ۇكىمەت وڭىرگە قولداۋ كورسەتپەك

كەشە رەسپۋبليكا ۇكىمەتىنىڭ باسشىسى كارىم ءماسىموۆ جۇمىس ساپارىمەن ەلىمىزدىڭ شىعىسىندا بولدى. ونىڭ بۇل ساپارى سەمەيدەن باستالدى. پرەمەر-مينيستر ۇشاقتان تۇسكەن بەتتە اتباسىن قالانىڭ جاڭاسەمەي بولىگىندەگى ءبىرىنشى جىلۋ-ەنەرگەتيكالىق ورتالىعىنا تىرەدى. ال ونىڭ ءمانىسى دە جوق ەمەس-ءتى. ويتكەنى, جىلۋ مەن ەنەرگيا سەمەي ءۇشىن ءنومىرى ءبىرىنشى ماسە­لە­گە اينالعالى قاشان؟ مۇنداعى قاپ­تاعان قازاندىقتاردان قايران بولماي وتىرعانى دا شىندىق. راس, سوڭعى جىلدارى ەلباسىنىڭ تىكە­لەي قامقورلىعىمەن بۇل ماسەلە ءبىر­شاما رەتكە كەلىپ قالدى. ءسوي­تىپ, بۇرىنعى 46 قازاندىقتىڭ جيىر­ماسى جابىلدى. ولاردىڭ الدى وسىدان سەكسەن جىلداي بۇرىن سالىنعان. جانە سونىڭ سەكسەن پايىزىنىڭ ابدەن توزىعى جەتكەن. مۇنىڭ سىرتىندا جەر استى قۇبىرلارىنىڭ جاي-كۇيى دە سونداي ەدى. ايتەۋىر, قاراجات بولىنگەن سوڭ جاعداي وڭالا باستادى. سونىڭ ايعاعىنداي, سوڭعى بىرەر جىلدا ونداعان شاقىرىم قۇبىرلار جاڭارتىلدى. دەسە دە, قالانىڭ جاڭاسەمەي بولىگىن جىلۋمەن قامتاماسىز ەتە­تىن ءبىرىنشى جىلۋ-ەنەرگەتيكا ورتالىعىن ىسكە قوسپايىنشا ءىس ءبىتتى دەۋگە كەلمەيدى. ال ول شارۋامەن مىنە, بيىل ءۇشىنشى جىل كورەيانىڭ “قۇس جولى” دەپ اتا­لا­تىن جاۋاپكەرشىلىگى شەكتەۋلى سەرىك­تەستىگى اينالىسۋدا. كارىم قاجىمقان ۇلى وسىنداعى بۋ قازان­دىعىنىڭ جۇمىسىمەن تانىسىپ بولعان سوڭ ورتالىقتىڭ قۇرىلىس الاڭىنىڭ باسىندا كوشپەلى جيىن وتكىزدى. وندا ەڭ الدىمەن وبلىس اكىمى بەردىبەك ساپارباەۆ بۇل ايماقتا وتكەن قىستىڭ قالاي اياقتالعانىن ايتا كەلىپ, الداعى قىسقا دايىندىقپەن تانىستىردى. وبلىس اكىمى دە, بۇدان كەيىن ءسوز ال­عاندار دا جىلۋ-ەنەرگەتيكا ورتا­لىعى قازاندىقتارىنىڭ ماتەريال­دىق تەحنيكالىق بازاسىن جاقسارتۋ, باعانى تۇراقتاندىرۋ, بۇرىنىراق­تا ورىن العان ورەسكەل كەمشىلىك­تەرگە ەندى جول بەرمەۋ كەرەكتىگىنە توقتالدى. ايتالىق, مۇندا كەزىندە ءتۇتىن تارتاتىن قۇبىرعا دەيىن جەكەشەلەنىپ كەتكەن. جيىن بارىسىندا ءسوز العان “قۇس جولى” كومپانياسىنىڭ باس­شىسى لي مىرزا ورتالىق قۇرىلى­سى­نىڭ بەلگىلەنگەن ۋاقىت­تا ىسكە قوسىلاتىندىعىنا سەن­دىردى. ال جيىندى قورىتىندى­لاعان پرە­مەر-مينيستر كارىم ءماسىموۆ ءوزىنىڭ ەلباسىنىڭ تاپسىرماسىمەن كەلگەنىن ايتا كەلىپ, ينۆەستور ءسوزىن ۇستاسا, ۇكىمەت تاراپىنان ولارعا قولداۋ بولاتىندىعىنا سەندىردى. ول سونىمەن بىرگە ءتيىستى ورىندارعا وڭىردە جىلۋ مەن ەنەرگيا كوزىنە ءتو­لەمدى مۇمكىندىگىنشە تۇراقتان­دىرۋ جونىندە تاپسىرما بەردى. مۇنان كەيىن ۇكىمەت باسشىسى وسىنداعى ابايدىڭ قورىق مۇرا­جاي­ىندا بولىپ, ونىڭ جۇمىسى­مەن كەڭىنەن تانىستى. ال مۇنىڭ دا سەبەبى جوق ەمەس. ياعني, بيىلعى جىلى حاكىم اقىننىڭ تۋعانىنا 165 جىل تولسا, ال اقىن مۇرا­جايى­نىڭ اشىلعانىنا – 70 جىل. سوعان وراي, پرەمەر-مينيستر قورىق مۇراجاي قۇرامىنداعى “الاش ارىستارى” فيليالىنا الاش قاي­راتكەرى احمەت بايتۇر­سىنوۆتىڭ عيبراتتى سوزدەرى جازىلعان ەسكەرت­كىش سۋۆەنيردى سىيعا تارتتى. ءتۇس اۋا پرەمەر-مينيستر مەن ونىڭ جانىنا ەرگەن ۇكىمەت مۇشە­لەرى تارباعاتاي اۋدانىنا ۇشىپ بارىپ, بيىلعى قىستىڭ قاھارىنا مەيلىنشە قاتتى ۇشىراعان كوك­جىرا اۋىلىندا بولدى. قازىردە مۇندا ەلۋدەن استام ءۇي بوي كوتەرىپ قالدى. كارىم قاجىمقان ۇلى تابيعات اپاتىنان زارداپ شەككەن اۋىل تۇرعىندارىنا ۇكىمەت تاراپىنان قامقورلىق ودان ءارى جالعاساتىندىعىنا سەندىردى. داۋلەت سەيسەن ۇلى.