«ەلىمىزدە جىل سايىن 10 مىڭنان استام ءورت بولىپ, ءۇش جۇزدەن استام ادام قازا تابادى. بۇل رەتتە ءورت پەن ءولىمنىڭ نەگىزگى ۇلەسى تۇرعىن ءۇي سەكتورىندا تىركەلدى», دەدى مارعۇلان امانباەۆ.
سونداي-اق ول رەسپۋبليكادا وسى جىلدىڭ 1 قازانىنان باستاپ جىلىتۋ ماۋسىمى باستالاتىنىن ايتتى. جىل باسىنان بەرى ەل بويىنشا 7560 ءورت وقيعاسى تىركەلىپ, 229 ادام قازا تاپتى.
«وتكەن جىلمەن سالىستىراتىن بولساق, ءورت 6,8 پايىزعا, ادام ءولىمى 6,5 پايىزعا وسكەن. وڭىرلەر بويىنشا ستاتيستيكاعا كوشەتىن بولساق, ءورتتىڭ ءوسۋى اباي (46%), الماتى (33%), قوستاناي (26%), جامبىل (20%) وبلىستارىندا بايقالادى. قايتىس بولعاندار سانى جامبىل وبلىسىندا (11 جاعداي), شىعىس قازاقستاندا (9 جاعداي), شىمكەنت (8 جاعداي) جانە الماتى قالالارىندا (5 جاعداي) ءوستى», دەدى مارعۇلان امانباەۆ.
سونداي-اق قر توتەنشە جاعدايلار مينيسترلىگى ورتكە قارسى قىزمەت كوميتەتى توراعاسىنىڭ ورىنباسارى بۇگىنگى كۇنى تۇرعىن ءۇي سەكتورىندا جاراقات الۋ فاكتىلەرى تىركەلگەنىن اتاپ ءوتتى.
ماسەلەن, سەمەي قالاسىندا قىركۇيەك ايىنىڭ وزىندە قاتتى وتىنمەن جىلىتاتىن پەشتى پايدالانۋ ەرەجەسىن بۇزۋ سالدارىنان ءتورت ادام ۋلانىپ, اۋرۋحاناعا جاتقىزىلعان ەكى وقيعا تىركەلدى.
