان ايىرۋعا كەسىلىپ, جالپى رەجىمدەگى تۇزەۋ مەكەمەلەرىنە قامالادى. قىلمىسى ءتىپتى اۋىر بولسا, قالعان ءومىرىن تۇرمەدە وتكىزۋگە تۋرا كەلەدى. ينتەرنەتتىڭ كولەڭكەسىنە قامالعان ەسىرتكى بيزنەسى قوعام ءۇشىن وتە قاۋىپتى قۇبىلىسقا اينالىپ, ءبىز ايسبەرگتىڭ تەك ۇشىن عانا كورىپ وتىرمىز. جۇمىسىمىزدىڭ ءتيىمسىز تۇرعىدا ورىلۋىنە ساۋاتتى IT-مامانداردىڭ جوقتىعى دا اسەر ەتەدى», دەيدى ول.
قالا تۇرعىندارى ەسىرتكى سالۋشىلاردىڭ پودەزدەردى ءجيى جاعالايتىنىنا شاعىمدانادى. تاسىمالداۋشىلار ءۇي تۇرعىندارىنان قورقۋدى دا بىلمەيتىن كورىنەدى. پودەزد ىشىندەگى قۋىستارعا, پوشتا جاشىكتەرى مەن كوممۋنيكاتسيا جەلىلەرىنىڭ تۇيىسپە قوراپشالارىنا ورالعان زاتتاردى سالىپ, ارنايى كليەنتتەرگە كىرۋ وڭاي بولۋى ءۇشىن ءۇي ەسىكتەرىندەگى دوموفونعا ماگنيت جابىستىرىپ كەتەدى. بىلتىر پاۆلوداردا 16 جاسار بويجەتكەن ەسىرتكى تاراتىپ ءجۇرىپ قولعا تۇسكەن. اتا-اناسى قىزىنىڭ ساباقتان تىس ۋاقىتتا نەمەن اينالىسىپ جۇرگەنىن باقىلاۋسىز قالدىرىپ, وپىق جەدى. تاعى ءبىر جاعدايدا 18 جاستاعى بوزبالادان باقانداي 28 گرامم ەسىرتكى تابىلدى. پوليتسەيلەر مۇنداي كولەممەن ۇستالعان ازاماتتار قىلمىسى ءۇشىن تەمىر تورعا 15 جىل قامالاتىنىن ايتادى. نەگىزى پاۆلودار وبلىسىنداعى جاستاردىڭ 70 پايىزى قالالاردا تۇرادى. «جاستاردى سالاماتتى ءومىر سالتى مەن سپورتقا تارتۋ ءۇشىن مەملەكەتتىك مەكەمەلەرگە اۋقىمدى ءىس-شارالار جۇرگىزۋ كەرەك», دەپ سانايدى دەنساۋلىق ساقتاۋ سالاسىنىڭ وكىلدەرى.
وڭىرلىك ناركولوگيالىق ديسپانسەردىڭ مەديتسينالىق-الەۋمەتتىك وڭالتۋ بولىمشەسىنىڭ مەڭگەرۋشىسى, ناركولوگ ۆلاديمير گاريلەۆ سينتەتيكالىق جانە ديزاينەرلىك ەسىرتكى تۇتىنۋشىلار قاتارى جىلدان-جىلعا ارتىپ كەلە جاتقانىن جەتكىزدى. مۇنداي ازاماتتار وزدەرىنىڭ تاۋەلدىلىكتەرى تۋرالى دارىگەرلەرگە ءىس ناسىرعا شاپقانشا ايتپايدى ەكەن. سينتەتيكانى قولداناتىن جاسوسپىرىمدەر از ەمەس, سەبەبى ەسىرتكىنىڭ بۇل ءتۇرى قولجەتىمدى. «اتا-انالار بالالارىنىڭ كوزىنە ءجيى قاراپ, ءتارتىبىن كۇندەلىكتى باقىلاۋدا ۇستاۋى كەرەك», دەپ ەسەپتەيدى ول. ەسىرتكى قابىلداعان ادامنىڭ كوز قاراشىعى جارىق تۇسىرسە دە ارەكەت ەتپەيدى. قاراشىعى وتە كىشىرەيىپ نەمەسە ۇلكەيىپ كەتۋى مۇمكىن. ال ناشاقورلىقتىڭ شىرماۋىنا تۇسكەندەردى ەمحاناداعى پسيحيكالىق دەنساۋلىق كابينەتىنە الىپ كەلسە بولادى. «مۇندا پسيحياتر-ناركولوگ دارىگەرلەر قابىلدايدى. سوندىقتان باستاپقى بەتتە وسى ورتالىققا بارعان ابزال», دەگەن اقىلىن ايتتى مامان.
«ەگەر ادام ەم-دومدى قاجەت ەتسە, ول جەردە مەديتسينالىق تەكسەرۋدەن وتەدى دە ءارى قاراي ستاتسيونارعا باعىتتالادى. ستاتسيونارلىق ەمدەۋ ەرىكتى نەمەسە ءماجبۇرلى بولۋى مۇمكىن. ادامدار ەرىكتى تۇردە كەلگەندە ولار ەمدەۋدىڭ ءۇش كەزەڭىنەن وتەدى. العاشقىسى – ءدارى-دارمەكتىك كوررەكتسيا جانە ۋىتسىزداندىرۋ. ناشاقورلىقتىڭ سوماتيكالىق سالدارى بارىن ەسكەرە وتىرىپ, بۇل كەزەڭدە ەمدەلۋشىنى ارنايى دارىگەرلەر تەكسەرەدى. سوعان وراي ەم تاعايىندالادى ءارى ناۋقاس اداممەن پسيحولوگتەر جۇمىس ىستەيدى. ەكى-ءۇش اپتادان سوڭ ول ەكىنشى كەزەڭگە – پسيحولوگيالىق تەراپياعا جانە وڭالتۋعا جىبەرىلەدى. ونىڭ بۇل جەردەگى ماقساتى – بويىنداعى بيولوگيالىق جانە الەۋمەتتىك بەيىمدەلۋ ماشىقتارىن قالپىنا كەلتىرۋ. بۇل كەزەڭ ۇزاققا, ەكى-ءۇش ايعا سوزىلۋى عاجاپ ەمەس. وبلىس ورتالىعىندا رەسپۋبليكالىق عىلىمي-پراكتيكالىق ورتالىقتىڭ بولىمشەسى – الەۋمەتتىك وڭالتۋ بولىمشەسى جۇمىس ىستەپ تۇر. ەكى كەزەڭنەن قالىپتى وتكەن ەمدەلۋشىلەر اتالعان بولىمشەگە ورنالاسىپ, يگەرگەن ماشىقتارىن ءارى قاراي ورنىقتىرادى. ياعني ول جەردە تۇرمىستىق شارۋاشىلىقپەن اينالىسىپ, ءۇي جاعدايىنداعىداي تۇرادى. بۇل – سوڭعى كەزەڭ. وسىلايشا, ءبىز بۇرىنعى ناشاقوردى قالىپتى ومىرگە بەيىمدەيمىز», دەيدى دارىگەر.
ناشاقورلىقتان ايىقتىرۋدىڭ جالپى كۋرسى 12 ايعا دەيىن سوزىلادى ەكەن. ستاتسيوناردان سوڭ ەمدەلۋشى ءوزىنىڭ ەمحاناسىندا قارالىپ, ءارى قاراي ەمىن جالعاستىرا بەرەدى. دارىگەرلەر پسيحواكتيۆتى زاتتاردى قابىلداۋدىڭ اسەرى فيزيكالىق قانا ەمەس, پسيحيكالىق دەنساۋلىق ءۇشىن دە وتە قاۋىپتى ەكەنىن ەسكەرتەدى.
پاۆلودار وبلىسى
