الەمدىك جانە ايماقتىق شارالار لەگى

كەشە سىرتقى ىستەر مينيس­ترلىگىندە جۋرناليستەرگە ارنالعان ءداستۇرلى بريفينگ ءوتتى. وندا اتالعان ۆەدومستۆونىڭ رەسمي وكىلى اسقار ابدراحمانوۆ 8 ماۋسىمدا ىستامبۇلدا وتەتىن ازياداعى ءوزارا ىقپالداستىق جانە سەنىم شارالارى جونىندەگى كەڭەس ءسامميتى جونىندە اڭگىمەلەدى. ونىڭ اي­تۋىن­شا, ازيا كەڭەسى ءسامميتىنىڭ قازاقستاننان تىس جەردە ءوتۋى جانە كەڭەسكە توراعالىق ەتۋ مىندەتىن ءبىر مەملەكەتتەن ەكىنشىگە, ياعني قا­زاقستاننان تۇركياعا تاپسىرىلۋى اتالمىش حالىقارالىق ءبىر­لەس­تىكتىڭ تاريحىندا العاش رەت ورىن الاتىن جاعداي بولماق. ال 9-13 ماۋسىم ارالىعىندا قازاقستانعا فينليانديانىڭ سىرتقى ساياسي جانە ەكونوميكالىق مۇددەلەرىن العا قوياتىن “پااسي­كيۆي” قوعامىنىڭ 28 مۇشەسىنەن قۇرالعان دەلەگاتسيا كەلمەك ەكەن. “اتالمىش قوعام الماتىدا وتەتىن پرەزيدەنت جانىنداعى قازاقستان­نىڭ ستراتەگيالىق زەرتتەۋلەر ينس­تيتۋتىمەن بىرلەسىپ ۇيىمداستىرا­تىن دوڭگەلەك ۇستەلدە وزەكتى حا­لىقارالىق ماسەلەلەردى تالقىلاي­تىن بولادى”, دەدى رەسمي وكىل. سونىمەن قاتار, بۇل ساپار اياسىن­دا “پااسيكيۆي” قوعامى قازاق­ستان­دىق ارىپتەستەرمەن حالىقارا­لىق قاتىناستار, جاھاندىق ەكونوميكا جانە ەنەرگەتيكالىق قاۋىپسىزدىك ماسەلەلەرىن اڭگىمە وزەگىنە اينالدىرماق. بريفينگ بارىسىندا قازاق­ستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋ­داباەۆتىڭ 9-10 ماۋسىم كۇن­دە­رىنە كوزدەلگەن دانياعا رەسمي ساپارى جونىندە دە ايتىلدى. بۇل وتاندىق سىرتقى ساياسي ۆەدوم­ستۆوسى باسشىسىنىڭ ەكىجاقتى قارىم-قاتىناس تاريحىنداعى دانياعا العاش رەسمي ساپارى سانالادى. قانات ساۋداباەۆ ءوز ساپارى اياسىندا دانيا پرەمەر-ءمينيسترىنىڭ ورىنباسارى – سىرتقى ىستەر ءمينيسترى لەنە ەسپەرسەنمەن كەزدەسۋ وتكىزبەك. وندا قوس مەملەكەت اراسىنداعى ساۋدا-ەكونوميكالىق جانە ين­ۆەس­تيتسيالىق ىنتىماقتاستىقتىڭ كە­لەشەگى تالقىلانادى. حالىقارا­لىق ساياساتتاعى وزەكتى ماسەلەلەر جونىندە پىكىر الماسادى. ا.ابدراحمانوۆ بريفينگ كەزىن­دە 10-11 ماۋسىم كۇندەرى كوپەن­گاگەندە  قازاقستانىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋىمەن, دانيا كورولدىگى جانە دەمو­كراتيالىق ينستيتۋتتار مەن ادام قۇقىقتارى جونىندەگى بيۋرونىڭ ۇيىمداستىرۋىمەن “ەۋروپاداعى قاۋىپسىزدىك جانە ىنتىماقتاستىق ۇيىمى كوپەنگاگەن قۇجاتىنىڭ 20 جىلدىعى: مارتەبەسى مەن كەلەشە­گى”  تاقىرىبىندا كونفەرەنتسيا وتە­تىندىگى جونىندە ايتىپ ءوتتى. ال ءدال وسى كۇندەرى قازاقستان پرەزيدەنتى نۇرسۇلتان نازارباەۆ تاشكەنتتە وتەتىن شانحاي ىنتى­ماقتاستىق ۇيىمىنا مۇشە مەم­لەكەتتەر كەڭەسىنە قاتىسپاق. بۇل سامميت بارىسىندا الەمدە جانە ايماقتا ورىن الىپ جاتقان ماسە­لەلەرگە بايلانىستى پىكىر الما­سىلادى دەپ كوزدەلۋدە. كەڭەس قورىتىندىسىندا ءسامميتتىڭ دەك­لا­راتسياسىنا, ۇيىمنىڭ بىرقاتار قۇجاتتارىن بەكىتۋ تۋرالى كەلىسىم­دەرگە, راسىمدەر ەرەجەسىنە جانە ۇيىمعا جاڭا مۇشەلەردى قابىلداۋ ەرەجەسىنە قول قويىلماق. “تاش­كەنت سامميتىنەن كەيىن شىۇ-عا توراعالىق ەتۋ مىندەتى ءبىر جىلدىق مەرزىمگە قازاقستانعا تاپسىرى­لادى. ال كەلەسى جىلى استانادا وتەتىن شىۇ-نىڭ كەزەكتى ءسامميتى اتالعان ۇيىمنىڭ 10 جىلدىعىنا ارنالادى”, دەدى. ا.ابدراحمانوۆ. بريفينگ سوڭىندا رەسمي وكىل 11-12 ماۋسىم كۇندەرى قازاقستان باسشىسى ن.نازارباەۆتىڭ ارنايى شاقىرۋىمەن ەلىمىزگە قىتاي حالىق رەسپۋبليكاسىنىڭ ءتور­اعاسى حۋ تسزينتاونىڭ رەسمي ساپارمەن كەلەتىندىگىن ايتتى. ەكىجاقتى كەلىسسوزدەر بارىسىندا مەملەكەت باسشىلارى قازاقستان-قىتاي قارىم-قاتىناسىنىڭ قازىرگى جاعدايى مەن كەلەشەگىن, حالىقارالىق جانە ايماقتىق احۋالدىڭ وزەكتى ماسەلەلەرىن تالقى تارازىسىنا سالماق. ءلايلا ەدىلقىزى.