كەنشىلەر شاھارىنداعى جىلۋ جەلىسىن جاڭارتۋ اياسىندا ءماشھۇر ءجۇسىپ كوشەسى بويىندا بيىل جاڭا جىلۋ ماگيسترالى سالىندى. جم-2 ماگيسترالىن سىناقتان وتكىزۋ بارىسىن بايقاۋ ءۇشىن وبلىس اكىمى اسايىن بايحانوۆ ەكىباستۇز قالاسىنا ارنايى باردى. ايماق باسشىسى سىناق جۇرگىزىلىپ جاتقان اۋماققا جەتكەنگە دەيىن قۇبىرعا بەرىلگەن قىسىم كومپەنساتور تىعىزداماسىن ج ۇلىپ الىپ, جەلىدەن سۋ اتقىلاعان. ياعني «دوستىق» دۇكەنىنەن «قازاقستان» كينوتەاترى ايالداماسىنا دەيىن ماگيسترالدى سىناقتان وتكىزۋ كەزىندە جاڭا جانە ەسكى قۇبىرلاردىڭ تۇيىسكەن جەرىن قوساتىن تىعىزداعىش كومپەنساتور ىستەن شىقتى. ابىروي بولعاندا, قۇبىرلار زاقىمدالعان جوق. ءبىر كۇننىڭ دەرەسىندە اقاۋ جويىلدى. ەندى وسى ماگيسترالدى جەلىنى سىناۋ جانە جۋ جۇمىستارى قايتا جالعاسادى. سونداي-اق اباي كوشەسىندەگى ءۇش ماگيسترال قىسىممەن تەكسەرۋدەن ءوتتى. بۇل اۋماقتاردا دا ىسكە قوسۋ الدىنداعى دايىندىق جۇمىستارى جۇرگىزىلۋدە.
ايتا كەتەيىك, بىرنەشە كۇن بۇرىن گيدراۆليكالىق سىناقتار كەزىندە ەكىباستۇز تۇرعىندارىنىڭ ءبىرىنىڭ جەكە اۋلاسىن دا سۋ باسقان ەدى. وبلىس اكىمى الگى ءۇي يەسىنەن كەلتىرىلگەن قولايسىزدىقتار ءۇشىن كەشىرىم سۇرادى. بۇگىندە اقاۋ جويىلىپ, اۋلا تازارتىلدى. «جۇرگىزىلىپ جاتقان جۇمىستاردى كوپشىلىككە كەڭىنەن ءتۇسىندىرۋ كەرەك. بىزگە قازىردەن-اق جەلىلەردىڭ وسال تۇستارىن انىقتاپ, پايدا بولعان اقاۋلاردى بىردەن جويۋ ماڭىزدى. سول ءۇشىن جاڭا قۇبىرلار جوعارى قىسىممەن تەكسەرىلۋدە», دەپ اتاپ ءوتتى وبلىس اكىمى.
جالپى, كوكتەمگى جانە كۇزگى گيدراۆليكالىق سىناقتاردان كەيىن ەكىباستۇزدىڭ جىلۋمەن جابدىقتاۋ جەلىلەرىندە بارلىعى 388 اقاۋ جويىلدى. قالا تۇرعىندارىنان كەلىپ تۇسكەن وتىنىشتەر بويىنشا ورامىشىلىك جىلۋ جەلىلەرىندەگى 14 پروبلەمالىق ۋچاسكەنى جوندەۋ جۇمىستارى جالعاسۋدا. 690 كوپقاباتتى تۇرعىن ءۇيدىڭ 665-ءى جىلۋدى قابىلداۋعا تولىقتاي دايىن. تاعى 25 كوپقاباتتى باسپانادا ىشكى جىلىتۋ جۇيەلەرىن جوندەۋ, جۋ, سىعىمداۋ جۇمىستارى اياقتالىپ قالدى.
كومىرلى شاھارداعى جىلۋ بەرۋ ماۋسىمى 1 قازاننان باستالماق. جەرگىلىكتى بيلىك وكىلدەرىنىڭ مالىمەتىنشە, جىلۋدى قابىلداۋعا دايىندىق بويىنشا بارلىق جۇمىس ۋاقىتىلى جانە بارىنشا ساپالى ورىندالۋدا. قازىرگى كۇنى كوممۋنالدىق قىزمەتتەر تاۋلىك بويى جۇمىس ىستەۋ رەجىمىنە كوشىرىلىپ جاتىر. جىلۋمەن جابدىقتاۋدى باستاۋ ءبىر بولەك, جۇيەنى تەڭدەستىرۋ دە ماڭىزدى. جىلۋ جەلىلەرى قىزمەتتەرى مەن قالالىق تۇرعىن ءۇي ينسپەكتسياسى ءبولىمى تاراپىنان ىشكى جىلۋمەن جابدىقتاۋ جۇيەلەرىن رەتتەۋ جانە شەتكى ۇيلەردەگى گيدراۆليكالىق پارامەترلەردى تەڭدەستىرۋ بويىنشا ۇيلەسىمدى جۇمىس كۇتىلىپ وتىر. وبلىس باسشىلىعى جىلۋمەن قامتۋ باعىتىنداعى ءىس-شارالاردى ودان ءارى جەتىلدىرە ءتۇسۋدى جوسپارلاپ, جم-1 جانە جم-3 جىلۋ ماگيسترالدارىن قايتا جاڭارتۋ ءۇشىن جوبالىق-سمەتالىق قۇجاتتامانى دايىنداۋدى تاپسىردى. سەبەبى بۇعان دەيىن 1973 جىلى سالىنعان اتالمىش ماگيسترالدىڭ ءماشھۇر ءجۇسىپ كوشەسى بويىنداعى ۋچاسكەسىندە اقاۋ ورىن العان ەدى. ماماندار قۇبىر مەتالىنىڭ 3 مم-گە دەيىن جۇقارعانىن انىقتاعان. سونىمەن قاتار جىل سوڭىنا دەيىن جم-7/1 جاڭا ماگيسترالىنىڭ قۇرىلىسىن قولعا الۋ كوزدەلىپ وتىر. بۇل ءبىر اۋداننىڭ جىلۋدى شامادان تىس كوپ الىپ, ال ەكىنشىسى اۋماقتا جىلۋ جەتىسپەۋشىلىگى ورىن العان جاعدايدا قالانىڭ جىلۋمەن جابدىقتاۋ جۇيەسىن تەڭدەستىرۋگە مۇمكىندىك بەرەدى. ەكىنشى كوتەرگىش سورعىدان ەكىباستۇز جەو-نا دەيىن تەحنيكالىق سۋدىڭ جاڭا رەزەرۆتىك ماگيسترالىنىڭ قۇرىلىسى دا جالعاسۋدا. قازىر جەر قازۋ جۇمىستارى جۇرگىزىلىپ, جەلى ورناتىلىپ, بەكىتۋ ارماتۋراسى كۇتىلۋدە. نىسان قۇرىلىسىن جىلدىڭ سوڭىنا دەيىن اياقتاۋ جوسپارلانۋدا.
جىلۋ-ەلەكتر ورتالىعىنداعى جوندەۋ جۇمىستارى دا كەستەگە سايكەس جۇرگىزىلىپ جاتىر. بۇگىندە 3 ەنەرگەتيكالىق قازاندىق پايدالانۋعا دايىن تۇر. وعان قوسا جىلۋ بەرۋ ماۋسىمى باستالعانعا دەيىن تاعى 3 سۋ جىلىتقىش قازاندىق اگرەگاتى دا ىسكە قوسىلادى. قالعان 4 قازاندىق قازان ايىنىڭ سوڭىنا دەيىن تولىعىمەن جوندەلەدى.
«قالانى جىلۋمەن قامتۋ ماسەلەسى ءاربىر ەكىباستۇزدىقتى الاڭداتادى. ءبىزدىڭ مىندەت – بارلىق قاجەتتى جۇمىستى ساپالى ورىنداۋ. ءبىزدىڭ بىرلەسە اتقارعان جۇمىسىمىزدىڭ ناتيجەسى ۇيلەردەگى تۇراقتى جىلۋ بولۋعا ءتيىس», دەپ اتاپ ءوتتى ءوڭىر باسشىسى ا.بايحانوۆ جىلۋ جەلىلەرىن جوندەۋشىلەرمەن كەزدەسۋدە.
پاۆلودار وبلىسى,
ەكىباستۇز قالاسى
