بۇگىندە كەگەن اۋىلىندا مىڭنان اسا قارت تۇرادى. ولاردىڭ دەنى – اۋىل شارۋاشىلىعى سالاسىندا سۇبەلى ەڭبەك ەتكەندەر. مەرەكە قارساڭىندا سولاردىڭ جۇزدەن استامىنا قۇرمەت كورسەتىلدى. اۋداندىق مادەنيەت ۇيىنە جينالعان قاريالاردى كەگەن اۋىلىنىڭ اكىمى رۋسلان كەڭەسجان ۇلى قۇتتىقتاپ, ەلىمىزدىڭ جارقىن بولاشاعى ءۇشىن توككەن تەرى مەن سىڭىرگەن ەڭبەگى قاشاندا قۇرمەتكە يە ەكەنىن اتاپ, العىسىن ءبىلدىردى.
اۋدانعا تانىمال اقساقالدارمەن قاتار, تىل ارداگەرلەرى ازيات قايىڭباەۆا, سارا قوساەۆا, ۇلدىكەن ساعىنبەكوۆا, كوپبالالى انالار كۇلاش مۇقانوۆا, زينا اباەۆا باستاعان «التىن القا» يەگەرلەرى سالتاناتتى ءىس-شارانىڭ قۇرمەتتى قوناعى بولىپ, ءبىر مارقايىپ قالدى.
«اينالايىن جاستار, سەندەر قازىنالى قارتتاردى قۇرمەتتەۋدەن كەم بولمايسىڭدار. وسى قۇرمەتكە ەڭبەكپەن جەتىپ وتىرمىز. ەل ىرىزدىعىن ارتتىرۋ جولىندا ايانباي ەڭبەك ەتىڭدەر. بۇگىن باسىمىز قوسىلىپ, قۇربى-قۇرداستارىمدى كورىپ, مارە-سارە بولىپ قالدىق. سىي-قۇرمەتتەرىڭە العىسىمىزدى ايتامىز», دەدى تىل ارداگەرى ازيات اپا.
مەرەكە قارساڭىندا بالاشا قۋانعان قارتتارعا اۋدان ونەرپازدارى تامىلجىتا ءان سالىپ, كۇي شەرتىپ, كوڭىلىن كوتەردى.
الماتى وبلىسى
