وتاندىق كاسىپورىننىڭ باس ديرەكتورىنىڭ ورىنباسارى – باس ينجەنەر ادىلەت شوشانباسوۆتىڭ ايتۋىنشا, بۇل – كۇردەلى جوندەۋ ەمەس. جىل سايىن جۇرگىزىلەتىن اعىمداعى جوسپارلانعان تەكسەرۋ.
«زاۋىتتاعى تەحنولوگيالىق قوندىرعىلاردى تەكسەرۋ جۇمىسىن جۇرگىزۋ 14 قىركۇيەككە جوسپارلانعان ەدى. الايدا ونى كۇزگى ەگىن ونىمدەرىن جيناۋ كەزىندە فەرمەرلەردى ديزەل وتىنىمەن قامتۋدى توقتاتپاۋ ءۇشىن 1 قازانعا اۋىستىرۋعا ءماجبۇر بولدىق. مۇنى كۇردەلى جوندەۋمەن شاتاستىرماۋ قاجەت. بۇل – تەحنولوگيالىق قوندىرعىلارداعى بولشەكتەردىڭ, توراپتاردىڭ, مەحانيزمدەردىڭ مەرزىمىنەن بۇرىن توزۋىنىڭ الدىن الۋعا, جارامدىلىق مەرزىمىن ۇزارتۋعا باعىتتالعان تەحنولوگيالىق جابدىقتى كۇتۋ, قاداعالاۋ, پايدالانۋ جانە از-كەم جوندەۋگە بايلانىستى ءىس-شارالار كەشەنى. وسىعان بايلانىستى زاۋىتتا بارلىق قوندىرعىنىڭ جۇمىسى توقتاتىلادى. ءبىز اۋا رايىنىڭ جاعدايىن ەسكەرىپ, تەحنولوگيالىق قوندىرعىلاردى سالقىن تۇسكەنگە دەيىن ىسكە قوسۋعا نيەتتىمىز», دەيدى ءا.شوشانباسوۆ.
ونىڭ مالىمەتىنشە, قوندىرعىلاردى تەكسەرۋگە مەردىگەر كاسىپورىنداردان 1 600-گە جۋىق قىزمەتكەر مەن 116 ارنايى تەحنيكانى جۇمىلدىرۋ كوزدەلگەن. تەكسەرۋ جۇمىستارى ونەركاسىپتىك قاۋىپسىزدىك سالاسىنداعى «ازاماتتىق قورعاۋ» تۋرالى زاڭنىڭ تالاپتارىنا سايكەس جۇرگىزىلەدى.
«بۇل كەزەڭدە تۇتىنۋشىلارعا مۇناي ونىمدەرىن جونەلتۋ توقتامايدى. ويتكەنى زاۋىتتىڭ رەزەرۆۋارلارىندا جوسپارلى تەكسەرۋ جۇمىستارى باستالعانعا دەيىن جيناقتالعان مۇناي ونىمدەرىنىڭ جەتكىلىكتى قورى بار. قازىر 36 مىڭ توننا كولىك جانارمايى, 32 مىڭ توننا ديزەل وتىنى جيناقتالدى. ال قازان ايىندا 16 مىڭ توننا بەنزين, 28 مىڭ توننا ديزەل وتىنىن ءوندىرۋ جوسپارلانىپ وتىر. مۇناي ونىمدەرىنىڭ نەگىزگى تۇرلەرىن ءوندىرۋ مەن جونەلتۋ ەنەرگەتيكا مينيسترلىگىنىڭ جوسپارىنا سايكەس جۇزەگە اسىرىلادى», دەپ ءمالىم ەتتى ءا. شوشانباسوۆ.
قازىر زاۋىتتا جانارماي تۇرلەرىمەن بىرگە سۇيىتىلعان گاز وندىرىلەدى. ەنەرگەتيكا مينيسترلىگىنىڭ جوسپارىنا سايكەس اتىراۋ وبلىسىنا قىركۇيەك ايىنا – 5 064 توننا, باتىس قازاقستان وبلىسىنا 2 940 توننا سۇيىتىلعان گاز بولىنگەن. ماسەلەن, 13 قىركۇيەكتەگى مالىمەتكە سايكەس اتىراۋ وبلىسىنا 3 236 توننا (64%), باتىس قازاقستان وبلىسىنا 1 288 توننا (44%) كولەمىندە سۇيىتىلعان گاز جونەلتىلگەن.
الايدا مۇنايلى وڭىردە سۇيىتىلعان گازدى تۇتىنۋ كولەمى ارتقانى بايقالادى. وبلىستىق ەنەرگەتيكا جانە تۇرعىن ءۇي-كوممۋنالدىق باسقارماسى باسشىسىنىڭ ورىنباسارى مارات قارامالاەۆتىڭ ايتۋىنشا, اتىراۋدا سۇيىتىلعان گازدى تۇتىنۋ قاجەتتىلىگى 9-10 مىڭ توننانى قۇراپ وتىر.
«سۇيىتىلعان گاز اتىراۋ مۇناي وڭدەۋ زاۋىتىنان جەتكىزىلەدى. اۆتوكولىكتەرمەن 100 توننا سۇيىتىلعان گاز اتىراۋ وبلىسىنىڭ ىشكى نارىعىنا, 100 تونناسى باتىس قازاقستان وبلىسىنا, ال 300 تونناسى تەمىرجول جولى ارقىلى اقمولا, قوستاناي وبلىستارىنا جونەلتىلىپ جاتىر. وبلىس اكىمدىگى سۇيىتىلعان گاز تاپشىلىعىن بولدىرماۋ ماقساتىندا ەنەرگەتيكا مينيسترلىگىنە, زاۋىتقا ۇسىنىسحات جولداپ, ءتيىستى جۇمىستار جۇرگىزدى. سونىڭ ناتيجەسىندە قازىر زاۋىتتاعى تاۋلىكتىك گاز ءوندىرىسى 650 تونناعا دەيىن ءوستى. اتىراۋ وبلىسىنىڭ ىشكى نارىعىنا جونەلتىلەتىن گاز كولەمى 250 تونناعا دەيىن ۇلعايدى. بۇل گاز قۇيۋ بەكەتتەرىندەگى كەزەكتى ازايتۋعا, تالونمەن بوساتۋدى جويۋعا باعىتتالدى», دەيدى م.قارامالاەۆ.
ونىڭ ايتۋىنا قاراعاندا, وبلىس اكىمدىگى تاراپىنان ەنەرگەتيكا مينيسترلىگىنە قوسىمشا گاز ءبولۋ جونىندە ۇسىنىسحاتتار جولدانعان. وڭىردە كۇن سايىن 200-250 توننا گاز تۇتىنىلادى. سونداي-اق «تەڭىزشەۆرويل» كومپانياسىنا سۇيىتىلعان گازبەن قامتاماسىز ەتۋ جونىندە سۇرانىس حات جىبەرىلگەن.
اتىراۋ وبلىسى
