اقىلزاتتى بۇل كۇندە ورتاسى جولسەرىك دەپ قانا ەمەس, ءانشى, ءانشى بولعاندا دا «وپەرا ءانشىسى» دەپ تانيدى. ول جامبىل وبلىسى, قۇلان اۋدانى, كوگەرشىن اۋىلىندا دۇنيەگە كەلگەن. انشىلىك اتاسى سەيىتجاپار مەن اكەسى ەسىمحاننان دارىپتى. «اكەم جىلقى باعىپ ءجۇرىپ دالا ءتوسىن انگە بولەيتىن. بالا كۇنىمنەن جانىنان ءبىر ەلى تاستاماي اۋىل ىشىندەگى توي-تومالاقتا بىرگە ءان شىرقايتىنبىز» دەيدى جولسەرىك ونەرپاز. جەتكىنشەك شاعىنان وپەرا انشىلەرىنىڭ تۋىندىلارىن شىرقاپ وسكەن اقىلزاتتىڭ ءان سالعان داۋسىن اۋىلداستارى راديو قوسىلىپ تۇر ما دەپ ويلايدى ەكەن. انشىلىكتى كاسىبي مەڭگەرىپ, ونەر جولىن تاڭداعىسى كەلگەن. بىراق مەكتەپتە وقىپ جۇرگەندە الماتى قالاسىنا ءان بايقاۋىنا قاتىسۋعا قاراجات قولبايلاۋ بولىپ, ونەردەن باعىتىن اۋلاق بۇرۋعا شەشىم قابىلداپتى. تالانتتى قىزدىڭ تاعدىرى وسىلاي تەمىرجول سالاسىمەن قابىسىپ كەتە بارادى.
الەۋمەتتىك جەلى جۇلدىزىن جاققان جولسەرىك ءانشىنى بۇل كۇندە كوپشىلىك كورگەن جەردە قولقالاپ ءان سۇرايدى. ءتىپتى تويعا شاقىراتىندار دا بار ەكەن. بىراق ول ونەردى تابىس كوزىنە اينالدىرعان ەمەس. ونەر قاشاندا ءوزىنىڭ بيىگىنەن الاسارمايدى. تالانتتار تۇبىندە تانىلادى. ءانشى قارا ورمان تىڭداۋشىنىڭ كوڭىلىن بۇل كۇندە تەمىرجولدىڭ ۇستىندە تەربەتىپ كەلەدى. كاسىبي يگەرگەن ماماندىعى تەمىرجول سالاسىنا تەلۋلى تالانتتىڭ ورنى راسىندا دا ساحنا بولۋعا ءتيىس ەدى. ويتكەنى مۇنداي ونەر ەكىنىڭ بىرىنە قونا بەرمەيدى. جولىڭىز ءتۇسىپ, ءسىز وتىرعان ۆاگوندا اقىلزات سەيىتجاپار قىزمەت اتقارسا, مەرەيىڭىزدىڭ تاسىعانى. دىتتەگەن جەرىڭىزگە دەيىن انىمەن تەربەتىپ جەتكىزەدى.
جولسەرىك ءانشى جايىنداعى بەينەجازبانى تومەندەگى QR-كود ارقىلى كورۋگە بولادى.
