قاسىم-جومارت توقاەۆ ايماق مەملەكەتتەرى كوشباسشىلارىنىڭ بىرلەسكەن كۇش-جىگەرىن جۇمىلدىرۋعا بولاتىن ىقپالداستىقتىڭ باسىم باعىتتارىن ۇسىندى. پرەزيدەنت, ەڭ الدىمەن, ساۋدا-ەكونوميكالىق قارىم-قاتىناس, جاڭا كولىك-ترانزيت دالىزدەرىن دامىتۋ, ەنەرگەتيكا سالاسىنداعى كووپەراتسيا ماسەلەلەرىنە نازار اۋداردى.
كەزدەسۋ بارىسىندا كليماتتىڭ وزگەرۋىنە جانە سۋ تاپشىلىعى پروبلەماسىنا باسا ءمان بەرىلدى. جيىنعا قاتىسۋشىلار مۇزدىقتاردىڭ ەرۋىنە جانە ورتالىق ازياداعى ەكولوگيالىق احۋالدىڭ وزگەرۋىنە بايلانىستى ماسەلەلەردى تالقىلادى. قازاقستان پرەزيدەنتىنىڭ پىكىرىنشە, گەرمانيانىڭ اتالعان پروبلەمالاردى شەشۋدەگى تاجىريبەسى ايماق ءۇشىن اسا ماڭىزدى.
مەملەكەتتەر باسشىلارى ورتالىق ازيا ءوڭىرى مەن ەۋروپا وداعى توڭىرەگىندەگى گەوساياسي جاعدايعا قاتىستى ماسەلەلەردى دە قوزعادى. سونىمەن قاتار اۋعانستانداعى قازىرگى جاعداي قاراستىرىلدى.
گەرمانيا پرەزيدەنتى فرانك-ۆالتەر شتاينمايەر ۋكرايناداعى داعدارىس ەۋروپانىڭ, سونداي-اق ورتالىق ازيا ەلدەرىنىڭ قاۋىپسىزدىگىنە ايتارلىقتاي اسەر ەتەدى دەگەن پىكىر ايتتى.
قاسىم-جومارت توقاەۆ بۇعان جاۋاپ رەتىندە ءوزارا ءتيىمدى بەيبىت شەشىمدەر ىزدەۋگە باعىتتالعان ساليقالى ديپلوماتيا قاجەت ەكەنىن تاعى دا مالىمدەدى. مەملەكەت باسشىسى تاراپتاردىڭ ناقتى كەلىسسوزدەرگە كىرىسۋى قاجەت ەكەنىنە نازار اۋداردى.
بۇدان بولەك, قازاقستان پرەزيدەنتى ورتالىق ازيا ەلدەرى مەن گەرمانيا اراسىنداعى مادەني-گۋمانيتارلىق بايلانىستاردى كەڭەيتۋ قاجەت ەكەنىنە توقتالدى. اتاپ ايتقاندا, مەملەكەت باسشىسى عىلىم جانە ءبىلىم سالالارىنداعى بىرلەسكەن جوبالاردى, نەمىس ءتىلىن وقىتۋ باعدارلامالارىن ىسكە اسىرۋدى قولدادى.
سونىمەن قاتار كەزدەسۋدە قىرعىزستان پرەزيدەنتى سادىر جاپاروۆ, تاجىكستان پرەزيدەنتى ەمومالي راحمون, وزبەكستان پرەزيدەنتى شاۆكات ميرزيوەۆ, تۇرىكمەنستان حالك ماسلاحاتىنىڭ توراعاسى گۋربانگۋلى بەردىمۇحامەدوۆ ءسوز سويلەدى.
