الماتىدا وتكەن گاستروەنتەرولوگتەردىڭ حالىقارالىق كونفەرەنتسياسىندا مەديتسينا ماماندارى ۇلتتىق سۋسىننىڭ كول-كوسىر پايداسى تۋرالى ايتتى. تابيعي سۋسىنداردىڭ ەمدىك قاسيەتىن كوبىمىز كورمەسەك تە, ارا-تۇرا ەستيتىنىمىز بار. سويتسەك, بۇگىندە ۇلتتىق ونىمدەرىمىز زەرتتەلىپ, پايداسى دالەلدەنگەن. سۋسىندار اسقازان-ىشەك اۋرۋلارىن ەمدەۋدە تاپتىرمايدى. قازىر بىلەسىزدەر, اس قورىتۋ جۇيەلەرى سىر بەرگەن ناۋقاستار كوبەيىپ كەلەدى. كەيبىر جاعدايدا اۋرۋدى حيميالىق جولمەن ەمدەگەندە ونىڭ جاناما اسەرى پايدا بولۋى ابدەن مۇمكىن. سوندىقتان دارىگەرلەر ەمنىڭ جاناما اسەرىن ازايتۋدى ويلاپ, ناۋقاستارعا ۇلتتىق ونىمدەردى ءجيى ۇسىنا باستاعان. پرەزيدەنت ءىس باسقارماسىنىڭ مەديتسينالىق ورتالىق اۋرۋحاناسىنىڭ باس گاستروەنتەرولوگى باقىتجان بەيىمبەتوۆ تە ۇلتتىق سۋسىنداردىڭ ەمدىك قاسيەتىن راستاپ وتىر.
– ساۋمال, قىمىز, شۇباتتىڭ پايداسىن بىزگە دەيىن زەرتتەپ بىلگەندەر بار. ەمدىك قاسيەتىن كورگەندەر دە جەتەدى. ەگەر وسى سۋسىنداردى ەمدىك پروتوكولدارعا ەنگىزەتىن بولساق, وندا ونىڭ پايداسىن كورەتىندەر كوبەيەتىن ەدى. ءومىردى ۇزارتاتىن سۋسىن. ونىڭ پايداسىن مەن ەمەس, گاستروەنتەرولوگيانىڭ نەگىزىن قالاعان, نوبەل سىيلىعىنىڭ لاۋرەاتى, ايگىلى يليا مەچنيكوۆ ايتقان, – دەيدى ول.
ەمدىك قاسيەتى دالەلدەنگەن سۋسىندار بۇگىندە وزىق ۇلگىدەگى تەحنولوگيامەن وڭدەلەدى. ونىڭ پايداسى تۋرالى ايگىلى پروفەسسور اباي جاڭعابىلوۆتان باستاپ, ەلدىڭ جانە شەتەلدىڭ عالىمدارى عىلىمي ەڭبەكتەرىندە بىرنەشە رەت جازدى. ەندىگى مىندەت تابيعي سۋسىنداردى ەمدىك حاتتاماعا ەنگىزۋ عانا بولىپ تۇر.
كونفەرەنتسيادا قازاقستان-رەسەي مەديتسينالىق ۋنيۆەرسيتەتىنىڭ كافەدرا مەڭگەرۋشىسى كاراميات زوردينوۆا اباي جاڭعابىلوۆتىڭ ەڭبەكتەرىن ەرەكشە باعالايتىنىن ايتتى. سونىڭ ىشىندە پروفەسسوردىڭ انتيحەليكوباكتەرلىك ەمدى وڭتايلاندىرۋعا قاتىستى جۇمىستارىنا توقتالدى. سەبەبى بۇل تاقىرىپ بۇگىنگى مەديتسيناداعى باستى پروبلەمالاردىڭ ءبىرى سانالادى. حەليكوباكتەر پيلوري انتيبيوتيكتەرگە توزىمدىرەك بولىپ بارادى. كاراميات زوردينوۆا تابيعي ءونىم حاتتاماعا ەنسە, كەيبىر اۋرۋلارمەن كۇرەسۋگە سەپتەسەر ەدى دەگەن پىكىرىن ايتتى.
كەيىنىرەك شەگىنسەك, ءۇش جىل بۇرىن حالىقتى ابىگەرگە سالعان پاندەميا كەزىندە كەيبىر دارىگەرلەر ناۋقاستارعا ساۋمالدىڭ پايداسىن ايتىپ, كەڭەس بەرگەن ەكەن. ەسەسىنە سول ناۋقاستاردىڭ بىرقاتارى ساۋمالدىڭ كومەگىمەن جۇقپالى دەرتتەن قۇلانتازا ايىققان دەسەدى. ۇلتتىق سۋسىنداردىڭ اسقازان-ىشەك اۋرۋلارىن جانە پەدياتريالىق دەرتتى ەمدەۋگە سەپتەسەتىنىن بىلدىك. كەيبىر اقپاراتتاردا قاتەرلى ىسىكتىڭ دە الدىن الادى دەگەن حابار ايتىلادى. وسىعان قاراماستان ساۋمال, قىمىز بەن شۇباتتىڭ تاعى قانداي اۋرۋعا ەم ەكەنى ءالى تولىق زەرتتەلمەپتى. بالكىم, تابيعي سۋسىننىڭ مەديتسينالىق حاتتاماعا ەنگىزىلمەۋىنىڭ بىردەن-ءبىر سەبەبى دە زەرتتەۋ جۇمىستارىنىڭ ازدىعىنان بولار. كىم ءبىلسىن؟
