فوتو: الەكساندر پاۆسكي/ قازاقپارات حاا
كونفەرەنتسيا اياسىندا «قازاق دەتەكتيۆ جانرىنىڭ نەگىزىن قالاۋشى», «وتان ءۇشىن وت كەشۋ», «جۋرناليست – قوعامنىڭ ايناسى, قۇلاعى ءھام ءتىلى» اتتى تاقىرىپتىق سەكتسيالار ۇيىمداستىرىلدى.
كونفەرەنتسيادا ەلىمىزدەگى دەتەكتيۆ جانرىنىڭ دامۋى مەن ەرەكشەلىگىن تالقىلاۋ بارىسىندا «قازاق دەتەكتيۆىنىڭ اتاسى» اتانعان جازۋشى كەمەل توقاەۆتىڭ ءومىرى مەن شىعارماشىلىعىنا قاتىستى دەرەكتەر مەن تىڭ تۇجىرىمدار تالقىلاندى. وسىدان 100 جىل بۇرىن دۇنيەگە كەلگەن جازۋشىنىڭ «سارعاباندا بولعان وقيعا», «كوشپەندى ءۇيدىڭ قونىسى قايدا؟», «تاۋداعى جاڭعىرىق», «كومەسكى ءىز», «سولدات قابىرىنىڭ باسىندا» اتتى تۋىندىلارى قازاق ادەبيەتىندەگى دەتەكتيۆ جانرىنىڭ العاشقى قارلىعاشتارى سانالادى.
شىتىرمان وقيعالى پوۆەستەرى قازاق پروزاسىنا تىڭ ءۇردىس اكەلگەن جازۋشىنىڭ شىعارمالارى الەمنىڭ بىرنەشە تىلدەرىنە اۋدارىلعان. ساراپشى عالىمدار كەمەل توقاەۆ تەك قازاق دەتەكتيۆ جانرىنىڭ عانا ەمەس, ورتالىق ازيا ادەبيەتىندە وسىناۋ بىرەگەي جانردىڭ دامۋىنا ەرەكشە ۇلەس قوسقان جازۋشى ەكەنىن اتاپ ءوتتى.
كونفەرەنتسيا جۇمىسىنا قازاقستان, وزبەكستان, قىرعىزستان, رەسەي مەملەكەتتەرىنىڭ شىعارماشىلىق زيالى قاۋىم وكىلدەرى قاتىستى.
اتاپ ايتقاندا, تۇرىكسوي ۇيىمىنىڭ باس حاتشىسى سۇلتان راەۆ, وزبەكستان جازۋشىلار وداعىنىڭ مۇشەسى مينحوجيددين حودجيماتوۆ, قىرعىزستان جازۋشىلار وداعىنىڭ توراعاسى نۇرلان قالىبەكوۆ, رەسەي عىلىمىنىڭ ەڭبەك سىڭىرگەن قايراتكەرى, پروفەسسور, دەتەكتيۆ جانرىنىڭ ايگىلى جازۋشىسى دميتري شەستاكوۆ, تانىمال وتاندىق جازۋشىلار دۋلات يسابەكوۆ, احمەتجان اشيري, قۇلبەك ەرگوبەك, قانسەيىت ابدەز ۇلى, نۇرلان ورازالين, سماعۇل ەلۋباي, جاڭعارا دادەبەۆ جانە تاعى باسقا قالامگەرلەر, عىلىم جانە ونەر قايراتكەرلەرى قاتىستى.
كونفەرەنتسيا قورىتىندىسى بويىنشا سپيكەرلەر مەن ساراپشىلاردىڭ باياندامالارى ارنايى جيناققا باسىلىپ شىعادى.
