فوتو: اشىق دەرەككوز
ەلوردادا جىل سايىن مەكتەپ جاسىنا دەيىنگى بالالار سانى ارتىپ كەلەدى. وعان تۋ كورسەتكىشى جانە كوشى-قون پروتسەسىنە وڭ اسەر ەتىپ وتىر. وسىعان بايلانىستى ەلوردا بالاباقشالارىندا ورنالاستىرىلاتىن مەملەكەتتىك تاپسىرىس تا ارتىپ كەلەدى. بيىل ول ءتورت ەسەدەن استام ءوستى.
ەسەت بايكەننىڭ ايتۋىنشا, بۇگىنگى تاڭدا استانادا 66 164 بالانى قامتيتىن 525 مەكتەپكە دەيىنگى ۇيىم جۇمىس ىستەيدى, ونىڭ 100-ءى – مەملەكەتتىك, 424-ءى – جەكەمەنشىك, ۇشەۋى – ۆەدومستۆولىق. 2023 جىلى ەكى جاستان باستاپ مەكتەپ جاسىنا دەيىنگى بالالار سانىنىڭ وسۋىنە بايلانىستى بالاباقشالاردا قاجەتتى ورىندار سانى 26 563-ءتى قۇرادى.
«قازىرگى كەزەڭدە ينديگو ەلەكتروندىق پورتالىندا كەزەككە 60 971 مەكتەپكە دەيىنگى جاستاعى بالا تىركەلگەن, ونىڭ ىشىندە 2 جاستان 6 جاسقا دەيىن – 41 818 بالا. قالا اكىمدىگى بيىل بالالاردى مەكتەپكە دەيىنگى تاربيەمەن جانە وقىتۋمەن قامتۋدى ۇلعايتۋ ماقساتىندا 224 جەكەمەنشىك مەكتەپكە دەيىنگى ۇيىمدا 10 317 ورىنعا ارنالعان مەملەكەتتىك ءبىلىم بەرۋ تاپسىرىسىن ورنالاستىردى», دەپ ءتۇسىندىردى ەسەت بايكەن.
ايتا كەتسەك, بيىل قالانىڭ مەكتەپكە دەيىنگى مەكەمەلەرىندە مەملەكەتتىك تاپسىرىس وتكەن جىلمەن سالىستىرعاندا ءتورت ەسەدەن استام ءوستى. بۇل دەڭگەي جىل سايىن ساقتالادى.
بۇدان بولەك, جەكە ينۆەستيتسيالار ەسەبىنەن 17 بالاباقشا قۇرىلىسى جۇرگىزىلىپ جاتىر, سونداي-اق بيۋدجەتتىك-ينۆەستيتسيالىق جوبالار ەسەبىنەن 60 مەملەكەتتىك بالاباقشانى جوبالاۋ باستالدى.
سونىمەن قاتار بيىل قىركۇيەك ايىنان باستاپ ەلورداداعى 4 بالاباقشادا (№ 54, № 60, № 66, № 95) جانە 4 شاعىن ورتالىقتا (№ 8, № 11, № 30, № 76) ەموتسيونالدىق-ەرىكتىك جانە مىنەز-ق ۇلىق بۇزىلىستارى بار (اۋتيزم) بالالارعا ارنالعان ينكليۋزيانى قولداۋ كابينەتتەرى اشىلدى.
