كەڭەس وتىرىسىنىڭ كۇن تارتىبىندە مەملەكەت باسشىسى قاسىم-جومارت توقاەۆتىڭ «ادىلەتتى قازاقستان: بىرلىك, تۇراقتىلىق, دامۋ» اتتى قازاقستان حالقى اسسامبلەياسىنىڭ ءحححىى سەسسياسىندا بەرگەن تاپسىرمالارىن ورىنداۋ ماسەلەلەرى, سونداي-اق «ادىلەتتى قازاقستاننىڭ ەكونوميكالىق باعىتى» اتتى قازاقستان حالقىنا جولداۋىن ىسكە اسىرۋ ءۇشىن قۇرىلعان پارلامەنتتەگى ء«بىر ەل – ءبىر مۇددە» دەپۋتاتتىق توبىنىڭ قىزمەتى تالقىلاندى. بۇل دەپۋتاتتىق بىرلەستىك ءوز جۇمىسىن بيىل ماۋسىم ايىندا باستادى. ونى ساراپشىلار پارلامەنتاريزم دامۋىنىڭ جاڭا كەزەڭى دەپ باعالاپ وتىر. سەبەبى جالپىۇلتتىق بىرلىكتى نىعايتۋ ماسەلەلەرى بويىنشا پالاتاارالىق جانە پارتياارالىق ءوزارا ءىس-قيمىلدىڭ ناقتى قۇرالى قالىپتاستى.
كەڭەس وتىرىسىندا وقۋ-اعارتۋ ءمينيسترى عاني بەيسەمباەۆ, عىلىم جانە جوعارى ءبىلىم ءمينيسترى ساياسات نۇربەك, مادەنيەت جانە اقپارات ۆيتسە-ءمينيسترى قانات ىسقاقوۆ, سونداي-اق سەنات دەپۋتاتتارى نۇرتورە ءجۇسىپ پەن زاكيرجان كۇزيەۆ بايانداما جاسادى. جيىندى اشقان قحا توراعاسىنىڭ ورىنباسارى مارات ءازىلحانوۆ رەسپۋبليكا كۇنى قارساڭىندا ۇيىمداستىرىلىپ وتىرعان بۇل ءىس-شارانىڭ ماڭىزىنا توقتالا كەلە: «ەلىمىزدە وتكەن كونستيتۋتسيالىق رەفورما, پرەزيدەنت, پارلامەنت جانە بارلىق دەڭگەيدەگى ءماسليحاتتار سايلاۋى, ۇلتتىق قۇرىلتاي فورۋمدارى, «ادىلەتتى قازاقستان» يدەياسى ەل دامۋىنا جاڭا سەرپىن بەردى. بۇل ادىلەتتىلىك ۆەكتورى, ازاماتتاردىڭ مەملەكەتتى باسقارۋعا قاتىسۋىنىڭ جاڭا مۇمكىندىكتەرى, قوسىمشا الەۋمەتتىك جانە ساياسي باسپالداقتار», دەپ اتاپ ءوتتى.
بىرلىك پەن ىنتىماقتى تۋ قىلعان ەل قوعامىنىڭ ارتۇرلىلىگى – جەكەلەگەن بولىكتەردەن تۇراتىن قۇرىلىم ەمەس, بولىنبەيتىن ءبىرتۇتاس اعزا ەكەندىگىن اتاپ وتكەن ول مەملەكەتتىك ءتىلدىڭ حالىقتى بىرىكتىرۋشى كۇشىن ارتتىرۋ قاجەتتىگىنە توقتالدى. ء«بىز «ادال ازامات» تۇجىرىمىن تەك يدەولوگيالىق كونسترۋكتور رەتىندە ەمەس, قوعامنىڭ نەگىزى جانە قوزعاۋشى كۇشى دەپ تانىتۋىمىز كەرەك. سونىمەن قاتار مەملەكەتتىك ءتىلدىڭ حالقىمىزدى بىرىكتىرۋشى فاكتور رەتىندەگى ءرولىن كۇشەيتۋ – ۋاقىت تالابى. ەلىمىزدە بارلىق ۇلتتىڭ مۇددەسىن كوزدەيتىن ساليقالى ءتىل ساياساتى جۇرگىزىلىپ كەلەدى. بۇل – ءبارىمىزدىڭ قۇندىلىعىمىز, جەتىستىكتەرىمىزدىڭ كىلتى. قازاق ءتىلىن دامىتۋ باسقا تىلدەرگە نۇقسان كەلتىرۋ ارقىلى جۇرگىزىلىپ جاتپاعانىن ۇمىتپاۋ كەرەك. ول – ءبىزدىڭ ازاماتتىق بىرەگەيلىگىمىزدىڭ سيمۆولى. قازاقستان حالقى اسسابلەياسىنىڭ وسى باعىتتاعى ەڭبەگى ءوز جەمىسىن بەرىپ كەلەدى», دەدى مارات ءازىلحانوۆ.
ەل حالقىنىڭ ەتنوسارالىق بىرلىگىن ارتتىرۋ باعىتىندا جاسالىپ جاتقان جۇمىستارعا توقتالعان وقۋ-اعارتۋ ءمينيسترى عاني بەيسەمباەۆ ەلىمىزدە بيىلعى وقۋ جىلىنان باستاپ تاربيە جۇمىستارىن كۇشەيتۋ ماقساتىندا ءبىرتۇتاس تاربيە باعدارلاماسى ىسكە قوسىلعانىن اتاپ ءوتتى. «باعدارلاما شەڭبەرىندە 2023-2026 جىلدارعا ارنالعان جوسپارعا سايكەس اسسامبلەيا جاستارىمەن بىرلەسىپ, ءبىلىم ورىندارىندا ارنايى پەداگوگيكالىق, پسيحولوگيالىق تۇسىنىكتەرىن جەتىلدىرۋ بويىنشا بىلىكتىلىكتى ارتتىرۋ كۋرستارى, بەيبىتشىلىك پەن كەلىسىم ساباقتارى, موتيۆاتسيالىق كەلىسىمدەر, ءوزارا قارىم-قاتىناس ادەبى تاقىرىبىندا كەزدەسۋلەر وتكىزىلەدى», دەدى ول.
سونىمەن قاتار ءبىلىم الۋشىلارعا مەملەكەتتىك ءتىلدى ۇيرەتۋ بويىنشا جۇيەلى قادامدار ىسكە اسىپ جاتقانىن اڭگىمەلەگەن وقۋ-اعارتۋ ءمينيسترى مەكتەپكە دەيىنگى, ورتا, كاسىپتىك-تەحنيكالىق ءبىلىم بەرۋ جۇيەسىندە ء«بىز ءارتۇرلىمىز, بىراق تەڭبىز», «بىرلىگىمىز – ارالۋاندىقتا» قاعيداتتارىنا نەگىزدەلگەن اۋقىمدى ءىس-شارالار ۇدايى ۇيىمداستىرىلىپ وتىرعانىن اتاپ ءوتتى. «وسى باعىتتاعى ناقتى ءىس-شارانىڭ ءبىرى – «قازاقشا ويلاۋ» جوباسى. بالاباقشادان باستالىپ, ودان ءارى باستاۋىش سىنىپتاردا جالعاساتىن بۇل جوبا ارنايى ادىستەمە نەگىزىندە بارلىق وقۋشىنىڭ ەرتە جاستان مەملەكەتتىك ءتىلدى مەڭگەرۋىنە جول اشادى. بۇگىنگى تاڭدا جوبا مەكتەپتەردە اپروباتسيادان ءوتىپ, جوعارى ناتيجە كورسەتىپ وتىر. جوبا وسى وقۋ جىلىنان باستاپ ەل مەكتەپتەرىندە كەزەڭ-كەزەڭمەن ەنگىزۋ كوزدەلگەن», دەدى مينيستر.
سونىمەن قاتار كەڭەس بارىسىندا وزگە قاتىسۋشىلار دا بىرقاتار ۇيىمداستىرۋشىلىق ماسەلەنى تالقىلادى. سەنات دەپۋتاتى نۇرتورە ءجۇسىپ پارلامەنتتەگى ءوزى جەتەكشىلىك ەتەتىن ء«بىر ەل – ءبىر مۇددە» دەپۋتاتتىق توبىنىڭ ماقساتى مەن جۇمىسىنا توقتالدى. پرەزيدەنت قاسىم-جومارت توقاەۆ قازاقستان حالقى اسسامبلەياسىنىڭ XXXII سەسسياسىندا ء«بىر ەل – ءبىر مۇددە» دەپۋتاتتىق توبىن قۇرۋ تۋرالى باستاما كوتەرگەن بولاتىن. «سەنات بيۋروسى وسى توپتى قۇردى. ەلىمىزدەگى قوعامدىق كەلىسىم مەن ۇلتتىق بىرلىك سالاسىنداعى مەملەكەتتىك ساياساتتى زاڭنامالىق تۇرعىدا قامتاماسىز ەتۋ ماسەلەسىن كەلىسۋ – توپتىڭ باستى مىندەتى. جۇمىستىڭ بۇل ءتۇرى پارلامەنت پەن قازاقستان حالقى اسسامبلەياسىنىڭ ءوزارا ءتيىمدى ءىس-قيمىلىنا جانە ازاماتتىق قوعام ينستيتۋتتارى اراسىنداعى ەتنوسارالىق قاتىناستاردى ۇيلەستىرۋگە ىقپال ەتەدى. توپتىڭ قۇرامىندا پارلامەنتتىڭ 30 دەپۋتاتى بار», دەدى سەناتور.
سونىمەن بىرگە, نۇرتورە ءجۇسىپ جيىن باسىندا كوتەرىلگەن نەگىزگى ماسەلە – مەملەكەتتىك ءتىلدىڭ ەلىمىزدەگى ۇلتارالىق تىلگە اينالۋىنا قاتىستى دا ويىن ءبىلدىردى. «قازىرگى كۇنى اقپاراتتىق جۇيە قارقىندى دامىپ كەلەدى. سونىڭ ىشىندە جاساندى ينتەللەكتتىڭ ورنى ەرەكشە. وقۋ-اعارتۋ ءمينيسترى مەن عىلىم جانە جوعارى ءبىلىم ءمينيسترى بۇل باعىتتا ويلارى مەن باستامالارىن ورتاعا سالدى. ونىڭ ءبارىن دەپۋتاتتار قولدايدى. راسىندا, ءبىز ءتىلىمىزدى زامان كوشىنەن قالدىرمايمىز دەسەك, وسى باعىتقا كوڭىل ءبولۋىمىز كەرەك. بۇل جەردە ءىت ماماندارىمەن بىرلەسىپ جۇمىس جۇرگىزۋىمىز قاجەت. سونىمەن قاتار اسسامبلەيا جاستارى قولعا الىپ وتىرعان «ۇيدە سويلە» جوباسىن ەرەكشە ايتقىم كەلەدى. ءبىز پارلامەنت دەپۋتاتتارى تاراپىنان وعان قىزۋ قولداۋ كورسەتۋگە دايىنبىز», دەدى ول.
كەڭەس وتىرىسى اياسىندا ۇيىمداستىرىلعان وقۋ-اعارتۋ, عىلىم جانە جوعارى ءبىلىم مينيسترلەرىنىڭ قحا كەڭەسىنىڭ مۇشەلەرىمەن كەزدەسۋى بارىسىندا قاتىسۋشىلار ەركىن فورماتتا وزدەرىن تولعاندىرعان سۇراقتارعا تولىققاندى جاۋاپ الىپ, ەتنومادەني بىرلەستىكتەردىڭ وكىلدەرىن قىزىقتىرعان ماسەلەلەردى تالقىعا سالدى.
