«بوزبالا وسى ءانىمدى ۇيرەنەرسىڭ,
ىرعاققا كەلتىرە الماي كۇيزەلەرسىڭ.
اساۋ ءان جەتەگىڭە جۇرمەگەن سوڭ,
بىرىڭنەن ءبىرىڭ كورىپ سۇيرەلەرسىڭ» دەمەي مە اسەتتىڭ ءوزى؟ كەشەگى كەمپىربايدىڭ كەۋدەسىنەن ۇشقان «كوكالا» ۇيرەك ەكىنىڭ ءبىرىنىڭ كومەيىنە ۇيا سالمايدى. اقان مەن ءبىرجاننان, اسەت پەن كەمپىربايدان قالعان اسىل مۇرانىڭ كەشەگى يەگەرلەرى جۇسىپبەك ەلەبەكوۆ, قالي بايجانوۆتار بولعاندا, ولاردىڭ كوزىندەي جالعاسى, ۇلى سارىننىڭ التىن جۇلگەسى قايرات بايبوسىنوۆ دەسەك, ارتىق ەمەس. قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, پروفەسسور قايرات بايبوسىنوۆ تۋعالى ءاندى قالاي ماپەلەپ كەلسە, ءانشىسىن حالىق تا سولاي ايالاۋعا ءتيىس قوي. وسىنى ەسكەرگەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانىنداعى «كاۋسار» مادەني-تانىمدىق بiرلەستiگiنiڭ ۇيىمداستىرۋىمەن ءانشى حالقىمەن قايتا قاۋىشتى. سۇحباتتى اتالعان كلۋبتىڭ جەتەكشىسى, قازاقستاننىڭ ەڭبەك سىڭىرگەن ءارتىسى, اباي اتىنداعى مەملەكەتتىك سىيلىقتىڭ لاۋرەاتى, پروفەسسور كەنجەعالي مىرجىقباي جۇرگىزىپ وتىردى. وقىتۋشىلار مەن ستۋدەنتتەر سۇراقتار قويىپ, قۇرمەتتى قوناقتىڭ ءانى مەن اڭگىمەسىن قوسا تىڭداپ, ەمەن-جارقىن اڭگىمە-دۇكەن ورنادى.
«ارمانىم – حالىق اندەرى مەن حالىق كومپوزيتورلارىنىڭ شىعارمالارىن ناسيحاتتاپ, حالىقتىڭ جۇرەگىنە جەتكىزۋ, جاس ۇرپاقتىڭ بويىنا ءسىڭىرۋ. ول ارمانىم ورىندالىپ كەلەدى», دەيدى ءانشى. اۋزىن اشقاندا ايتقان ءسوزى ەدى بۇل. ەلەۋسىز ەستىلگەنىمەن, ەستى ءسوز. كەزدەسۋ باستالعان بەتتە بۇل كىسىنىڭ ورىنداۋىنداعى بىرنەشە ءاندى شاكىرتتەرى شىرقاپ سالدى. كوڭىل كوتەرىلىپ قالدى.
جەتپىستەن اسىپ, سەكسەنگە بەت العان ونەر يەسى ۇكىلى ىبىرايدىڭ «قالدىرعانىن» ورىنداعاندا تىڭدارماندى تاڭ ەتكەندەي اسەرگە تاعى كومدى.
«الپىسقا كەلىپ ءان سالىپ, اتىن ءبىر قويدىم «قالدىرعان» دەپتى ۇكىلى ىبىراي. دەمەك ءانشى حالىقپەن جۇزدەسۋگە دايىندالىپ, وسى ءاندى باپتاپ كەلگەنگە ۇقسايدى. جۇرتشىلىق الدىنداعى جاۋاپكەرشىلىگىنە قىلاۋ تۇسىرمەيتىنى وسىدان كورىنەدى. قارتتىقتىڭ ءانىن قۇيقىلجىتىپ وتىر.
سۇراقتاردىڭ ءبىرازى كلاسسيكالىق قازاق اندەرىن سالۋشىلار مەن ەسترادا جانرىندا ورىنداۋشىلارعا دەگەن كوزقاراس تۇرعىسىندا قويىلدى. «ەسترادالىق جانردا ءان سالعانىمەن, ونى دا جارىتىپ جاتقاندار شامالى. تازا ەسترادامەن ايتاتىن ءبىر جاقسى ءانشىنى ايتىڭىزشى؟ «كۇيەۋىڭ سەكسەن بەستە شال, قاديشا» دەپ ايتقان سوڭ نە دەۋگە بولادى؟», دەپ ءبىر كەتتى. ء«داستۇرلى انشىلەردىڭ ەستراداعا كەتكەنىنە قالاي قارايسىز؟» دەگەن سۇراققا جاۋاپ قانا ەمەس, بۇل – بۇگىنگى ورىنداۋشىنىڭ بارىنە قاراتا ايتىلعان ۇستازدىڭ ءسوزى. ال اراگىدىك ەسترادانىڭ سۇيەمەلدەۋىمەن ءان جازدىرىپ جۇرگەن رامازان ستامعازيەۆ, ايگۇل قوسانوۆا سياقتى انشىلەردىڭ ءاندى قاي دەڭگەيدە شىرقايتىنىن حالىق جاقسى بىلەدى.
«ۇستازىم جۇسىپبەك ەلەبەكوۆ شاكارىم, مۇحتار اۋەزوۆ تۋرالى اڭگىمەلەر ايتىپ وتىراتىن. اقتالماي تۇرعاندا ءيمانجۇسىپتىڭ ءانىن راديوعا جازدىرىپ جىبەرگەن سول كىسى. ول كەزدە اسا قاۋىپتى جاعداي. سوندا ايتقان ءبىر اڭگىمەسى ەسكە ءتۇسىپ وتىر: «ساكەن سەيفۋللين ءبىر جىلى كوكبازاردان بايتال اكەلىپ سويدىرىپ, قوناق شاقىرىپتى. اراسىندا احمەت بايتۇرسىن ۇلى بار ەكەن. اڭگىمەلەستىك, ءان سالدىق, ابىكەن حاسەنوۆ كۇي تارتتى. ءسوز اراسىندا احمەت بايتۇرسىن ۇلى ء«بىز قازاق مادەنيەتىن وسىرۋگە ءتيىسپىز. دومبىراعا عانا سۇيەنىپ, تاماعىمىزدى كەرىپ وتىرا بەرۋىمىزگە بولمايدى. ارنايى وقۋ ورىندارىن اشۋ كەرەك. مۋزىكانتتارىمىز نوتا تانۋعا ءتيىس. دۇنيەجۇزى مۋزىكانتتارىمەن يىق تىرەستىرىپ قاتار تۇرۋ ءۇشىن», دەپ اقاڭنىڭ ءسوزىن ايتقانى بار.
ءبىر قۋانىشىم, وسى زاماندا سول كىسىنىڭ ارمانى ورىندالىپ كەلەدى», دەدى قايرات بايبوسىنوۆ. ارعى جاعىن وقىرمان ءوزى ساباقتاپ الار.
